Genesis 19

aymara-1997

1Kunapachatix uka pä angelax Sodoma markaru puripkän ukapachax niya ch'amakthapxänwa, Lot chachasti markar mantañ punkun qunt'atäskänwa, kawkhantix jaqinakax tantachasipxirïkäna ukkhana. Uka pani angelar uñjasasti katuqañatakiw sayt'asïna, ukatsti killt'asisaw p'iqip uraqir puriyañkam alt'asïna,

2ukat jupanakarux sarakïna: —Tatanaka, achikt'asipxsmawa, jichhärmax nayan utaxanay qurpacht'asipxam. Ukan kayunakam jariqt'asipxäta, ukatsti arumanthiw wali willjtat sarxapxäta —sasa. Ukampis jupanakax sapxänwa: —Walikïskaniwa, nanakax jichhärmax anqak ikt'awayapxä —sasa.

3Ukampis Lot chachax utapan qurpachasipxañapatakix saskakïnwa, ukat jupanakax iyawsas jupamp chik utapar sarapxäna. Puripxän ukkhasti, Lot chachax mä suma manq'ampi, jan levaduran t'ant'anakamp wakicht'arapïna, utar sart'ir uka angelanakasti manq'asipxarakïnwa.

4Ukampisa janïr ikintapkipan Sodoma markankir taqi jaqinakax Lot chachan utapar muyuntapxäna, wayna jaqinakat qalltasin chuyman jaqinakkama,

5ukatsti Lot chacharuw arnaqapxäna: —¿Kawkinkapxis jichhärma utamar purinipki uka jaqinakaxa? ¡Irpsunim! ¡Jupanakampiw ikintañ munapxta! —sasa.

6Lot chachasti jupanakamp parliriw mistunïna, punku wali sum jist'katasaw

7jupanakarux sarakïna: —Munat jilatanaka, achikt'asipxsmawa, janikiy uka jan walinak lurapxamti.

8Nayan pä phuchhaxaw utjaski, jupanakasti janïraw chacha uñt'apkiti; jupanakaruw irpsunï, jumanakasti kuntix munapkta uk jupanakamp lurapxarakisma, ukampis aka chachanakarux janipun kuna ñanqhanaksa lurapxamti, jupanakax nayan utaxar qurpachañatak jawsatanakawa —sasa.

9Ukampis jupanakax sasipkakïnwa: —¡Sartam ukkhata! ¿Khitïtas jumax kuntix lurapxañaxäki uk sañatakixa? ¡Jumax yaqha markat jutir jaqikïtawa! ¡Jichhasti jumarux uka jaqinakat sipansa juk'ampi jan walinak lurapxäma! —sasa. Ukatsti Lot chacharux nuwjañ qalltapxäna, punku t'unsuñatakiw jak'achasipxarakïna,

10ukampis Lot chachar sart'ir angelanakax juparux waythapisin uta manqharuw wayuntxapxäna; punksti mäkiw jist'katapxäna.

11Ukatsti anqankir jaqinakarux utar jan mantapxañapatakix juykhuptayapxänwa. Jupanakasti punku thaqkäwiw qarirapxäna.

12Ukatsti uka pä angelax Lot chacharuw sapxarakïna: —¿Aka markan yaqha wila masinakamax utjtamti? Yuqanakamampi, phuchhanakamampi, tullqanakamampir irpxarusiwayxam, ukhamarak taqi kunatix aka markan utjktam ukanaksa apasxam, ukatsti akat jayar sarxapxam,

13aka marksti t'unjapxäwa. Jaqinakan jucha luratanakapax sintipunïxiwa, ukat Tatitux aka markar t'unjir khithanipxitu —sasa.

14Lot chachasti tullqanakapan ukaruw saräna, jupanakasti phuchhanakapampi jaqichasiñatak parlatäpxänwa, ukat jupanakarux sarakïna: —¡Sarxarupxam, aka markat jayar sarxapxam, Tatituw aka marka t'unjani! —sasa. Ukampisa tullqanakapax janiw Lot chachan aruparux yäqapkänti.

15Willjtanxipansti, uka angelanakax Lot chacharuw sapxäna: —¡Jank'ak sartasim! Ukatsti warmimampiru, pä phuchhamampir irpxarusiwayas sarxam. Jan ukasti, aka markamp chika t'unjataw uñjasipxäta —sasa.

16Ukampisa Lot chachax janiw jank'achaskänti, ukat angelanakax juparusa, warmiparusa, pä phuchhaparusa amparat katxarusaw markat waysuwayapxäna. Tatitun khuyapayasiñap laykuw ukham qhispit uñjasipxäna.

