Ezekiel 44

aymara-1997

1Uka jaqisti wasitat Tatitun utapar mantañawja anqa punkur irpitu, ukasti inti jalsu tuqi uñtatänwa, ukampis jist'antatarakïnwa.

2Ukan Tatitux nayar situ: “Aka mantañax jist'antatapunïniwa, janirakiw jist'aratäñapäkiti. Janiw khitis uka chiqa mantañapäkiti, uka chiqa Israelan Tatitu Diosapan mantatap layku. Uka punkux jist'antatapunïniwa.

3Marka apnaqir jilïrikiw uka chiqa mantani, Tatitun nayraqatapan qullan manq'a manq'añataki. Jupax mantañawja punku chiqaw mantani, uka chiqaraki mistunxani” sasa.

4Ukatsti uka jaqix amsta tuqinkir mantañäki uksaruw irpitu, Tatitun utap uñkatasiru. Ukansti Tatitun k'ajkir qhanapan templor phuqhantatap uñjta, ukat p'iqixa uraqir puriñkamaw alt'asta.

5Ukat Tatitux sarakitu: “Jumasti Ezequiel, jichhax wal wali uñatatam, wal ist'arakim taqi kuntix Tatitun utapan kamachinakapa, saranakap tuqit siskäm ukanaka. Ukatsti wal amuyarakim khitinakas Tatitun utapar mantapxaspa mistunipxaspa ukanaka.

6“Uka nayar saykatir Israel markarusti sarakim: ‘Tatitux akham siwa: Israel marka, axtaskañ luräwinakamax akkhakamakïpan.

7Jumanakax utaxar yaqha markanakankir jucharar jaqinak irpantasaw nayan utax takisipxtaxa; amuyunakapansa, janchinakapansa jan nayampi arust'äwi chimpuxa apapki uka jaqinakaru; wilañcha luqtat uywanakan lik'inakapa, wilanakap nayaru luqtasaw nayan utax takisipxtaxa, nayampi lurata arust'äwsti axtaskañ luräwinak lurasaw takisipxaraktaxa.

8Janirakiw uka qullan luräwinakaxsa phuqhapktati, jan ukasti, yaqha markankir jucharar jaqinakaruw ukanak lurapxañapatak katuyapxtaxa.’

9“Ukatpï naya Tatitux sistxa: Janiw khiti yaqha markankir jaqis nayan utaxarux mantkaniti, khitinakatix amtäwipansa janchipansa nayampi arust'äwi unañcha jan apapki ukanakaxa, israelitanak taypin jakirinakat khiti yaqha markankir jaqinakas mantkaniti.

10Sacerdotenakar yanapiri levitanakasti, khitinakatix nayat jayarst'awayapxi, kunapachatix Israel markax nayan thakhixat saranukkäna, yaqha diosanakar yupaychas apanukkitäna ukanakasti, juchanakapat mutupxañapäniwa.

11Jupanakasti utaxan punkunakap uñjiripäpxaniwa, ukhamarak utaxan yaqha luräwinak lurapxarakini; jupanakaw wilañcha luqtañatak jaqinakan apanita uywanak jiwarayapxani; ukhamarus jaqinakar yanapt'añatakix jank'akïpxañaparakiwa.

12Jupanakaw sacerdotenakjam israelitanakarux yaqha diosanakar yupaychayas jucha lurañar puriyapxäna. Ukatpï jichhax taqi uka juchanakapat mutuyatäpxanixa. Naya, Tatituw uk arsta.

13Janiw jupanakax luqtäwinak katuyañatak nayaru jak'achasipkitaniti, janirakiw nayan qullana, jan ukax qullanan qullanap yänakaxarus jak'achaskxapxaspati. Jichhax jupanakax taqi jan wali jucha luratanakapat p'inqachataw uñjasipxani.

14Jupanakarusti kuna juk'a lurañanakatix utaxan utjki ukanak lurañapatakikiw uskxarakï.

15“Sadoc sata jaqin wawanakapäki uka levita sacerdotenaka, israelita jaqinakax nayan thakhixat maysar saranukupkän ukapacha utaxan luqtasipkakïna ukanakasti, jupanakax nayar luqtañataki jak'achasinisipkaniwa, ukhamat lik'inakampi, wilanakampi wilañcha nayar luqtapxañapataki. Naya, Tatituw uk arsta.

