Genesis 43

aymara-1997

1Mach'ax juk'ampiw Canaán markpachan utjäna.

2Ukhamasti kunapachatix Jacobumpi, wawanakapampix Egiptot apapkatayna uka trigo tukuntxapxän ukkhasti, Jacobux yuqanakaparuw säna: —Egiptor wasitat sarapxakimaya, trigo alanipxam —sasa.

3Ukampisa Judá yuqapax ukxaruw säna: —Egipto marka apnaqirix qhan sapxitu: “Janitix sullka jilamar irpanipkäta ukkhaxa, jan jutxapxamti” sasa.

4Jumatix Benjamín irpayapxität ukkhakiw nanakax trigo alirix sarapxirista;

5janitix jupar antutaskäta ukkhasti, janiw sarapkiristti. Uka jaqix qhan sapxitu: “Janitix sullka jilamar irpanipkäta ukkhaxa, jan jutxapxamti” sasa.

6Ukat Israelax sarakïna: —¿Kunatsa aka taqi jan walinak lurapxista? ¿Kunatsa uka jaqirux “Sullka jilanïpxtwa” sapxtaxa? —sasa.

7Jupanakasti sapxarakïnwa: —Jupax nanakarux walxay taqi jiwasat jiskt'apxchituxa, ukhamarak wila masisatsa. “¿Awkimax jakaskiti? ¿Yaqha sullkanakamas utjaskiti?” sapxchituxaya. Nanakasti jiskt'atax taqi kunsa chiq arsupxta. ¿Kunjämaraki nanakasti yatipxiriskäyätsti “Sullkam irpanipxam” sañapsti? —sasa.

8Judá yuqapasti Israel awkiparux sänwa: —Jakañ munaskakstan ukaxa, Benjaminax nanakamp chika sarpan, nayaw jupar uñjaskä, anchhitpachaw sarapxarakï, ukhamat jumasa, nanakasa, wawanakaxas jan jiwkañäniti.

9Nayaw jupar uñjaskä; kunäxani ukasa nayampiw parlaskäta. Janitix aka chiqar kuttayanirapkäm ukaxa, nayaw wiñayatak juchanïskä.

10Janitix akham qhiparapkiriskäyät ukaxa, ¡niyaw sarasin pä kuti kuttanipxiriskäyäta! —sasa.

11Ukat awkipax ukxar sarakïna: —Ukham wakischi ukax jilamar irpapxakchïtaya, uka jaqin ukar jank'ak kuttapxarakim. Ukampis akham lurapxam: Costalanakamar mä waxt'äwi uka jaqitak aparapipxam. Kunatix uraqisan utjki ukanakat mä juk'akama: Bálsamo, misk'i, q'apkir qullanaka, mirra, nueces, almendra ukanaka.

12Qullqsti mä ukkhamp apasipxäta, kuna qullqtix costalanakamar uchasin kuttayapktam ukxa churxapxätawa. Inas jupanakax pantjasisin ukar uchapxchi.

13Sarapxamaya, sullkam irpxaruwayapxam, ukatsti wasitat uka jaqin ukar uñstapxam.

14Taqi ch'aman Diosasti uka jaqirux suma chuyma churpan, jumanakar sumaki uñjañapataki, ukhamat mayni jilamaru, Benjaminarus antutaniñapataki. ¡Nayan jan wawani qhiparañaxatix wakischi ukaxa, ukhamäpanaya! —sasa.

15Ukatsti Jacobun yuqanakapax waxt'äwinakampi, qullqsa mä ukkhamp apxarupxäna, ukatsti Benjamín jilap irpt'ataw, jank'ak Egipto markar sarapxäna. Purisasti Josean ukaruw uñstapxäna.

16Joseasti Benjaminar jilanakapampi chikt'at uñjasaxa, jach'a utap apnaqir jilïriruw säna: —Aka jaqinakarux utaxar irpam, ukatsti mä vaca kharsusin manq'añ wakicht'arakim, chikürux nayampiw manq'apxani —sasa.

17Jilïr jaqisti, kunjämtix Joseax siskatayna ukham luräna, jupa kipkarakiw jupanakar irpäna.

