Genesis 29

aymara-1997

1Jacobux thakhinjam saraskakïnwa, ukatsti inti jalsu tuqinkir jaqinakan uraqiparuw sarxäna.

2Purisasti, uka pampan mä uma phuch'u uñjäna, uka phuch'u jak'ansti kimsa tama ovejanakaw ananukutäskäna. Uywanakasti uka phuch'ut umapxirïna. Uka phuch'usti mä jach'a qalampi atxatatänwa,

3kunapachatix taqpach awatirinakax oveja tamanakap ukawjar anakinipkäna, ukkhakiw jupanakax uka qala atiqasin ovejanakapar umart'ayapxirïna, ukatsti wasitat phuch'ur qalamp atxatapxirïna.

4Jacobusti awatirinakaruw jiskt'äna: —Jilatanaka, ¿kawkinkirïpxtasa? —sasa. Awatirinakasti ukxaruw sapxäna: —Nanakax Harán markankirïpxtwa —sasa.

5Jacobusti jiskt'askakïnwa: —¿Jumanakax Nahor chachan Labán yuqapar uñt'apxtati? —sasa. —¡Jïsa, uñt'apxtwa! —sasaw awatirinakax sapxäna.

6—¿Jupax walikïskiti? —sasaw Jacobux jiskt'askakïna. Awatirinakasti sarakïnwa: —Jïsa, Labanax walikïskiwa. Uñtam, akaxay Raquel phuchhapax ovejanak anakisinki —sasa.

7Ukat Jacobux sarakïna: —Urüskiwa, ukhamarus ovejanak uyur anantañax janïräkiwa, uma umart'ayasin awatisipkakim —sasa.

8Ukampis awatirinakax ukxaruw sapxäna: —Janïraw uma churapkiristti, oveja tamanakan taqpach akankañap suyapxirïta, ukat qala atiqasin ovejanakar umart'ayasipkirïta —sasa.

9Jacobun jupanakampi parlañkamasti, Raquelax awkipan ovejanakapas ant'ataw purinïna, jupaw uka ovejanak awatirïna.

10Jacobusti Raquelar Labán tiopan ovejanakap ant'at purinir uñjasaxa, jank'akiw phuch'ut qala atiqäna, ukat ovejanakar uma umart'ayarakïna;

11ukatsti Raquelarux jamp'att'asaw aruntäna, ukat jachatatäna.

12Kunapachatix Jacobux Raquelar yatiykäna Rebecan yuqapätapa, Labanan sobrinopätapa ukkhasti, Raquelax jank'akiw awkipar yatiyir jaläna.

13Labanasti, kullakapan Jacob yuqapat parlir ist'asinxa, katuqiriw jalsuwayäna, jamp'att'asaw qhumantarakïna, ukatsti utaparuw irpäna. Jacobusti taqi kunatix luraskatayna ukanak yatiyäna.

14Labanasti sarakïnwa: “Chiqpachapuniw jumax nayan wila masixätaxa” sasa. Jacobun Labanan utapankatapax mä phaxsïxänwa,

15Labanasti Jacoburuw säna: —Janiw jumax nayatak wila masixätamat inak irnaqkasmati. Sita, qawqha qullqsa irnaqatamat munta —sasa.

16Labanax pä phuchhanïnwa. Jilïrix Lía sata, sullkasti Raquel sataraki.

17Lía tawaqux wali suma nayranakanïnwa, ukampis Raquelax suma uñnaqt'ani, jiwa tawaqukïnwa.

18Jacobusti Raquelaruw munasïna, ukat Labanarux säna: —Sullka phuchhamampiw jaqichasiñ munta. Iyawsität ukasti, paqallq maraw jumatak irnaqarapïma —sasa.

19Labanasti sarakïnwa: —Walikiwa, jan uñt'at jaqimp jaqichaskpachaxa, jumamp jaqichasiñapax askïniwa. Ukhamax nayampi chika qhiparam —sasa.

20Ukhamaw Jacobux Raquel layku, paqallqu mara irnaqäna, Raquelar sinti munatapata, jupatakix juk'a maranakjamäkchïn ukasa.

21Paqallqu mara phuqhasxipansti, Jacobux Labanaruw säna: —Jichhax jaqichasxañataki phuchham churxita, qawqha mara irnaqañtix nayax arskta ukax phuqhasxiwa —sasa.

22Labanasti phuchhapa jaqichañatakix mä jach'a phunchhäwi luräna, ukarusti uka chiqankir taqpach jaqinakaruw jawst'ayasirakïna.

23Arum tuqirusti, Labanax jilïr Lía phuchhapak Jacoburux irpkatxäna, Jacobusti uka arumax Liampikiw ikxäna.

24Ukhamarus Labanax mayni uywataparuw Lía phuchhapar yanapañapatak churäna, jupasti Zilpá satänwa.

25Qhipärmanthikiw Jacobux Liampi ikitap amuyasïna, ukat Labanar säna: —¿Kuns lurista? ¡Nayax Raquelampi jaqichasiñatakiw irnaqarapsma! ¿Kunatarak sallqjistasti? —sasa.

26Labanasti sarakïnwa: —Aka markan saraparjamax janiw sullka phuchhax jilïr phuchhat nayra jaqichaskaspati.

27Lian jaqichasïwip urunak phuqham, ukat Raquelarux churäma, jumatix nayataki yaqha paqallqu marampi irnaqañataki arsurakïta ukapacha —sasa.

28Jacobusti iyawsänwa, ukatsti paqallq urut jupax Raquelampi jaqichasxäna.

29Labanasti Raquelarux uywatanakapat mayniruw yanapañapatak churarakïna, jupax Bilhá satänwa.

30Jacobusti Raquelampi mayachasxasax walpun jupar munasïna, Liat sipana, paqallq maras Labanatak irnaqañapäkchïna ukasa.

31Diosasti Jacobun Lía warmipar jisk'achatap uñjäna, ukat Lía warmirux wawa apayanïna, ukampis Raquelarux janiw wawa apayankänti.

32Liasti usur jaqiptasin mä yuqall wawa wawachasïna, juparusti Rubén sutimpiw uchäna, sarakïnwa: “Tatitux llakisitax uñjitu. Jichhasti chachaxax munasxitaniwa” sasa.

33Uka qhipatsti Liax yaqha wawa wawachasirakïna, uka wawarusti Simeón sutimpiw uchäna, sarakïnwa: “Tatit Diosax nayar jisk'achapkitu uk ist'äna, ukat jichhax mä wawamp apayanitu” sasa.

34Liasti kimsïr kutimpiw usur jaqiptäna, ukatsti yaqha wawampi wawachasirakïna, juparusti Leví sutimpiw uchäna, sarakïnwa: “Jichhakuchaw chachaxax nayar munasxitani, kimsa wawa jupatak wawachasxataxata” sasa.

35Uka qhipatsa Liax yaqha wawamp wawachasirakïna, juparusti Judá sutimpiw uchäna, sarakïnwa: “Jichhax Tatituruw yupaychä” sasa. Ukatsti janiw juk'amp wawanïkxänti.

← Chapter 28 Chapter 30 →