Genesis 14

aymara-1997

1Uka urunakan Amrafel chachax Babilonia uraqin reyipänwa; Arioc chachasti Elasar uraqin reyipänwa; Quedorlaómer chachasti Elam uraqin reyipänwa; Tidal chachasti Goím uraqin reyiparakïnwa.

2Akanakasti nuwasisipkänwa, Sodoma markan Bera reyipampi, Gomorra markan Birsá reyipampi, Admá markan Sinab reyipampi, Seboím markan Seméber reyipampi, Bela markan reyipampi, kawkïri markatix Sóar satäkaraki taqi ukanakampi.

3Aka phisqa reyisti Sidim qhirwan ejercitonakap tantachapxäna, kawkhankkitix jichhax Mar Muerto sat qutax ukkhana.

4Quedorlaómer reyisti jupanakarux tunka payan maraw apnaqatayna, ukampisa tunka kimsan mara qhipatsti, uka phisqa reyix jupatak sayt'asiñ amtapxatayna.

5Qhipa marasti, Quedorlaómer reyimpi, jupampïpkän uka reyinakampix Astarot Carnaim tuqiruw sarapxäna, ukansti refaitanakaru, Ham sat uka chiqan zuzitanakar atipjapxäna; Savé-quiriataim chiqansti emitanakaruw atipjapxarakïna;

6Seír qullunak tuqinsti horeonakaruw atipjapxäna, ukatsti El-parán uraqkamaw arktapxäna, ukasti wasara tuqinkiwa.

7Kuttanxasin Quedorlaómer reyimpi, jupampïpkän ukanakasti, En-mispat chiqaruw puripxäna, kawkha chiqatix Cadés satäkäna ukaru. Ukansti amalecitanakan uraqip tuqin taqi kuntix thakhin jikxatapkän ukanak t'unjapxäna, uka kipkarakiw Hasesón-tamar sat uksa tuqin jakir amorreonakampix lurapxäna.

8Ukhamasti Sodoma, Gomorra, Admá, Seboím, Bela, tuqinkir reyinakax Seboím qhirwaruw sarapxäna. Ukan uka phisqa reyix, Quedorlaómer, Tidal, Amrafel, Arioc sutini pusi reyimpix nuwasipxäna, jupanakasti Elam, Goím, Babilonia, Elasar markanakan reyinakapänwa.

10Taqi uka Sidim qhirwa tuqinsti walja asfalto phuch'unakaw utjäna, kunapachatix Sodoma, Gomorra markan reyinakapax nuwasïwit jaltapkäna ukkhaxa, uka asfalto phuch'unakaruw jalantapxäna. Mayni reyinakasti qullunakaruw jaltxapxäna.

11Ukatsti uka pusi reyix, Sodoma markatxa, Gomorra markatsa taqi manq'añanaka, qamir yänakapsa q'al lunthatsuwayapxäna, ukat sarxapxäna.

12Abram chachan Lot sobrinopax Sodoma markan jakäna, juparus katuntat apasxapxarakïna, taqi utjir yänakapamp kuna.

13Ukampisa mä jaqiw uka nuwasïwit jaltanxatayna, Abramar taqi ukanak yatiyiri; Abram chachasti Mamré jaqin quqa ch'umipan jakasïna. Uka Mamré chachasti amorreo jaqïnwa; Escol, Aner chachanakan jilaparaki, jupanakasti Abram chachat arxatasipxarakïna.

14Kunapachatix Abram chachax sobrinopan katuntatätap yatïn ukkhasti, kawkïr uywatanakatix utapan yuripkatayna, nuwasiñatakis wakicht'atäpkarakïna ukanakaruw tantacht'äna, jupanakasti taqpachanix kimsa pataka tunka kimsaqallqunïpxänwa, ukatsti jupanakampiw uka pusi reyir arktäna, Dan markakama.

15Arumasti, Abram chachampi, jaqinakapampix akatjamat uka pusi reyirux jalxatapxäna, ukatsti Hobá markakamaw arktapxäna, ukasti Damasco markat amstäxankiwa,

16ukatsti taqi kuntix apapkatayna ukanak aparanipxäna. Ukhamat Abram chachax Lot sobrinoparux qhispiyanïna, ukatsti taqi kunatix sobrinopankki ukanak kuttayanxäna. Ukhamarak warminakarusa, yaqha jaqinakarus qhispiyanxäna.

17Kunapachatix Abram chachax Quedorlaómer, ukhamarak jupampïpkän uka reyinakar atipjasin kuttankän ukkhaxa, Sodoma markankir reyiw katuqir mistunïna, Savé reyin qhirwaparu.

18Salem markankir Melquisedec reyisti, khititix alaxpachankir Diosan sacerdotepäki ukax t'ant'ampi, vinompi apsunirakïna,

19Ukatsti Abram chacharuw aka arunakampi aski waxt'äwi churäna: “Alaxpachankir Diosaw aski waxt'äwinak churätam, jupasti alaxpacha, akapacha luririwa;

20Alaxpachankir Diosasti yupaychatäpan, jupaw uñisirinakamarux atipjaytam” sasa. Ukxarusti Abram chachax kuntix aparankän ukanakatxa, sapa tunkat maya Melquisedec reyir churäna.

21Ukatsti Sodoma markankir reyix Abram chacharux sarakïnwa: —Jaqinakax churxita, jumasti yänakampi qhiparaskam —sasa.

22Ukampis Abram chachax sarakïnwa: —Alaxpacha, akapach lurir jach'a Diosaruw juramentompi arsta,

23kunatix jumankki ukanakatxa, ch'ankhäpasa, jan ukax wiskhunakan chinuñapäpasa, janipuniw kunsa katuntaskäti, juman wiñay jan saskañamataki: “Nayaw Abrahamar qamiriptayta” sasa.

24Janiw nayax kunsa nayatak munkti, kuntix uywatanakaxax manq'antapki ukanakak katusï. Kawkïri jaqinakatix nayamp chika jutapkäna, Aner, Escol, Mamré ukanakasti, kunatix jupanakar wakt'ki ukxa katusxapxaniwa —sasa.

← Chapter 13 Chapter 15 →