Genesis 44

aymara-1997

1Uka qhipatsti Joseax utap apnaqir jilïriruw säna: —Aka jaqinakatakix costalanakapar trigo phuqhantarapim, qawqtix apirjamäpkaspa ukkha, qullqinakapsti costalanakapar ucharxarakim.

2Ukat sullka jilapan costalaparusti nayan qullqi qiruxa ucharakim, trigot churki uka qullqimp chika. Josean utap apnaqir jaqisti kunjämtix Joseax siskatayna ukham luräna.

3Qhipärmanthisti Josean jilanakapax asnonakap irpxarusisin sarxapxäna.

4Jupanakasti janïraw markat jayankapkänti, ukapachaw Joseax utap apnaqir jilïrir säna: —Uka jaqinakar arktam, ukatsti jikxatasin sarakim: “¿Kuns ak lurapxista? ¿Kunatsa uywirixan qullqi qirup lunthatsunipxta?

5Uka qirux uywirixan umasiñapawa, yatxatañ qirurakiwa. ¡Jan walpun lurapxtaxa!” —sasa.

6Kunapachatix Josean utap apnaqir jaqix jupanakar jikxatkäna ukkhasti, kuntix Joseax siskatayna uka pachpa arunak sarakïna.

7Ukampis jupanakax ukxaruw sapxarakïna: —¿Kunatsa jumax ukham parlxayapxista? ¡Janipuniw nanakax kunäkipansa ukxa lurapkiristti!

8Nanakax Canaán uraqitpach kuttanipxta, costalanakaxan jikxatapkta uk qullqi kuttayxiri, ¿kunjämarak nanakasti uywiriman qullqipsa, quripsa lunthatsunxapxästi?

9¡Uka qirutix nanakat kawkïrin costalapankani ukkhaxa, jiwayatäñatak juchañchatäpan; ukhamarus nanakax taqiniw uywiriman luqtiripäpxarakï! —sasa.

10Ukat Josean utap apnaqir jilïrix sarakïna: —Walikiwa, arsutanakamarjamäpan, ukampisa khitin costalapantix qullqi qiru katjkä ukakiw nayan luqtirixäni, mayninakasti janiw kuna juchanïkanisa —sasa.

11Ukatsti sapa mayniw jank'aki costalanakap asnonakapat khumuqapxäna, ukat jararapxarakïna.

12Josean utap apnaqir jilïristi sapa maynin costalap thaqtäna, jilïrinkirit qalltasina, sullkïrinkirir tukuyañkama, ukatsti Benjaminan costalapat qullqi qiru apsüna.

13Ukatsti jupanakax llakisiñatsa, isinakap ch'iyanuqasipxänwa. Ukatsti sapa mayniw q'ipinakap asnopar khumxatasin markar kuttanipxäna.

14Kunapachatix Judá chachampi, jilanakapampix Josean utapar puripkän ukkhaxa, Joseax ukankaskänwa. Ukat jupanakax Josean nayraqatapar alt'asipxäna, ajanunakapsa uraqir puriyañkama,

15Joseasti sarakïnwa: —¿Kunatsa uk lurapxista? ¿Janit yatipkta, nayan taqi kun yatirïtaxsti? —sasa.

16Ukxaruw Judá jilapax sarakïna: —¿Tata, kamsapxarakïmasti? ¿Kunjämatarak “Janiw lunthatäpkti” sapxiriststi? Diosax juchachasiskir katjapxitu. Jichhasti taqiniw nanakax juman t'aqhisiyat luqtirim tukupxta, khititix qullqi qirum katkatayna ukamp chika —sasa.

17Ukampis Joseax sänwa: —Janiw ukhamäkaspati. Khititix qullqi qiru apkatayna jupakiw luqtirixäni. Mayninakax jan kuna llakin awkiman utapar kuttxapxam. Janiw khitis kuns sapkätamti —sasa.

18Ukat Judá jilapax Josear jak'achasisin säna: —Tata, janikiy nayatak phiñasimti, nayax achikt'asïma, jumampiw parlt'añ munta. Jumasti nayatakix pachpa faraón reyïkasmas ukhamätawa.

19Jumax jiskt'apxistawa, awkinïpxtti jan ukax yaqha jilaxax utjaskicha uka tuqita.

20Nanakasti awkixan chuymanïxatap yatiyapxsmawa, ukhamarak sullka jilan utjaskatapsa, uka jilaxan kunapachatix awkixax chuymanïxän ukkha yuritapsa. Ukatsti sapxaraksmawa, awkixan uka yuqapar wal munasitapa, uka sapa wawaki pachpa taykatxa qhiparxatapa, mayni jilapan jiwxatap qhipata.

21Ukatsti jumax jupar uñt'añ laykuw sapxarakistaxa: “uka sullka jilam irpanipxam” sasa.

22Nanakasti sapxaraksmawa: “Janiw waynax awkipar apanukunkaspati, ukhamäspa ukkhax awkipax llakisiñat jiwt'aspawa” sasa.

23Jumasti sapxarakistawa: “Janitix sullka jilamar irpanipkäta ukkhaxa, janiw katuqapkämati” sasa.

24“Kunapachatix awkixan utapar kuttxapxta ukkhasti, nanakax taqi kuntix jumax sapkista ukanak jupar yatiyapxta.

25Ukatsti awkixax: ‘Trigo alir kuttapxakimaya’ sapxituwa;

26nanakasti sapxaraktwa: ‘Janiw sarapkiristti, janitix sullka jilax nanakamp chika sarkani ukkhaxa, uka marka apnaqir tatasti nanakarux irpanipxam sapxarakituwa’ sasa.

27Awkixasti sapxituwa: ‘Jumanakax yatipxtawa, Raquel warmixax pä wawa churitu;

28maynïrix saraqawayxituwa, ukürut aksarusti janiw juparux uñjkxaraktti. Mä pampankir animalan manq'antxatap yatta.

29Jichhax mayni wawaxtix thiyaxat irpasxapxarakikïta, ukat mä kuna jan walt'añarus purini ukkhasti, jumanakaw juchanïpxäta aka awkin llakiskäwi jiwañapatakixa’ sasa.

30“Ukhamasti, nayatix awkixan utapar jilaxamp chika jan kuttkä ukaxa, awkixax jiwt'aspawa. Awkixax aka waynïpan jakaski. Ukhamat nanakax juchanïpxirista chuyman awkixan llakiskäwi jiwañapataki.

32Awkixarusti nayaw sanirakta: ‘Aka waynxa nayaw uñjaskä, kuna jan walt'añarus purini ukkhax nayampiw parläta’ sasa. Ukhamarus saraktwa: ‘Janitix kuttayanirapkäma ukkhaxa, nayaw wiñayatak juchanïskä’ sasa.

33Ukat jichhax jumar achikt'assma, nayaw juman t'aqhisiyat luqtirimat aka wayna lanti qhiparä. Jupasti jilanakapamp chika sarxpan.

34¿Kunjämarak nayasti awkixan ukar kuttästi, aka wayna jan irpt'atasti? Janiw nayax awkixar t'aqhisir uñjañ munkti” sasa.

← Chapter 43 Chapter 45 →