16Jupanakakiw nayan utaxar mantapxani, altaraxar jak'achasisasti nayaruw luqtapxarakitani.

17Manqhankir uta anqäx punkup chiqa mantapkani ukapachasti, linot lurat suma isimpi isthapitäpxañapawa. Manqhankir uta anqäxan luqtapkani, jan ukax pachpa utaxansa luqtapkani ukkhasti, janiw t'awrat lurat isimpi uchasipkaniti.

18P'iqirusti linot lurat mä ch'uqasiñampiw ch'uqt'asipxani, linot lurat calzoncillonak uskusipxarakini, ukatsti jikhanirux janirakiw kunampis wak'antasipxañapäkiti, ukhamat jan jump'iskañataki.

19Kunapachatix uta anqäxaru markankirinakampi jikisiñatak mistunipkani ukkhasti, janïr misttankasinxa, Tatitur luqtañataki uchasipkäna uka isinakxa apsusipxañapäniwa, ukatsti Tatitun utapankir mä utaruw jaytawayxapxani, misttaniñatakisti yaqha isimpiw isthapisxapxani. Ukhamat uka qullan isin jan yaqha jaqinakampi jikthaptañapataki.

20“Sacerdotenakasti ñik'utanakap mururt'asipxaniwa, ukampis janiw q'al q'ararasipxañapäkiti.

21Manqhankir uta anqäxar mantañatakisti janipuniw kawkïr sacerdotes vino umañapäkiti.

22Janirakiw mä ijma warmimpisa, chachampi jaljtat warmimpisa jaqichasiñapäkiti, jan ukasti Israelankir chacha jan uñt'ir tawaqumpiw jaqichasiñapa, jan ukax yaqha sacerdoten ijmapampisa.

23“Sacerdotenakasti markaxarux kunatix qullanäki kunatix jan qullanäki ukanakxata, ukhamaraki kunatix q'umäki, kunatix jan q'umäki ukanakxat yatichapxañapawa.

24Ch'axwanakansti jupanakaw taripirit sayt'apxani, ch'axwañanaksti nayan kamachinakaxarjamaw uñjapxani. Phunchhäwinak tuqitsti, taqi kamachinakaxa, yatichäwinakax phuqhapxani, nayan samarañ sábado urunakaxsti qullan urunakäkaspas ukham wali axsart'añampi uñjapxani.

25“Mä jiwat jaqin janchipsti janipuniw llamkt'apkaniti jan q'añuchasiskañ layku, uka jiwatatix pachpa awkipäspa, taykapäspa, yuqapäspa, phuchhapäspa, jilapäspa jan ukax, jan chachani kullakapäspa ukapachakiw llamkt'apxaspa.

26Q'añuchata uñjasipxaspa ukkhasti, wakisiw q'umachasipxañapa, ukatsti paqallqu uru suyapxañaparaki.

27Kunapachatix Tatitun utapan manqhankir uta anqäxapar luräwinakapampi phuqhañatak wasitat mantxapxani ukkhasti, jucha luratanakapat wilañcha luqta katuyapxani. Naya, Tatituw uk arsurakta.

28“Sacerdotenakatakix naya sapakiw uraqi churiripäyä. Jupanakarusti janirakiw kuna uraqis Israel markan churaskaniti. Nayätwa jupanakatakix taqi kunapasa.

29Kuna granonaktix israelitanakax nayar luqtapkitu ukat manq'apxani, kawkïr uywanaktix jucha luratanakat luqtapkitu uka uywanakan aychanakapat manq'apxarakini. Uka kipkaraki, taqi kuntix israelitanakax nayar luqtapkitani ukanakasti jupanakatakïniwa.

30Sacerdotenakasti taqi achunakata, nayrïr achunakäki, taqi luqtäwinakat sumäki ukanak katuqapxani. Jumanakax t'ant'a lurasiñatak masa wakichasipkät ukkhasti, sumäki uk jupanakarux churapxäta. Ukapachakiw nayan suma waxt'asiñanakaxax utanakaman utjani.

31Sacerdotenakasti janipuniw jupapacha jiwat jamach'inaksa, uywanaksa manq'apkaniti, kawkïr uywanakatix monte animalanakan jiwayat uñjasipki ukanakan aychapsa janirakiw manq'apkaniti.

← Chapter 43 Chapter 45 →