Genesis 28

aymara-1997

1Ukatsti Isaacax Jacoburuw jawsayanïna, juparusti aski waxt'äwinak churasin sarakïna: “Aka Canaán uraqinkir warminakampix janipun jaqichasimti.

2Padán-aram uraqir sarxam, Betuel achachilaman utaparu, ukansti Labán tioman mayni phuchhapamp jaqichasim.

3Taqi ch'aman Tatit Diosaw jumar aski waxt'äwi churätam, walja wawanak jumar churarakïtam, ukhamat jumat walja markanak uñstañapataki.

4Tatituy kuntix Abraham awkisaru arsuwaykän uka aski waxt'äwinaksa jumampiru, wawanakamampir churpan. Ukhamat kawkhantix jichhax jaya jaqjam jakasktan uka uraqi katusipxañamataki, Dios kipkaw ukxa Abrahamar arsuwayi” sasa.

5Ukhamasti Isaacax Jacob yuqapar Padán-aram chiqaruw khitxäna. Jacobusti Labanan utaparuw purïna, jupasti Betuel sata arameo jaqin yuqapänwa, Rebecan jilapa, jupasti Jacobumpina, Esaumpin taykaparakïnwa.

6Esaú chachasti, kunjämtix Isaac awkipax Jacobur aski waxt'äwip churkäna uk uñjatayna, ukhamarak Padán-aram uraqin jaqichasiñapatak khitxatap uñjäna. Jupasti sum amuyäna, kunapachatix Jacob awkipax aski waxt'äwip churkäna ukkhax janipun uka Canaán uraqinkir warminakamp jaqichasiñapa iwxt'atapa,

7ukat Jacobun Padán-aram chiqar sarxatapa, kunjämatix awkipasa, taykapasa jupar sapkatayna ukhama.

8Ukhamat Esaux amuyasirakïna, awkipatakix Canaán uraqinkir warminakan jan walïtapa.

9Ukat jupax Ismaelan ukar saräna, uka Ismaelasti Abrahaman yuqapänwa, ukatsti Mahalat phuchhapampiw jaqichasïna, Nebaiot chachan kullakapampi, cananea warminakanïkasinsa.

10Jacobux Beerseba chiqat mistuwayasin Harán chiqar sarkis uka thakhinjam sarxäna.

11Mä chiqar purisinsti, ch'amakthapxipan uka arumax uka chiqar ikt'iriw qhipart'äna. Mä qala ch'ijmacht'asisin uka chiqan ikt'äna.

12Uka arumasti mä samka samkasïna, uka samkansti mä escalera uñjäna, uraqit alaxpachkam makhataskiri, ukanjamsti Diosan angelanakapaw makhatasipkäna, saraqasinipkarakïna.

13Ukhamarus Tatituruw jupa jak'an sayt'atäskir uñjäna, akham jupar sarakïna: “Nayätwa Tatit Diosaxa, Abraham achachilaman Diosapa, Isaac awkiman Diosapaxa. Jumampiru, wawanakamampiruw kawkhantix ikt'atäkta uka uraqi churapxäma.

14Jumat saraqir wawanakamasti uraq laq'ar uñtata sinti waljapunïniwa, jupanakasti amstaru, aynacharu, inti jalanta tuqiru, inti jalsu tuqiruw saratatani, uka uraqin utjir wila masinakasti juma tuqiwa, wawanakam tuqirakiw aski waxt'äwinak katuqani.

15Nayaw jumampïskta; kawkirutix sarkäta ukan imaskapunïmawa, ukatsti aka pachpa uraqiruw kuttayanxäma. Arsutaxar phuqhañkamax janipuniw antutkämati” sasa.

16Samkat sartxasinsti, Jacobux wali mulljataw sarakïna: “Chiqpachapuniw Tatitux akawjankaski, janiw nayax uk yatkayätti” sasa.

17Jupasti wal axsaräna, sarakïnwa: “Aka chiqax wali axsarkayawa. Akawjax Diosan utapawa; ¡alaxpach punkurakiwa!” sasa.

18Qhipärmanthisti, Jacobux wali willjtaw sartasïna, ukatsti ch'ijmt'askatayna uka qalxa mä pilaräkaspas ukham sayt'ayäna, ukatsti aceitempi warxatasin Tatitur luqtäna.

19Uka chiqansti nayrax mä markaw utjatayna, uka markasti “Qhana” satänwa, ukampis Jacobux Betel sasaw uka markar sutichäna, ukasti ‘Tatit Diosan utapa’ sañ muni.

20Uka qhipatsti Jacobux aka arunak arsüna: “Diosatix nayampïni, aka saräwinsa yanaparakitani, manq'añsa, isisiñsa churitani,

21awkixan utaparus sumakirak kuttayxitani ukapachax, chiqpachansa Tatitux Diosaxäniwa.

22Aka qala mä pilarar uñtata akawjar sayt'ayataxasti, Diosan utapäniwa. Dios Tatay, taqi kunanaktix churkitäta ukatxa, sapa tunkat maya churapunïmawa” sasa.

← Chapter 27 Chapter 29 →