Isaiah 14

aymara-1997

1Israel markat khuyapt'ayasitapatxa, Tatitux wasitat jupan ajllisit markapat uñt'asxistani. Tatitux uraqisaruw kuttayanxistani. Yaqha markan utjir jaqinakasti markas taypin jawsayasiñatakiw jutapxani, ukatsti markasampiw mayachasxapxani.

2Kawkharutix Tatitux mä uraq churkistu ukar kuttaniñatakix walja markanakaw yanapistani. Ukatsti jupanakarux katuntañäniwa, nayrax jupanakax jiwasanakaruw t'aqhisiyas apnaqistäna, jichhasti jiwasanakaw jupanakarux t'aqhisiyañäni.

3Israel marka, kunapachatix Tatitux t'aqhisiñanakamata, llakisitanakamata, jachkaña yaqha jaqir katuyat tukutamat samarañ churkätam ukkhaxa,

4Babilonia reyit phiskasisax akham sasaw jayllintäta: “¡Uñtapxam! ¿Kunarus jichhax t'aqhisiyirisax purt'asi? jach'a jach'a tukuris ¿kunarus puri?

5Tatituw uka ñanqha luririn ch'amap tukji, uka qhuru jaqin thujrupsa p'akinuqi,

6markanakarux phiñasiñampiw t'aqhisiyäna, jan inakt'asaw mutuyarakïna, markanakarusti wali phiñasitaw tukjäna, jan khuyapt'ayasisaw arknaqäna.

7Jichhax taqi akapachaw samart'at jikxatasxi, kusisiñatsa wal arnaqasxi.

8Libanonkir pinonakasa, cedro quqanakasa, juman aynacht'atamat kusisipxiwa, sapxarakiwa: ‘Juman aynacht'atamat aksaruxa, janiw khitis nanakarux tinkuraykxapxituti’ sasa.

9Manqhapachansti, jiwatanak taypin wali uxuñaw utji, jumar katuqiriw mistunipxi. Jiwatanakan ch'iwinakapas sarthapiwa, akapachan jilïrinakapas jumar jikxatiriw mistunipxi; taqi markanakan reyinakapasti qunuñanakapat sartapxarakiwa.

10Taqiniw jupanakax arsupxi, akham sasa: ‘Jumas ch'amam pist'ayasxaraktawa, nanakjamaw jichhax tukxtaxa.

11Akkharuw jach'a jach'a tukuñamax tukusxi, arpaman suma toct'asitanakapas tukusxi. Ikiñamax q'ala ñusantatawa, janxatanakamas laqatunakawa’ sasa.

12“¡Qhantati warawara, kunjämarak uka alayat jalaqtantasti! Markanakar atipjirïstaxaya, jichhax pampar jaquqatätawa.

13Chuymamansti amtäyätawa: ‘Jichhax alaxpachkamaw makhatä; qunuñaxsti Diosan warawaranakapxaruw uskt'asï, khaya jaya alayan qunt'asï, kawkïri qulluntix diosanakax tantachasipki ukkhana.

14Qinayanakatsa juk'ampi alayaruw makhatä, jach'a Diosjamarakiw tukü’ sasa.

15¡Ukampis jichhax jiwatanakan manqha pachapkamaw jalanttaxa, ch'amaka mik'ay manqharuw purtaxa!

16Jumar ukham uñjasinsti, jumar uñch'ukiriw pachpar qhiparapxani, ukatsti sapxarakiniwa: ‘¡Aka jaqix taqi uraqpach khathatiykän ukarakisä! Markanakarus jupaxay tukjchïnxa,

17aka uraqirus ch'usa wasararuw tukuyänxa, markanaksa tukjarakïnwa, katuntat jaqinakarus janixay antutkchïntixa!’ sasa.

18Kunapachatix markanakan reyinakapax jiwxapxi ukkhaxa, suma amay imañanakar imt'atäxapxiwa;

19ukampis jumarux amay imañ chiqatxa jayaruw liwtapxtam, mä axtaskañ t'unäkasmas ukhama, jaqin takisit amayarjamaw liwtapxtam, jaqin jiwarayatanak taypina, p'iqi apaqat jaqinak taypina, qalarar ch'amak manqhar jaquntataraki.

20Markamar tukjatamatsti, markaman utjir jaqinakar jiwarayatamatsa, janiw jichhax mayni reyinakarjam imapkätamti. Ukham ñanqha lurir jaqin wawanakapasti, janiw wiñay jakapkaniti.

21Jichhax wakichasipxam uka wawanakar jiwarayañataki, kawkïr awkinakapatix jaqinakar jiwaraykän ukan wawanakaparu, ukhamata aka uraqi jan juk'amp apnaqxapxañapataki, aka uraqirus janirak markanakamp phuqhantañapataki”.

22Taqi ch'amani Tatitux siwa: “Jupanakampiw jichhax nuwasï, Babilonia sutsti chhaqtayäwa, ukan utjirinaksa, wawanakapamppacha, allchhinakapamppach chhaqtayä.

23Mä ñiq'i mik'ayaruw tukuyä, ukansti jukunakakiw utjapxani. Tukjañ pichañampjamaw pichanukü.” Ukham siw taqi ch'aman Tatituxa.

24Taqi ch'amani Tatitux juramentompiw arsu: “Janiw qhipar kuttañax utjkiti, kuntix amtkta ukax phuqhasipuniniwa, kunjämarutix amtkta ukax lurasipuniniwa.

25Nayan markax taypinkki uka Asiria markarux t'unjäwa, qullunakaxan q'al juparux tukjä. Jupan t'aqhisiñapasti markaxarux janiw juk'ampi t'aqhisiyxaniti, qhuru kankañapas janiw juk'ampi markaxar jan walt'aykxaniti.

26Kawkïr amtäwtix wakichkta ukax akawa, taqi markanakaruw tukjä.”

27Taqi ch'amani Tatituw ukham amti, janiw khitis jark'kaspati. Jupax jichhas axsarayaskakiwa, janirakiw khitis uka amtäwip mayjt'aykaspati.

28Ahaz sat reyix jiwkäna uka maraw Isaías profetax aka profecía arunak arsüna:

29Filisteo marka, Asiria marka apnaqir reyix jiwxiwa, ukataq t'aqhisiykäyätam uka. Ukampis jumax jan kusiskamti, Asiria markax juk'amp jach'a uñisirimaw tukuni; jiwayir asirut sipansa juk'ampiw tukuni.

30Naya kipkaw mä juk'a jilt'ir jaqinakamarux jiwarayä; manq'atjamaw uka jaqinakamax jiwarapxani. Ukampisa, juk'a yänakani israelitanakakixa, chhuxllanakax uywanakapatak utjapuniniwa, sumakirakiw samart'asipxani.

31¡Filisteo markanaka, wararipxam, ayquñat wararipxam, mulljasiñatsa khathatipxam! Jichhasti alay tuqit mä ejercitow jutanti jiwq'i qinayar uñtata; soldadonakapasti nuwantañatakix wakicht'atäpxiwa.

32Uka markan khithanitanakaparusti akham sasaw yatiyatäni: Tatituw Jerusalén marka utt'ayi, markapan llakitanakasti uka markan samarañ jikxatapxani.

← Chapter 13 Chapter 15 →