Isaiah 12

aymara-1997

1Uka urunsti sarakïtawa: “Tatay, yuspagarsmawa, nayatakix phiñasitäkchiyäta ukasa, jichhax uka phiñasiñamax tukusxiwa, jichhax sumankañ churxarakista.

2Tatit Diosaw nayar qhispiyitu, juparuw iyawsta, janiw kunsa axsarkti. Tatituw nayan arxatirixaxa, nayar ch'amañchirixasa, jupaw qhispiyirixaxa.”

3Jumanakas kusisipxarakïtawa, jupan qhispiyasiñapat kusisipxäta,

4ukat sapxarakïta: “Tatitur yuspagarapxam, jupar art'asipxam, markanakarusti kuntix jupax lurki ukanak yatiyapxam, jupan aka uraqpachan jilïrïtap amtayapxam.

5Tatitur q'uchupxam, luratanakapasti wali jach'awa, taqi jaqinakaw uk yatipxañapa.

6Jerusalén markan utjasirinaka, kusisiñat arnaqasipxam, Israelan Qullan Diosapax taqi jach'a ch'amapampiw jumanak taypinki.”

← Chapter 11 Chapter 13 →