Isaiah 15

aymara-1997

1Moab markataki profecía arunaka: Ar sata markax t'unjatäkän uka arumaxa, Moab markax t'unjatarakïnwa; Quir sat markax t'unjatäkän uka arumasti, Moab markax t'unjatarakïnwa.

2Dibon markan utjir jaqinakasti, qullu patankki uka templor jachiriw makhatapxi, Moab markasti, Nebo markampina, Medebá markampin t'unjatätapat chuyma wal usuyasi. Ñik'utanakapasa, sunkhanakapas taqinin mururatkamäpxi.

3Uta patxanakansa, plazanakansa, taqiniw chuyma usuyasipxi, jach'at wararipxaraki; markan k'ullk'u thakhinakapansa jaqinakax chhankha isimpi isthapitkamaw sarnaqapxi, jachkäwis niya tukusirpachäpxiwa.

4Hesbón, Elalé sat markanakan jakirinakaxa, jach'at arnaqasisaw yanap mayipxi; Jahas sat markakamaw arnaqasitanakapax ist'asi. Ukat Moab markan nuwasir jaqinakapax axsarayasipxi, axsarañatsa wal khathatipxi.

5Isaías profetax siwa: Moab markar ukham uñjasax chuymaxax walpin usutu; moabitanakasti axsarañampi phuqhantatäpxiwa, Zoar, Eglat-selisiya uka markanakaruw jaltxapxi, Luhit siski uka qhathanjam jacht'asis makhatapxi, Horonaim uka thakhinjam t'unjat uñjasitapat jacht'asis sarxapxi.

6Nimrim uka chiqan utjir uma phuch'unakas wañt'xiwa, ch'uxña quranakas ankuntawayxiwa, taqi chhuxllanakas jiwsuwayxiwa, janirakiw mä ch'uxña laphis utjkxiti.

7Ukat jaqix jichhax taqi yänakap apthapisxi, ukatsti Sauce jawir khurkataruw apasxapxi.

8Yanap mayisa arnaqasitanakapasti Moab uraqpachan ist'asi, wararitanakapasti Eglaim siski uka chiqkamaw ist'asi, Beer-elim siski uka chiqkamaw ist'asi.

9Dimón siski uka chiqan utjir phuch'unakax wilampi phuqhantatäkchisa, jichhax juk'ampi jan walt'añanak apayasinkakiwa; Moab markat qhispirinakarusti, leonanakaw jupanakar manq'antani.

← Chapter 14 Chapter 16 →