Isaiah 13

aymara-1997

1Babiloniataki profecía arunakxa, Amós chachan Isaías yuqapaw unañchäwi tuqi katuqäna:

2“¡Mä jach'a qullu patxar mä wiphal sayt'ayapxam! ¡Soldadonakarusti nuwantapxañapatak art'apxam! ¡Sarantapxañapatak ampar aytapxam! ¡Punkunakap chiq jilïrinakan mantapxañapataki!

3Jan axsarir jaqinakaxarux niyaw jawsayta, ch'axwan nuwasirinakaxarusti arux churarakta, khitinakatix atipjataxat kusisipki ukanakar mutuyapxañapataki.”

4Qullunakansti walja jaqinakan arnaqasitanakapaw ist'asi. Markanakan uxutanakapaw ist'asi, kawkïr markanakatix tantacht'aski ukanakata. Taqi ch'aman Tatitusti soldadonakaparux uñakipiwa, nuwantañatakix wakicht'atäpxiwa.

5Wali jaya markat jutapxi, jaqin jan uñjkat jaya markata. Tatitu pachpaw q'apisiñapan yänakamp phuqt'at juti, markpachar t'unjañatakiw juti.

6Babiloniankirinaka, wararipxam, Tatitun taripañ urupax jak'ankiwa, taqi ch'aman Tatitux mä t'aqhisiyañampiw purini.

7Ukapachasti taqi jaqinakaw ch'am jiwt'ayasipxani, janiw kunatakis ch'amanakapax utjkxaniti,

8wali mulljataw qhiparapxani. Mä jach'a t'aqhisiñampi, llakisiñampiw jupanakxarux jutani, wawachasir warmjamaw ayquñamp q'iwisipxani. Jupanakkamaw mulljat uñkatasipxani, p'inqasiñatsa ajanunakapax ninjamaw nakhani.

9Tatitun urupax purinxiwa, axsarkañ urupuniwa, q'apisiñapas ninjamaw nakhi, aka uraqirusti ch'usa wasararuw tukuyani, jucharar jaqinakarus tukjarakiniwa.

10Uka urux intis ch'amaktxaniwa, phaxsis janiw qhantkxaniti, warawaranakas janirakiw juk'amp qhankxaniti.

11Tatitusti siwa: “Akapachan jakirinakan ñanqha luratapat mutuyäwa, jaqi jiwayatanakapatsa mutuyarakïwa. Jach'a jach'a tukur jaqinakarusti jach'a jach'a tukuñanakap tukjä, ñanqha qhuru jaqinakarusti jisk'achjarakiwa.

12Jaqinakasti q'alaw tukusini, Ofir sat chiqankir suma qurit sipansa juk'anikïxapxaniwa.

13Uka urun nayan phiñasitaxan jach'ätapatxa, alaxpachax khathatiniwa, aka uraqis yaqha chiqaruw jittarakini.

14“Uka uruntix yaqha markanakankir jaqinakax Babilonia markankasipkchini ukaxa, mulljat tarujar uñtataw jaltxapxani; jan awatirin mulljat ovejanakjamaw tutuktxapxani.

15Khititix jikxatayaskani ukasti cuchillumpi chhuqhuntataw uñjasini, khititix katjayaskani ukasti jiwayataw uñjasini.

16Jupanakan uñjkataw jisk'a wawanakaparux uraqir jisktas jiwarayapxani; utanakapatsa yänakap q'al apsupxani, warminakapas munkir jan munkir warmisitäpxaniwa.

17Jupanakatakisti Medo markankir jaqinak sartayä, uka jaqinakax janiw qullqitjam llakisipkiti, janirakiw qurirus munapayapkiti.

18Waynanakarux mich'inakapampiw jiwarayani. Asu wawanakatsa janiw khuyapt'ayasipkaniti, jisk'a wawanakatsa janirakiw khuyapt'ayasipkaniti.

19Jichhax Babilonia marka, sum ist'ita: yaqha markanakatakix mä k'ajkir qaljamätawa, caldeonakatakisti mä jach'a kankañan markjamarakïtawa, ukampis naya ch'aman Tatituw q'al tukjäma kunjämtix Sodoma, Gomorra markanakar t'unjtxa ukhama.

20Babilonia markan janipuniw jaqix juk'ampi utjkxaniti, Árabe jaqinakas janiw mayampsa ukar utjantaskxapxaniti, awatirinakas janirakiw uywanakaparux ukan manq'ayaskxapxaniti.

21Ukansti monte phisinakakiw utjxani, utanakansti jukunakakiw phuqhäxani, kunayman suri jamach'inakakiw ukan jakxapxani, cabritonakakiw uksar aksar jalanaqxapxani.

22Reyinakan utjañ utanakapansti pampa anunakakiw wararxani, suma k'ajkiri utanakapansti qamaqinakakiw utjxani. Babilonia, mutuñ urumax niyaw purinxi.”

← Chapter 12 Chapter 14 →