Genesis 45

aymara-1997

1Joseax janiw juk'ampi chuymapan imt'irjamäkxänti, ukat taqi luqtirinakapar jach'at säna: “¡Taqin akat mistupxam!” sasa. Ukhamasti janiw mayni luqtiripas ukankxänti, Joseax jilanakapamp uñt'ayaskän ukkhaxa.

2Ukatsti Joseax wali jach'at jachäna, taqi egipcio jaqinakaw ukxa yatipxarakïna, uka arusti faraonan jach'a utapkamarakiw purïna.

3Joseasti jilanakaparux akham säna: —Nayax Joseätwa. ¿Awkixax jakaskiti? —sasa. Jupanakasti Josean nayraqatapan jikxatasisax wali mulljataw uñjasipxäna, janirakiw kunsa ukxarux arsurjamäpkänti.

4Ukampis Joseax saskakïnwa: —Jutapxam, jak'achasinipxam —sasa. Jupanakasti jak'achasipxänwa, ukat Joseax säna: —Nayax José jilamätwa, khitirutix jumanakax egipcionakar aljapkäyäta ukätwa;

5ukampis jichhax jan llakisipxamti, janirak jumanakpachas nayar aljapxatamat juchañchasipxamti, Diosaw jumanakat nayra khithanitu, jakañanak qhispiyañaxataki.

6Mach'an qalltatapax pä maräxiwa, ukatsti phisqa marampïskaniwa, uka maranakansti janipuniw kuna juyra apthapiñas utjkaniti, yapuchatäskchini ukasa.

7Ukampisa Diosaw jumanakan nayrama khithanitu, ukhamat wawanakaman jan jiwarañapataki, ukatsti jumanakan jakañanakam mä jach'a luräwi tuqi jakapxañamataki.

8Ukhamasti Diosaw aka chiqarux khithanitu, janiw jumanakati khithanipkista, juparakiw faraonan amuyt'ayiripat uskutu, jach'a utapansa mä jach'a jilïrita, ukhamarak Egipto markan apnaqiripatsa utt'ayitu.

9Jichhax jank'aki awkixan ukar sarapxam, ukatsti sapxarakim: “José wawamax akham siwa: ‘Diosaw nayarux aka Egipto markan mä jach'a jilïrit utt'ayitu, jichhax jank'akiy nayamp jikisiri jutam.

10Gosen uraqin jakäta, wawanakamampi, allchhinakamampi, taqi uywanakamampi, ukhamarak taqi kunatix utjktam ukanakampi. Ukhamat naya jak'ankaskapunïta.

11Nayaw manq'añ akan churapxäma, jumarusa, wila masimarusa, taqi khitinakatix jumampi chikäki ukanakarusa, ukhamat jumanakar jan kunas pist'añapataki; mach'ax phisqa marampïskaniwa’ ” sasa.

12Jumanakampi, Benjamín jilaxampiw uñjapxtaxa naya pachpa uka arunaka awkixar iwxataxa.

13Awkixarusti taqi kuntix uñjapkta ukanak yatiyapxam, ukhamarak kunja jach'a jilïrïktix Egipto markan ukanakatsa. ¡Jichhax jank'akiy awkixar irptanirapipxita! —sasa.

14Joseasti Benjamín jilaparu qhumantasin jachäna. Benjaminasti Josear qhumantasisaw jacharakïna.

15Ukxarusti Joseax taqi jilanakaparuw jamp'att'äna, jacht'asisaw taqpachanir qhumantarakïna. Uka qhipat jilanakapax jupar parlxayapxäna.

16Faraonan jach'a utapansti Josean jilanakapan purinitapaw yatisïna, faraonasti jilïr jaqinakapamp chikaw wal kusisïna.

17Ukat faraonax Josear akham sarakïna: —Jilanakamax uywanakapar khumxatawayasin Canaán uraqir kuttapxpan sama,

18ukatsti awkiparu, taqi wila masinakaparu nayan ukar irptanxapxpan. Nayaw jupanakarux Egipto uraqin kawkïritix sumäki uka uraqi churä, ukatsti aka markan kunatix sumäki uk manq'apxani.

19Egiptot carretanak apayam, jupanakax warminakaparu, wawanakaparu, jumanakan awkimarus aptanxañapataki.

20Jutxapxpan, janiraki kunatix jichhax jupanakan utjki ukatsa llakisipxpati, Egipto markansti jupanakatakix taqi kunaw utjaskani —sasa.

21Israelan wawanakapasti ukhampun lurapxäna. Joseasti faraonax apayam siskäna uka carretanak apxaruyäna, thakhitakisti manq'a apayarakïna;

22sapa mayniruw machaq isinak churäna, ukampis Benjaminarux kimsa pataka qullqimpi, phisqa machaq suma isimpi churarakïna.

23Awkiparusti kunanakatix Egipton sumanak utjkäna ukanak tunka asnor khumxatat apayäna, ukatsti yaqha tunka asnonakasti trigompi, t'ant'ampi, manq'ampi khumupxarakïna, awkipan thakhin manq'asiñapataki.

24Joseasti jilanakapar khithanukusinxa, sänwa: —Jichhax janiw thakhin jumanakkam ch'axwasipkätati —sasa. Jupanakasti sarxapxänwa.

25Egiptot mistuwayasinsti Canaán uraqiruw purxapxäna, kawkhantix Jacob awkipax jakkäna ukaru.

26Kunapachatix jupanakax awkiparu Josean jakaskatapa, Egipto markan jach'a jilïri apnaqirïtapa yatiyapxän ukkhaxa, janiw jupax kunsa arsurjamäkänti, janirakiw kuntix yuqanakapax siskäna uka arunakarus iyawsirjamäkänti.

27Ukampisa kunapachatix jupanakax Josean iwxanakapa yatiyapkäna, ukhamarak Joseax apaykatayna uka carretanak uñjkäna ukkhasti, walpun Jacobux kusisïna.

28Ukat sarakïna: “¡Walikiw nayatakix José wawaxan jakaskatap yatiñaxa, ukhamax janïra jiwkasin jupar uñjir sarä!” sasa.

← Chapter 44 Chapter 46 →