Ezekiel 46

aymara-1997

1Tatitux akham siwa: “Manqhankir uta anqäxa, inti jalsu tuqinkir punkusti, irnaqaña suxta urunakanxa jist'antatapunïniwa, uka punkusti samaraña sábado urumpi, wawa phaxsix uñstankani uka urumpikiw jist'arasini.

2Marka apnaqiristi ukankir utarux uta anqäxankir tuqit mantanini, ukatsti punku mantañawjaruw sayt'asini. Ukchañkamasti, sacerdotenakax marka apnaqirin churata uywanak nakt'ayapxani, sumankthapiñataki wilañcha luqtapxarakini, marka apnaqiristi punku jak'aruw alt'asini, parapampi uraqir puriñkama Tatitur yupaychasa, ukat mistuwayxarakini. Uka punkusti jayp'thapiñkamax janiw jist'antaskaniti.

3Sábado urunakasti, wawa phaxsisa uñstankani uka urunakasa, jaqinakax uka punku nayräxan Tatitur yupaychapxani.

4Kawkïr uywanaktix marka apnaqirix sábado urun Tatitur wilañcha luqtkani ukanakasti, marani suxta urqu ovejanakampi, mä jach'a urqu ovejampïñapawa, uka uywanakasti jan kuna kamacht'atäñapawa.

5Sapa urqu ovejatsti pä tunka kilo grano luqtarakini, ukampis urqu qallu ovejanakatsti qawqhatix utjki ukkhakiraki. Sapa pä tunka kilo granonakatsti kimsa litro chikatani aceite luqtarakini.

6Machaq phaxsix uñstkani uka urusti mä urqu vaca luqtani, suxta urqu qallu ovejanakampi, mä jach'a urqu ovejampi, taqi ukanakasti jan kuna kamacht'atäñapawa.

7Sapa urqu vacanakatsti pä tunka kilo grano luqtani, uka kipkarak sapa maya urqu ovejanakatsa, urqu qallu ovejanakatsti qawqhatix utjki ukkhakiraki. Sapa pä tunka kilo granonakatsti, kimsa litro chikatani aceite luqtarakini.

8“Marka apnaqirix mantkani ukapachasti, mantañawjan utjir uta punku chiqaw mantani, uka punku chiqarakiw mistuwayxani.

9Ukatsti markan phunchhäwi urunakapan markankir jaqinakax Tatitur yupaychir mantanipkani ukkhasti, akham lurapxani: Amsta tuqinkir punkunjam mantanirinakasti, aynach tuqinkir punku chiqaw mistuwayxapxani, aynach tuqinkir punkunjam mantanirinakasti amsta punku chiqaw mistuwayxapxarakini. Janipuniw mantanipki uka punkunjam mistupkaniti, jan ukasti uka uñkatas punku chiqaw mistuwayxapxani.

10Marka apnaqiristi markampi chikaw mantani, uka chikarakiw mistuwayxani.

11Taqi phunchhäwi urunakansti sapa urqu vacata, sapa urqu ovejatsa pä tunka kilo grano luqtasini; qallu ovejanakatsti qawqhatix utjki ukkhakirakiw luqtasini. Sapa pä tunka kilo granotsti kimsa litro chikatani aceite luqtasirakini.

12“Kunapachatix marka apnaqirix chuymapatjama Tatitur mä waxt'a churani, ukax q'ala nakhantayañataki, jan ukax sumankthapiñatakïni ukkhasti, inti jalsu tuqinkir punkunjam uka wilañchanak luqtañatakix mantanini, kunjämatix samarañ sábado urunakan luqtaski ukhama. Jupan mistuwayxatapatsti punkux jist'antasxaniwa.

13“Sapa willjtarakiw jan kuna kamacht'at mä marani urqu oveja Tatitutak nakt'ayat wilañcha luqtapxani.

14Ukhamaraki, Tatitur sapärmanthi luqtasini: paqallqu kilo granonakampi, mä litro aceitempi, ukasti jak'uruw warxatasini. Aka luräwisti wiñayatakipunïniwa.

15Oveja nakhantata wilañcha luqtäwimpi, grano waxt'äwimpi, aceite waxt'äwimpisa, willjtanakapuniw luqtatäñaparaki.

16Tatitusti akham siwa: “Marka apnaqiritix uraqipata mayni wawapar mä t'aqa uraqi churani ukaxa, wawapankapuniniwa.

17Ukampis marka apnaqiritix uraqipata mä t'aqa uraqi mayni uywataparu churani ukaxa, uka uraqix qhispiñ maran puriniñapkamakiw jupankani, uka qhipatsti wasitat marka apnaqirir kuttayatäxani, ukatsti marka apnaqirin wawanakapar waxt'atäxaniwa.

18Marka apnaqiristi janiw khititsa uraqip aparkaspati. Kuntix wawanakapar tuti waxt'askani uksti pachpa uraqipat churasiskani; ukhamat janiw khitis jan uraqinix uñjaskaniti, janirakiw markaxas yaqha tuqinakar saratatkaniti” sasa.

19Ukatsti uka jaqix punku jak'an utjkän uka mantañanjam irpitu, amsta tuqinkir utanakaru, uka utanakasti sacerdotenakatak yaqhachatänwa. Qhipäx tuqit inti jalanta tuqir uñacht'ayasasti,

20sarakituwa: “Aka chiqan sacerdotenakax jucha luratanakat luqtatäki uka uywanakan aychanakap wallaqiyapxañapa, granonakat luqtat waxt'anaksa qhathiyapxañapa. Ukhamat jupanakax ukanak uta anqäxar jan apsupkaniti, janirakiw jaqinakas kunatix qullanäki uka yänak llamkt'apkaniti” sasa.

21Ukatsti uta anqäx tuqiruw irpsuwayitu, ukansti pusi thiyanakap uñacht'ayarakitu. Uka pusi thiyanakat sapa maya chiqansti mä jisk'a uta anqäxanak uñjarakta. Taqi ukanakasti mä kipkakïnwa, maysarux pä tunka metroni, maysarusti tunka phisqani metroniraki;

23uka chiqasti qala pirqampi muytatänwa, uka pirqa k'uchunakansti qhirinakaw utjarakïna.

24Ukat nayarux akham sarakitu: “Tatitun utapan luqtirinakax aka qhirinakan wilañcha luqtat uywanakan aychanakap qhathiyapxani, kawkïrinaktix jaqinakax Tatitur luqtapki uka uywanakan aychanakapa” sasa.

← Chapter 45 Chapter 47 →