Isaiah 3

aymara-1997

1¡Jichhax wal amuyasipxam! Taqi ch'amani Tatitusti, Judá markatxa, Jerusalén markatsa, taqi yänakap apaqxani, manq'añanaksa, umañanaksa q'al apaqxani.

2Wali chacha tukurirusa, ch'axwäwin nuwasirirusa, taripirirusa, profetarusa, yatirirusa, chuymani jaqirusa,

3capitanarusa, jach'a qamir jaqirusa, amuyt'ayirirusa, layqa jaqirus q'al chhaqtayani,

4jupanakxarusti wawanakaruw jilïrit uchani, mä jisk'a yuqall wawanakakiw jupanakarux apnaqxani.

5Jupanak taypinsti jan walt'añax walipunïniwa, jupanakkamaw nuwjasipxani, masinakkamas nuwjasxapxakiniwa. Waynanakasti chuyman jaqinakaruw saykatapxani, jisk'achat jaqinakasti, jach'a jilïri jaqinakaruw saykatapxani.

6Uka pachaw mä jilax awkin utapan mayni jilaparux sani: “Juman isimax isthapt'asiñamatak utjaskiwa, jichhax jumay nanak apnaqapxita, aka t'unjat marksa jumarakiy apnaqam” sasa.

7Jilapasti ukxarux sarakiniwa: “Janiw nayax uka ñanqhachatanak askichkiristti, janirakiw manq'as, isis utaxan utjkituti, ukhamasti markan jilïripat jan utt'ayapxistati” sasa.

8Chiqpachapuniw Jerusalén markax q'al aynacht'xi, Judá markas q'ala tukjatarakiw qhiparxi, uka markanakansti taqiniw Tatiturux chuym ust'ayapxi.

9Juparusti pachpa uñnaqapaw juchanïtap qhanañchaski, juchanakapsti janirakiw imt'asipkiti, Sodoma markankirinakjamaw jan walinak luratapat taqinir yatiyapxi. ¡Ay, kunakïkani, jupanakpachaw mutuyäwip wakichasisipki!

10Ukampis aski jaqinakax kusisiñanïniwa, jupatakisti taqi kunas walikïskaniwa. Aski luratanakapatsti kusisirakiniwa.

11¡Ay, kunakïkan ñanqha jaqitakixa, taqi kunas jupatakix janipuniw walt'kaniti! Tatitusti luratanakapatjam churarakini.

12Mä jisk'a yuqallakiw markaxar t'aqhisiyirixa, marka apnaqäwix warminakan amparapankiwa. Markaxay, irpirinakamax k'arintapxtamwa, pantat thakhinakanjam irptamxa.

13Tatitux taripañatakiw jichhax wakichasiski, markapar juchañchañatakis jank'akirakiwa.

14Tatitusti taripäwiruw jawsani, jilïr awkinakaru, markan jilïrinakaparuw akham sani: “Jumanakax uva yapux q'al tukjapxtaxa, juk'a yäninakatsa lunthatjapxtawa, lunthatatanakamsti utanakamaruw imasipxarakta.

15¿Kuna munañampirak markaxarusti uñisipxta, juk'a yäninakarus t'aqhisiyapxtasti?” Taqi ch'amani Tatitux ukham siwa.

16Tatitusti Jerusalenankir warminakarux sarakiwa: “Jerusalén markankir warminaka, jumanakax jach'a jach'a tukur warminakäpxtawa, p'iqsa alayar waytataw sarnaqapxtaxa, jisk'achañampiw mayninakarus uñch'ukipxtaxa, thuqtas thuqtasaw sarnaqapxtaxa, kunanakampi k'achachatäkitix kayunakamax ukanak chhulluqiyasa.

17Jichhax jumanakarux q'alalsuyapxämawa, p'iqis q'ararata, q'ala llixtjtata tukuyapxäma.”

18“Jerusalén markankir warminaka, Uka urux purininiwa, kuna k'achachasiñanakamatix utjki, amparanakamansa, kayunakamansa, ajanumansa, kunkamansa, ñik'utamansa, jinchunakamansa, luk'ananakamansa, wak'antasiñanakamansa, naya Tatitux ukanak q'al aparapxäma. Ukhamarakiw suma q'apkir qullanakamsa, uñkatasiñatak qhispill lirphunakamsa, isinakamsa, wayaqanakamsa, wiskhunakamsa, suma isinakamsa, taqi ukanak q'al aparapxäma.”

19“Jerusalén markankir warminaka, jichhürux suma q'apkir qullampi q'aphichatäpxtawa, qharürusti axtañ q'aphinakjamaw q'apipxäta; jichhürux suma wak'anakampi wak't'atäpxtawa, qharürusti wiskanakampi wak't'atakïpxätawa; jichhürux suma isinakampi isthapitäpxtawa, qharürusti thantha isinakamp isthapitakïxapxätawa; jichhürux jiwa uñnaqt'anïpxtawa, qharürusti ajanumax t'irikamakïniwa; jichhürux ñik'utamas ukkha sum k'anthapt'asitäpxtawa, qharürusti jan ñik'utaniw uñjasipxätaxa.”

20Tatitusti saskakiwa: Jerusalén markankir nuwasirinakaxa, ch'axwañan nuwaskasin jiwarapxani.

21Jaqinakasti llakisiñat wal jachapxani, llakisiñ ch'iyar isinakampiw isthapisipxani, markasti q'ala apanukutarakïniwa.

← Chapter 2 Chapter 4 →