Genesis 12

aymara-1997

1Mä urusti Tatitux Abram chacharux akham sänwa: “Uraqima, wila masinakama, awkiman utapsa apanukuwayxam, kawkïr uraqtix nayax uñacht'aykäm ukar sarxañamataki.

2Wawanakamampisti mä jach'a marka tukuyäma, aski waxt'äwinakampiw phuqt'äma, sutimsa jach'aruw aptarakï, mayninakatakisti askirakïniwa.

3Jumar jach'añchirinakarux, jach'añcharakïwa, jumar ñanqhachirinakarusti, ñanqhacharakïwa; juma tuqiw aka uraqin utjir wila masinakax jach'añchat uñjasipxani” sasa.

4Abram chachasti Tatitux siskatayna ukhamarjamaw Harán uraqit mistuwayxäna. Uka uraqit Canaán uraqir sarxañataki mistuwaykän ukkhasti, jupax paqallq tunka phisqan maranïnwa.

5Jupampi chiksti, Sarai warmiparu, Lot sobrinoparu, qawqha jaqinaktix Harán chiqan jikxatkatayna taqi jupanakaruw irpxäna, yänakapsa taqi apasxäna. Kunapachatix Canaán uraqir puripkän ukkhasti,

6Abram chachax taqi uksa uraqinak sarakipawayaskakïnwa, Siquem sat chiqar puriñkama, kawkhankkäntix encina qullan quqax Moré sat chiqana. Ukapachasti cananeo jaqinakaw uka uraqinakan jakapxäna.

7Ukawjan Tatit Diosax Abramar uñstäna, ukatsti sarakïnwa: “Jumat saraqir wawanakamaruw aka uraq churä” sasa. Ukatsti Abram chachax mä altar uka chiqan wakichäna, Tatitur jach'añchasa, jupar uñstatap layku.

8Ukatsti Betel markat inti jalsu tuqiruw sarxäna, kawksantix qullunakax utjkän uksaru, uka chiqan chhujllanakap sayt'ayäna. Betel markat inti jalanta tuqiru, Ai markat inti jalsu tuqiru. Uka chiqansti Abram chachax yaqha altar lurt'äna, ukansti Tatituruw art'asirakïna.

9Ukatsti juk'at juk'at Négueb wasara tuqirux saraskakïna.

10Uka urunakansti Canaán taqi uksa tuqinakan mä jach'a mach'aw utjäna, Abram chachasti uka chiqan jan kuna manq'añas utjatapatxa, Egipto markaruw mä qawqha pachatak jakir sarxäna.

11Egiptor puripkän ukkhasti, Abram chachax Sarai warmiparuw säna: “Nayax juman mä suma uñnaqt'an warmïtam yatta,

12egipcionakax uñjapkätam ukkhaxa, sapxaniwa: ‘Aka warmix uka jaqin warmipawa’ sasa. Ukatsti nayarux jiwayapxitaspawa, ukampis jumampïñ laykux janiw jumarux jiwayapkätamti.

13Uka layku, jiskt'apkätam ukkhaxa, ‘kullakapätwa’ samaya, ukhamat nayatakix taqi kunas walikïskani, jiwañatsa qhispïwa” sasa.

14Kunapachatix Abram chachax Egiptor purkän ukkhax, Egiptonkir jaqinakax Sarai warmirux wali suma uñnaqt'ani warmïtap uñjapxäna.

15Egiptonkir faraón reyin yanapirinakapas Sarai warmirux uñjapxarakïnwa, ukatsti uka warmin wali suma uñnaqt'anïtap yatiyiriw sarapxäna. Ukat faraonan utapar irpapxäna.

16Sarai laykusti faraonax Abram chacharux wali sum uñjäna. Ukatsti ovejanaka, vacanaka, asnonaka, luqtirinaka, camellonak kun juparux churarakïna.

17Ukampis Sarai warmi laykurakiw Tatitux faraonampiru, wila masinakapampirux jach'a t'aqhisiñanakamp mutuyäna.

18Ukat faraonax Abram chacharux jawsayanïna, ukatsti sarakïnwa: “¿Kunatsa ak lurista? ¿Kunatsa jan sista aka warmin juman warmimäskatapxa?

19Jumasti kullakaxaw sistawa, ukatsti nayax warmixäñapatakiw irpasiriskäyäta. ¡Akax, jichhax irpasxam! ¡Ukatsti sarxam!” sasa.

20Faraonasti jaqinakaparuw khithäna, Abram chachampiru, warmipampiru, taqi yänak utjiripampir khithanukuñapataki.

← Chapter 11 Chapter 13 →