Isaiah 2

aymara-1997

1Aka arunakasti Isaías profetar unañchäwi tuqi churat Tatitun arunakapawa, jupasti Amós chachan yuqapänwa, uka arunakasti, Judá markampita, Jerusalén markampitawa:

2Qhipa urunakan kawkhankkitix Tatitun utapax uka qullux suma sayt'ayatäniwa. Uka qullusti alayarux wali jach'äniwa, taqi qullunakat sipansa wali jach'arakïniwa. Ukarux taqi markanakaw jutapxani;

3walja markanakaw purintanipxani, akham sasa: “Jutapxam, Tatitun qullupar makhatapxañäni, Jacobun Diosapan utaparu, jupaw jiwasarux thakhip uñacht'ayistani, ukhamat thakhipanjam sarnaqañasataki” sasa. Sión qullutpach Tatitun yatichäwinakapax mistuni, Jerusalenat arunakapas misturakini.

4Tatit pachpaw taqi markanakarus chiqapar uñjani, juparakiw walja markanakaru, wali jayankir markanakarus ch'axwatanakap taripani. Espadanakapxa qhulliñatak armanakaruw tukuyxapxani, lanzanakapsti yawthapiñatak jusinakaruw tukuyxarakini. Janiw kawkïr markas yaqha markamp nuwantasiñatakix wakichaskxaniti, janirakiw nuwasiñatak yatichäwinaksa katuqxapxaniti.

5¡Jacobun markapa, jin sarantañäni, Tatitun qhanapan irpat sarañäni!

6Tatay, wawanakamarux apanuktawa, Jacobun markaparus apanuktawa; markasti inti jalsu tuqit jutapki uka yatir jaqinakan phuqhantatawa, filisteo yatir jaqinakan phuqhantatawa, jaya markankir jaqinakampiw jan walitak arust'äwinak lurapxi.

7Markax qullqinsa, qurinsa phuqhantatawa, qamir yänakapas waljapuniwa; markasti caballonakan phuqhantatawa, carronakapas waljarakiwa.

8¡Israel markax yaqha diosanakampi phuqhantatawa! Jaqinakasti jupanakan lurat diosanakaruw yupaychapxi, pachpa amparanakapamp lurat diosanakaruw yupaychapxi.

9Uka luratanakapax mä p'inqawa, taqinitakis jan walipuniwa, ¡Tatitu, jupanakarux jan pampachamti!

10Tatitun axsarkañ nayraqatapatsti imantasxapxaniwa, qarqanak taypiruw imantasxapxani, jach'a kankañapan wal qhanatapatsa, uraq manqharuw imantasxapxani.

11Jach'a jach'a tukur jaqinakasti alt'atäpxaniwa, p'iqi waytat jaqinakas jisk'achjatäpxaniwa, uka urux Tatitukiw jach'ar aptatäni.

12Kunürutix taqi ch'aman Tatitux sartkani uka urux jak'achasisinkiwa, uka urun jach'a jach'a tukurinakasa, p'iqi waytat jaqinakasa jisk'achjatäpxaniwa,

13taqi khitinakatix Libanonkir cedro quqanakar uñtat jach'anakjam amuyasipki ukanaka, khitinakatix Basán chiqan roble quqanakar uñtatjam amuyasipki ukanaka;

14taqi khitinakatix jach'a qullunakar uñtatäpkaspas ukham amuyasipki ukanaka,

15taqi khitinakatix mä jach'a torrëpkaspas ukham amuyasipki ukanaka, jan ukax mä jach'a pirqäpkaspa ukham amuyasipki ukanaka,

16taqi khitinakatix Tarsis markan utjkis uka jach'a barconakjam amuyasipki ukanaka.

17Jach'a jach'a tukur jaqinakaxa, p'iqi waytat jaqinakasa, q'ala aynacht'ayatäpxaniwa. Uka urusti Tatitukiw jach'ar aptatäni,

18taqi yaqha diosanakas q'ala tukjatäniwa.

19Kunapachatix Tatitux sartaskani, aka uraqirux axsarañapampi phuqhantkani uka uruxa, jaqinakax qarqa p'iyanakaruw imantasxapxani, uraq manqhanakaruw imantasxapxani; Tatitun axsarkañ nayraqatapatsti, jach'a kankañapan wal qhanatapatsa, taqiniw imantasxapxani.

20Uka urunsti jaqinakax diosanakapxa, apanukxapxaniwa, qurita, qullqit jupa pachpan lurasit diosanakxa, yupaychañatak lurasipkäna uka diosanakapxa, achakunakaru, chiñinakaruw churxapxani,

21Tatitux sartkani, aka uraqir axsarañampi phuqhantkani uka uruxa, qarqa p'iyanakaru, jach'a qarqa manqhanakaruw imantasiñatak mantxapxani, Tatitun axsarkañ nayraqatapata, jach'a kankañapan wal qhanatapat imantasxapxani.

22Ukhamasti, jaqinakarux jan alkatasipxamti, uka jaqinakax mä juk'atakikiwa, taqiniw jiwarapxani.

← Chapter 1 Chapter 3 →