Ezekiel 45

aymara-1997

1“Sapaqat ayllur uraqinak churañatak lakintapkät ukkhasti, mä uraqi jilt'ayapxäta, ukasti sayt'urux pä tupu chikanïñapawa, iramarusti pä tupuraki, uka uraqisti Tatitutak satäniwa. Taqi uka uraqisti qullan uraqirakïniwa.

2Uka uraqit Tatitun utap utachañatakix jilt'ayasini, ukasti pusi tuqir pä pataka phisqa tunkani metronïñapawa, uka uraqi muytarusti ch'usa uraqikiw puchuyasini, iranaru pä tunka phisqani metronïñapawa.

3Tatitutak yaqhachat uraqinsti, mä t'aqa uraqirakiw chimpt'atäni, ukasti sayt'urux pä tupu chikanïniwa, iramarusti mä tupunirakïniwa, uka uraqisti aski qullanapunïniwa; Tatitun utapax uka uraqinkaniwa.

4Uka uraqisti Tatitun utapan luqtirinaka, Tatitur luqtañatak jak'achasipki uka sacerdotenakatakïniwa. Uka uraqin jupanakax utachasipxani. Uka uraqisti qullanäniwa, Tatitun utapatak yaqhachatarakïniwa.

5Ukhamarus yaqha uraqiw utjarakini, ukasti sayt'urux pä tupu chikanïniwa, iramarusti mä tupuniraki, uka uraqisti Tatitun utapan yanapasiri levitanakatakïniwa, ukhamat kawkhan jakasiñasa jupanakataki utjañapataki.

6Marka lurañatakisti yaqha uraqiw yaqhachasini, ukasti sayt'urux pä tupu chikanïniwa, iramarusti chika tupurakïniwa, uka uraqisti qullan uraqi jak'ankaniwa, taqpach Israel markan uraqiparakïniwa.

7“Marka apnaqiritakisti uraqix yaqhachatarakïniwa. Mayax inti jalsu tuqinkaniwa, mayasti inti jalanta tuqinkarakiniwa, qullan uraqit purapäxana, marka lurañatak yaqhachata uraqi jak'ana. Inti jalsu tuqita inti jalanta tuqikamasti, qawqch'äkitix ayllunakar churata uraqix ukch'arakïniwa.

8Uka uraqisti Israel marka apnaqiritakïniwa; ukhamat markaxankirinakaru jan khitirus uraqip aparaskañapataki. Israelan sapa maya ayllunakapax uraqinïniwa.

9“Tatitux akham siwa: ¡Israel marka apnaqir jilïrinaka, ukkhakamaki! ¡Jan juk'ampi markaxar t'aqhisiykxapxamti, janirak inakis irnaqayaskxapxamti! ¡Taqi kunsa askiru, chiqapar lurapxam! ¡Jan juk'ampi markaxat uraqinakap lunthatkxapxamti! Naya, Tatituw uk mayipxsma.

10“Balanzanakamsa, tupunakamsa phuqhatpun apnaqapxam.

11Granonak tupuñatakisa, umanak tupuñatakis mayakïñapawa. Pä pataka pä tunkan litroni tupuw taqi kunatak apnaqasiñapa, ukasti tunkaru jan ukax patakaru jaljatarakïspawa.

12“Jathinak tupt'añatakisti, phisqa kiloni tupuw apnaqasini, ukasti phisqa tunkaru, jan ukax waranqaru jaljatarakïspawa.

13“Waxt'anakat imapkäta ukasti akhamäniwa: Trigo achu apthapitanakamata, cebada achu apthapitanakamatsa, suxta tunkaruw jaljapxäta, jaljasinsti waxt'äwitakix ukanakat maya luqtapxarakïta.

14Ukhamaraki, jikxatapkäta uka aceitsti patakaruw jaljapxäta, jaljasinsti waxt'äwitakix ukanakat maya luqtapxarakïta.

15Ovejanakatsti sapa pä patakat maya apaqapxäta, uka ovejasti suma lik'ïñapawa. Ukasti granonakamp chika waxt'a luqtañatakïniwa, nakt'at waxt'äwitaki, sumankthapiñ wilañcha luqtañatakirakïniwa, jucha luratat pampachatäñataki churaski uka. Naya, Tatituw uk sarakta.

16“Taqiniw aka markanxa uka waxt'anak Israel markan apnaqiripar churapxam satäpxi,

17marka apnaqir jilïriw wilañcha luqtañatak uka uywanak churani, ukhamarak granonakata, vinotsa qawqhatix wakiski waxt'a churañatakix uk churani, wawa phaxsix uñstankani ukapacha, samarañ sábado urunakana, Israelan taqi phunchhäwi urunakapan churani. Jupaw jucha luratanakatsa wilañchanak luqtani, granonakat waxt'äwinaka, nakt'ayat luqtäwinaka, sumankthapiñ wilañchanak luqtarakini, ukhamat Israel markan juchanakapan pampachatäñapataki.

18Tatitux akham siwa: “Nayrïr phaxsina, qallta urusti, jumanakax mä jan kuna kamacht'at urqu vaca wilañchat luqtapxarakïta, ukhamat Tatitun utap q'umachañataki.

19Sacerdotew uka uywan wilapat mä juk'a aptani, jucha luratat wilañcha luqtatäki uka uywata, ukatsti uka wilampix Tatitun utapan punkunakap jawintani, altaran pusi tuqiparusa, ukhamarak manqhankir uta anqäx punkunakaparusa.

20Uka pachparak lurasini, uka phaxsin paqallqu uru saraqataru, maynitix jan amuyaskasin kuna juchsa lurchi ukatakixa. Ukhamat Tatitun utapax q'umäxarakini.

21Nayrïr phaxsita, tunka pusin uru saraqatarusti, jumanakax Pascua uru uruyañ qalltapxäta, paqallqu urunakaw jan levaduran t'ant'a manq'apxarakïta.

22Uka urusti marka apnaqirix, juchanakapata ukhamaraki taqi jaqinakan juchanakapatsa, mä urqu vaca wilañcha luqtani,

23paqallqu uru kusisiñ urunakansti, sapüruw mä urqu vacampi, mä urqu ovejampi jan kuna kamacht'at uywanak Tatitutak nakt'ayas wilañcha luqtani. Ukhamarus sapürurakiw jucha luratanakat mä cabrito wilañcha luqtani.

24Sapa maya urqu vacatxa, sapa maya urqu ovejatsa, granonakat pä tunka kilo, aceitet kimsa litro chikatani waxt'ampi yapxatasirakini.

25“Paqallqür phaxsina, tunka phisqan uru saraqataruw Chhujllanaka uruyañ urux lurasini. Uka paqallqu uru kusisiñ urunakansti, marka apnaqirix jucha luratanakat pachpa waxt'anak luqtani, nayrïr luqtäwin qawqha uywanaktix Tatitur wilañcha luqtkäna, granonakatsa, aceitetsa qawqhtix churkän ukkharakik churani.

← Chapter 44 Chapter 46 →