Job 19

aymara-1997

1¿Kunapachkamarak jumanakasti t'aqhisiyapxitäta, arunakamamp chuym usuchjapxitätasti?

3Mayampi, mayampi nayar jisk'achjapxistaxa. ¿Janit ukham nayar lurapxatamatsti p'inqasipkta?

4Juchanïrista ukasa, juchaxax nayxankakispawa.

5Jumanakax nayat sipan juk'amp suma jaqiw tukupxtaxa, aynacht'ataxsti ajanuxaruw qhant'apxistaxa.

6Jichhasti yatipxam, pachpa Diosaw nayarux aynacht'ayitu, jupaw nayarux sipitar jalt'ayarakitu.

7“¡Jiwayañ munapxitu!” sasaw arnaqasta, janiw khitis yäqkituti; yanap mayta, janiw khitis nayarux chiqapar uñjkituti.

8Diosax thakhixsa jist'antxiwa; sarnaqañaxsa ch'amakt'ayxarakiwa.

9Yänakaxsa q'alpun aparasxitu; jach'añchäwinakaxsa apaqxarakituwa.

10Q'ala aynacht'atpun apanukutu; ¡Jan saphin tukjat quqar uñtat lurjawayitu!

11Nayatak q'apisitapax sinti jach'apuniwa, uñisiriparjamaw uñjarakitu.

12Mä ejercitor uñtataw katuntitu, taqi tuqit muyuntataw uñjasta.

13Diosax jilanakaxsa, jaqi masinakaxsa, jayaruw nayat apaqxitu, jupanakampisti jan uñt'ata jaqirjamaw uñjayarakitu.

14Wila masinakaxasa, jilat masinakaxas apanukxituwa; utaxankirinakas armxapxituwa. Nayan uywatanakaxas jaya jaqirjamaw uñjapxitu; jan uñt'iriw tukupxitu.

16Mayni uywataxar jawsta ukapachasti janiw ist'kxituti, wali achikt'askipansa janiw ist'kxituti.

17Samanaxax warmixar axtasiyiwa; wawanakaxatakis axtaskañakïxtwa.

18Jisk'a wawanakamppachaw jisk'achapxitu; sartasiskta ukkhax jan walinakak nayxat parlapxi.

19Wali munata jilat masinakaxas uñisipxituwa; nayan wali munat masinakamppachaw apanukupxitu.

20Janchixax ch'akhanakaruw lip'katxitu, jan ch'amani, niyas jiwirjamäxaraktwa.

21Jilatanaka jumanakakisay nayat khuyapt'ayasipxita, Diosax q'apisiñapampiw chhuxriñchjitu.

22¿Kunatarak jumanakasti Diosjam arknaqapxistasti? ¿Janit jakkirpachar nayar chhuxriñchjatanakamamp sist'asipkta?

23¡Khitikis nayan arunakax qillqaspa, uka arunaksti mä metalaru qillqantat jaytaspa!

24¡Khitikis hierro qillqañampi uka arunak plomo metalar qillqantaspa, jan ukax mä qalxarus wiñayatak qillqantarakispa!

25Nayax Diosaxan jakaskatap yattwa, jupaw aka uraqin nayan arxatirixäni.

26Janchixas jisk'a jisk'a willirtaskpan, nayasti Tatiturux uñkatapunïwa.

27Pachpa nayraxampiw uñkatä, naya kipkaw uñjä, janiw yaqhati uñjkani.

28Parlatanakam ist'asaxa, ch'amaxax thayjtawayituwa. Jumanakax nayar arknaqañak amtasipktaxa, nayax juchanïkirista ukham amuyapxaraktaxa;

29ukampis wal amuyasipxam, Diosax taqi jiwasanakan taripirisawa; jupax jumanakar taripapkätam ukkhasti, jiwañampiw mutuyapxätam.

← Chapter 18 Chapter 20 →