Job 16

aymara-1997

1Walja kutiw uka parlatanakam ist'xta. Jumanakax nayar chuymachkamayaxa, t'aqhisiyxapxakistawa.

3Ukham ina ch'usa parlanakasti ¿janit tukuskani? ¿Kunatsa jumanakax ukham nayar kutipayapxista?

4Jumanakatix nayjam jikxatasipxasmaxa, nayax jumanakjamaw parlarakirista; sawkasiñampiw p'iqi uksar aksar khiwirista, kunayman walja arunak sapxirisma,

5suma chuymachasiñ arunak sapxirisma, jumanakar ch'amacht'añataki.

6Ukampis janiw parlañas t'aqhisitaxar samaraykiti, janirakiw amukïñas juyart'aykituti.

7Diosax ch'amsa pist'ayxituwa; jilat masinakaxsa apaqasxituwa,

8muyuntataw uñjasta, nayatakiw sayt'asi, k'ari irkatañ arunak nayatak sartayi.

9Tatitux jisk'a jisk'a tukjitu; nayar katuntañatakiw arktitu, qhuru animaljamaw axsarayitu, uñisirixäkaspas ukhamaw uñkatitu.

10Jaqinakax nayatak arsuñatakiw aywthapipxi, kunayman sinqch'ukipxitu jisk'achjasaw t'axllintapxarakitu.

11Diosax qhuru jaqinakan amparaparuw jalt'ayitu, jaqi jiwayirinakan amparaparuw katuyitu.

12Nayax kusisitaw jakaskäyäta, ukhamaruw jupax kunkat katuntitu; jisk'a jisk'a tukjitu, mich'inakapampiw antutjanirakitu.

13Taqi tuqit antutjanitu; jan khuyapt'ayasisaw janchixar chhuqhunuqitu, jiphillanakaxas uraqin jiskhasiskaraki.

14Mayampi mayamp janchixar chhuxriñchjitu, nuwasir ch'aman jaqjamaw nayar jalxatarakitu.

15Llakin phuqhantataw chhankha isinakamp isthapista, p'iqixsa laq'aruw muqintarakta.

16Ajanuxasti jachkäwis p'usuntxituwa; nayraxas juykt'xarakituwa,

17janiw nayan khitir ñanqha lurataxas utjkiti, jupar mayisitaxasti q'umawa.

18Nayar akham jan wali luratax uñjatäñapawa; ¡uraqi, janiy nayan arnaqasitax imantamti!

19Alaxpachan maynis nayat arsurix utjapunpachawa.

20Dios nayraqatan chuymaxan amtatanakap qhanañchiri, ukhamat jachatanakax jupan uñjañapataki;

21nayat arxatasis Dios nayraqatan arsuri, kunjämtix mä jaqin nayraqatapan maynit arxatasis arsuski ukhama.

22Juk'a maranakakiw nayan jakañaxatak utjxi, uka maranakasti jank'akiw sarakipawayxi, jan mayampi kuttaniñatak sarañampïsktwa.

← Chapter 15 Chapter 17 →