Genesis 13

aymara-1997

1Kunapachatix Abram chachax Egiptot warmipampi, taqi yänakapampi mistuwayxän ukkhaxa, Négueb tuqiruw kuttanxäna. Lot sobrinopasti jupanak chikarakiw saräna.

2Abram chachax wali qamirïnwa, quri, qullqi, ukhamarak walja uywanakaw jupan utjäna.

3Négueb tuqitsti juk'at juk'at kuttanxäna, Betel markar puriniñkama, ukatsti kawkharutix nayraqatax utjnuqtkatayna uka chiqaruw kuttxäna, Betel, Ai sata markanak taypiru.

4Uka chiqan nayrax Tatitur yupaychañatak mä altar luratayna, ukan Tatitur yupaycharakïna.

5Lot sobrinopasti, Abram tiopjam wali qamirirakïnwa, ovejanakani, vacanakani, jaqinakapas jupamp chikaw chhujllanakan jakapxarakïna;

6ukampis kawkhankapkäntix uka chiqax ukataq walja uywanakatakix jisk'akïnwa. Janiw panpachanix jakirjamäpkänti,

7Abram chachan uywap awatirinakasti, Lot sobrinopan awatirinakapampiw jan walt'ayasipkänti. Ukhamarus uka urunakan cananeo, ferezeo jaqinakaw uksa tuqinakan jakasipkäna.

8Ukhamasti Abram chachax mä urux Lot sobrinoparuw säna: “Jumampi nayampix wila masïtanwa, ukhamasti janiw walïkiti jiwas taypin jan walt'añanakan utjañapaxa, janirakiw awatirinakasas ch'axwapxañapäkiti.

9Uraqix ajllisiñamatakiw utjaski. Jumasti nayat saraqxitaya. Jumatix amsta tuqir sarxätaxa, nayax aynach tuqiruw sarxä; jumatix aynach tuqir sarxätaxa, nayax amsta tuqiruw sarxarakï” sasa.

10Lot chachasti Jordán jawir tuqinkir qhirwa, Sóar sata uka markakamaw uñatatäna, uka qhirwasti wali umanïnwa, mä panqar uyur uñtatänwa. Egipto uraqjamänwa. (Uka uraqisti Tatitux Sodoma, Gomorra sat markanak janïra t'unjkän ukhamänwa).

11Lot chachasti taqi uka Jordán tuqinkir qhirwa uraqinak ajllisïna, ukatsti kawkhankapkäntix ukawjat inti jalsu tuqiruw sarawayxäna. Ukham Abram chachampi Lot sobrinopampix jaljtxapxäna.

12Abram chachax Canaán uraqiruw qhiparxäna, Lot chachasti qhirwa tuqinkir markanakar jakiriw sarxarakïna, Sodoma marka jak'aru,

13kawkhantix jaqinakax jan walïpkäna, Tatit nayraqatansti sinti jach'a juchanak lurapkarakïna ukaru.

14Lot chachan sarxatapatsti, Tatitux Abram chacharux sänwa: “Kawkhankktatix ukkhata, amstaru, aynacharu, inti jalsu tuqiru, inti jalanta tuqir wal uñatatam;

15uñjktas uka uraq nayaw jumar churäma, wiñayatakiw jumankani, wawanakamankarakini.

16Nayaw jupanakarux waljanir tukuyä, uraq laq'ar uñtata. Kunjämatix laq'ax jan jakt'kayäkixa, ukhamarakiw wawanakamax jan jakt'kayäni.

17¡Sartasim, ukatsti uksaru aksaru uñatatas saram, nayaw jumar aka uraq churäma!” sasa.

18Ukhamasti Abram chachax chhujllap apthapisiwayasax Hebrón markar jakiriw sarxäna, Mamré sat ch'umi jak'aru. Ukan Tatitun sutip jach'añchañatak mä altar sayt'ayäna.

← Chapter 12 Chapter 14 →