18Ukampis jupanakax Josean utapar irpat uñjasisinxa, wal mulljasipxäna, ukatsti jupanakkamaw sasipxarakïna: —¡Akax janiw ukhamakïkiti! Kuna qullqtix nayrïr kutix costalanakasar uchapkatayna uka tumpampiw aka jaqix utapar irpanistu. Jichhax jutasin nuwjistaniwa, ukatsti t'aqhisiyat jaqirjamaw irnaqayistani, ukhamarak uywanakasarusa —sasa.

19Ukat uta punkur purisaxa, Josean utap apnaqir jilïrir jikxatapxäna,

20akham sapxarakïna: —Tata, nanakax niyaw nayrïr kutix trigo alasir jutapxta,

21ukampis ikt'añatak mä chiqawjar purisasti, costalanakax jararasipxta, ukatsti costalanakaxan qullqi jikxatapxta, sapa mayni nanakan qullqinakaxaw ukankäna. Qullqix phuqhatäskataynawa, jichhasti apanxapxtwa,

22ukhamarus jichhax mä juk'amp qullqxa trigo alasiñatak apasinxapxta. Ukampis janiw yatipkti khitin uka qullqi costalanakaxar uchatapsa —sasa.

23Uka jilïr jaqisti sarakïnwa: —Suyt'apxakim, jan llakisipxamti. Jumanakampina, awkimampin Diosapaw uka qullqxa costalanakamar uchpacha, nayasti kuntix jumanakax churapkatäta uka qullqxa katuqtwa —sasa. Jilïr jaqisti Simeonaruw irpsuwayäna, ukatsti kawkhankkäntix jilanakapax ukkharuw irpäna.

24Ukatsti taqpachaniruw Josean utapar mantayäna, kayunakap jariqasiñatakix uma churäna, asnonakaparusti manq'a churarakïna.

25Jupanakasti ukchañkamax churäwinak wakicht'apxäna, ukatsti Josean chikürutak puriniñap suyasipkäna, ukan jupanakamp manq'añap yatipxarakïna.

26Kunapachatix Joseax utapar purinxän ukkhasti, jupanakax uraqkamaw jupatak alt'asipxäna, ukatsti apapkatayna uka waxt'äwinak churapxarakïna.

27Joseasti jupanakar aruntasinxa, jiskt'arakïnwa: —¿Kunjämäsipktasa, awkimas kunjämäskarakisa? ¿Jakaskiti? —sasa.

28Jupanakasti alt'asisaw ukxar sapxäna: —Jumar luqtiri awkixax jakaskiwa, walikïskarakiwa —sasa.

29Joseasti uñatatasin Benjaminaruw uñjäna, khititix pachpa jilapäkän ukaru, ukat jiskt'arakïna: —¿Akat uka sullka jilamaxa? ¡Wawa, Diosay jumarux aski waxt'äwip churpan! —sasa.

30Jilapar uñjasinsti Joseax chuymap ch'allxtayasïna, niyas jachirjamänwa, ukat jupax jank'akiw ukawjat mistuwayäna. Utapar mantasinsti, jan chuymachkayaw jachäna.

31Chuymap t'akt'ayasxasinsti, ajanup jariqasïna, ukat mistunxasin sarakïna: “Manq'asiñäni” sasa.

32Josearux yaqhawjaruw manq'a churapxäna, Jacobun yuqanakaparusti yaqhawjaru, ukatsti Joseampi chika manq'apxirïkan ukanakarusti yaqhawjaruw churapxarakïna; egipcionakax janiw hebreonakamp chika manq'apxirïkänti.

33Josean jilanakapasti jupan uñkatasipan qunt'asipxäna, jilïrit sullkakama, ukatsti jupanakkamaw wali muspharat uñkatasipxäna.

34Joseasti jupan manq'apat jupanakar churäna, ukampis Benjaminarux mayninakat sipansa juk'amp jila churäna. Joseampi, jilanakapampisti chikaw umapxäna, wal kusisipxarakïna.

← Chapter 42 Chapter 44 →