17Kunapachatix marka anqäxankxapxän ukkhasti, maynïr angelaw säna: —¡Jiwañ jan munapksta ukax jaltapxam! Janipun qhiparux uñtanipxamti, janirak qhirwa chiqa sarkasas sayt'apxamti. Qhispitäñ munapxsta ukaxa, qullunakar jaltxapxam —sasa.

18Ukampis Lot chachax jupanakarux sänwa: —¡Tatanaka, janiw wakiskaspati!

19Jumanakax taqi kunan yanapt'apxista, nayatakisti sinti suma jaqinakäpxtawa, jakañaxsa qhispiyapxistawa, ukampis janiw nayax qullunakar sarkiristti, t'unjäwisti thakhin katjarakitaspawa, ukatsti nayax jiwiristwa.

20Aka jak'an mä jisk'a markaw utji, ukaruw jaltxirista. ¡Ukar jaltxam sapxita jakañax qhispiyasiñataki! ¡Chiqpachansa uka markax mä jisk'a markakiwa! —sasa.

21Ukatsti uka angelanakat maynïrix sänwa: —Walikiwa, mayitamarux jaysämawa. Kawkïr markattix parlkista uksti janiw t'unjkäti,

22mäpitay uka markar jaltxam, uka markar puriñamkamasti, janiw kuns lurkäti —sasa. Ukat uka markax Sóar sas sutichata, ukasti “jisk'a marka sañ muni”.

23Kunapachatix qhanjtankäna, Lot chachas Sóar markar purkxän ukkhaxa,

24Tatitux Sodoma, Gomorra markanakxarux aqkir azufrempiw jallur uñtat purintayäna;

25ukatsti taqi khitinakatix uka markanakan jakapkäna jupanakampiru, ukhamarak taqi kunatix uka qhirwan jilkäna ukanakampirus q'al tukjäna.

26Ukampisa Lot chachan warmipax qhipapat jutaskäna, jupasti qhipäx uñtäna, ukatsti uka pachparuw jayu qalar tuküna.

27Qhipärmanthisti, Abrahamax willjtaw sartasïna, ukatsti kawkhantix Tatitumpi parlkatayna ukkharuw saräna;

28ukatsti Sodoma, Gomorra markanak uñtäna, ukhamarak taqi uka qhirwa tuqinak uñtarakïna, uksa tuqit walt'at jiwq'i makhatir uñjäna, mä jach'a hornotsa nina jiwq'ix mistkaspa ukhama.

29Ukham Diosax qhirwa tuqinkir markanak t'unjäna, kawkhantix Lot chachax jakkäna uka markanaka, ukampis Abrahamat amtasisin Lot chacharux uka chiqat irpsuwayxarakïna.

30Uka qhipatsti Lot chachax Sóar markan qhiparañ axsarayasxänwa, ukatsti pä phuchhap irpxarusiwayasin qullu tuqir sarxäna, ukan kimsanpacha mä putun jakapxäna.

31Mä urusti jilïr phuchhax sullkaparuw säna: —Awkisax chuymanïxiwa, janirakiw aksa tuqinakan mä chachas jiwasamp jaqichasiñatak utjkiti, kunjämatix wakiski ukhama;

32ukhamasti awkisar machjayañäni, ukat jupampiw ikintasiñäni, ukhamat jupatak wawanïñasataki —sasa.

33Ukatsti arumpachaw awkiparux vinompi machjayapxäna, ukat jilïr phuchhax jupampi ikintäna; ukampis awkipax janiw amuyaskänti, kunapacha jupamp ikintatapsa, sartxatapsa.

34Qhipürusti, jilïr phuchhax sullkaparux sarakïnwa: —Wasayp'ux nayax awkisampiw ikintta, jichhärmax machjayarakikiñäni, ukatsti jupampiw jumax ikintarakïta; ukhamat panpachaniw jupatak wawanïñäni —sasa.

35Uka arumasti wasitat awkiparux vinomp machjayapxäna, sullka phuchhasti awkipampiw ikintarakïna; ukampis janirakikiw Lot chachax amuyaskänti, kunapacha phuchhapan jupamp ikintatapsa, sartxatapsa.

36Ukhamaw Lot chachan phuchhanakapax awkipatak usur jaqiptapxäna.

37Jilïr phuchhasti mä yuqall wawa wawachasïna, juparusti Moab sutimpiw uchäna, jupasti moabitanakan awkipawa.

38Sullka phuchhasti mä yuqall wawa wawachasirakïna, juparusti Ben-amí sutimpiw uchäna, jupasti amonitanakan awkiparakiwa.

← Chapter 18 Chapter 20 →