Genesis 20

aymara-1997

1Abraham chachax kawkhankkäntix ukkhat mistuwayasin Négueb tuqiruw sarxäna, ukat Guerar markan jakxarakïna, uka markasti Cadés, Sur markanak taypinkiwa.

2Uka markan jakkasinsti, Abrahamax Sara warmipatxa jupax “kullakaxaw” sakïnwa. Ukat Guerar markan Abimélec reyipax Sara warmir warmipäñapatak irptayanïna;

3mä arumasti, Abimélec reyirux Diosaw mä samkan uñstäna, juparusti sarakïnwa: “Jichhax jiwätawa, kawkïr warmtix irptayasinkta ukax chachan warmiwa” sasa.

4Ukampisa, Abimélec reyix janiw uka warmir llamkt'kataynati, ukat jupax sarakïna: “Tatay, ¿jan kuna ñanqha lurir jaqirusti jiwayasmati?

5Abraham kipkaw nayarux situ, ‘kullakaxawa’ sasa, jupasa Abrahamax ‘jilaxawa’ sarakiwa. Ukhamasti nayax taqi kunsa walik luraskta, janirakiw kuna jan wali amtañampis lurkti” sasa.

6Diosasti uka samkan sarakïna: “Nayax taqi kunsa mä suma chuymampi luraskatam yatta, ukat uka warmirux jan llamkt'ayksmati, ukhamat nayatak jan juchachasiskañamataki.

7Jichhasti, uka warmir chachapar irpxaruyxam. Jupax profetawa, juman jakañamatakis mayirapïtamwa. Janitix warmipar irpxaruykäta ukaxa, jumasa, wila masinakamas jiwarapxätawa” sasa.

8Qhipärmanthi willjtasti, Abimélec reyix sartasisin uywatanakapar jawsäna, ukatsti kuntix samkaskatayna ukanak yatiyäna. Uywatanakapasti uk ist'asin wal axsarayasipxäna.

9Ukatsti Abimélec reyix Abrahamaruw jawsäna, ukat juparux sarakïna: —¿Kunatsa ukham lurapxista? ¿Kuna jan walsa jumar lursma, ukhamat nayxaru, jaqinakaxxaru mä jach'a juchañchäwi apaniñamatakisti? Ukham lurañax janiw wakiskiti.

10¿Kunatsa ukham lurta? ¿Kuns lup'iskäyäta? —sasa.

11Abrahamasti sarakïnwa: —Nayax aka chiqankir jaqinakan Diosar jan axsarirïpxatap amuyäyäta, inas ukata warmix apaqañ layku nayax jiwayatïrista uka.

12Jupax kullakaxäskapuniwa, awkixan phuchhapawa, janis taykaxan phuchhapäkchi ukasa; ukatpï nayax jupampix jaqichasïyätxa.

13Kunapachatix Diosax awkixan utapat irpsunkitu ukkhaxa, nayax juparux sistwa, kawkharutix purkañäni ukanxa, nayatxa “jilaxawa” sañapapuni —sasa.

14Abimélec reyisti, Abrahamarux Sara warmip irpxaruyxäna. Ukhamarus ovejanaka, vacanak churawayxäna, ukhamarak chacha, warmi uywatanaka irpxaruyarakïna,

15Abrahamarusti sarakïnwa: —Uñjam akaw markaxaxa, kawkhantix jakasiñ munkta uka chiq ajllisim —sasa.

16Sararusti sarakïnwa: —Jilamarux waranqa qullqi katuyaskta, ukasti khitinakatix jumampïki ukanak nayraqatan sumat uñt'atäñamatakïniwa. Janiw khitis jumat kuna jan walsa arsuñapäkiti —sasa.

17Ukatsti Abrahamax Diosaruw mayïna, Diosasti Abimélec reyimpiru, warmipampiruw k'umarachxäna. Jupan uywat warminakarus wawanïpxañapatakiw k'umarachxarakïna,

18Sara warmi laykuw Tatitux Abimélec reyin utapankir warminakan jan wawanïpxañapatak arsutayna.

← Chapter 19 Chapter 21 →