Ezekiel 43

aymara-1997

1Ukatsti uka jaqix inti jalsu tuqinkir punkuruw irpitu,

2ukansti Israelan Diosapan qhanaparuw inti jalsu tuqit jutaskir uñjta. Mä jach'a uxuñaw ist'asïna, mä jach'a walja umani jawiran qhuxuqitapjama, uraqisti uka qhanampi phuqhantataw uñjasirakïna.

3Uka unañchäwisti, Tatitux Jerusalén marka t'unjiri jutkän ukapacha uñjkäyäta ukhamänwa, Quebar sat jawira jak'an uñjkäyät uka kipkarakïnwa. Ukat nayax uraqir puriñkamaw p'iqix alt'asta,

4Tatitun qhapaq kankañapasti inti jalsu tuqinkir punkunjam templorux mantäna.

5Ukapachaw Tatitun ch'amapax nayar aptitu, manqhäxankir uta anqäx tuqiruw irpitu, ukan nayax uñjarakta Tatitun qhapaq kankañapan templor phuqhantata.

6Uka jaqisti naya jak'aruw sayt'asïna, ukan ist'arakta Tatitux nayaru templo manqhatpach parlxayasinkiri

7akham sasa: “Aka chiqax nayan qunuñaxawa, kayunakaxan takt'asiñapawa; aka chiqan nayax israelitanak taypin wiñayatak jakarakï. Janipuniw jupanakasa, reyinakapasa nayan qullan sutix juk'ampi jisk'achaykxapxaniti, jan taqi chuyma arkatanakapampi, jiwat reyinakapar yupaychatanakapampi.

8Janirakiw nayan utax jak'aru jupanakan jach'a utanakapsa mä pirqan jaljataki utachaskxapxaniti. Jupanakax nayar axtasiykitu ukanak lurasaw nayan qullan sutixa takisipxäna; ukatpï q'apisiñaxan jupanakar tukjaraktxa.

9Jichhax nayat jayar jaqunukupxpan jan taqi chuymampi sarnaqañanakapa, reyinakaparu yupaychañanaka, ukkhakiw nayax jupanak taypin wiñayatak jakarakï.

10Jumasti Ezequiel, jichhax taqi israelitanakar yatiyam kuntix nayan utaxan uñjktas taqi ukanaka, kunjäm lurt'atänisa, taqi tupunakapatsa, ukhamat juchanakapat p'inqasipxañapataki.

11Jupanakatix juchanakapat p'inqasipxanixa, ukkhaw jupanakarux kunjämäkitix nayan utaxaxa, kunanakatix ukan utjki taqi ukanak yatiyäta, mistuñanakapata, mantañanakapata, kunjäm luratänisa, kuna kamachinak phuqhapxañapänisa taqi ukanak yatiyarakïta. Ukanaksti qillqsurapim ukhamat qhanpacha amuyasipxañapataki, ukatsti ukhamarjamar lurapxañapataki. Taqpach kamachinak qillqsurapirakim phuqhapxañapataki.

12Tatitun utapan kamachinakapax akawa: qullu patana Tatitun utapar muyuntatäkaraki taqi uka uraqix, qullanan qullanapa chiqäniwa” sasa.

13Altaran tupupax akanakänwa; nayra pachan apnaqata tupunakarjama. Uka altar muytan mä q'awaw utjäna, ukasti manqharux chikat metronïnwa, iramarusti chikat metronirakïnwa, uka q'awan anqäxat muytat thiyanakapasti, pä tunka phisqan centímetro ukkha aptatänwa. Uka altaran tupupasti akhamänwa:

14Q'awa manqhat aynachkamasti, mä metrönwa, iramarusti chikat metrorakïnwa. Chika taypinkki ukasti alayarux niya pä metronïnwa, iramarusti chikat metronirakïnwa.

15Amstäxankki ukasti, kawkhantix wilañcha luqtäwinakax nakhantayatäkän uka chiqax alayarux pä metronïnwa. Amsta tuqir uñstat pusi waxranakanïnwa.

16Altaran patxapasti taqi tuqitsa ukch'apurkamakïnwa, taqi tuqit suxta metronkamänwa.

17Taypinkir pirqasti taqi tuqit paqallqu metroni ukch'apurkamarakïnwa. Uka altarar makhatañapasti inti jalsu tuqi uñtatänwa.

18Ukatsti Tatitux sarakituwa: “Uka altar luraskani ukapachasti, akanakaw phuqhasiñapa: Altarxarusti mä uywa nakhantayapxäta, nakt'at luqtäwïkaspas ukhama, ukatsti wilampiw uka altarxa ch'allakipapxäta.

19Sadoc chachat saraqir levita sacerdotenakarusti, khitinakatix nayar luqtiri jak'achasiniñapäki ukanakarux, mä urqu vaca churapxäta, jucha luratanakat nayar mä wilañcha luqtaniñapataki. Naya, Tatituw uk arsta.

20Ukatsti uka altarankir pusi waxranakaru, patxa pusi esquinaparu, thiyanakaparu taqi ukanakaruw mä juk'a wilampi warxatäta. Ukhamat uka altarxa q'uma tukuyäta.

21Ukatsti jucha luratat luqta katuyañ vaca qallu katusinsti, Tatitun utap anqäxan nakhantayäta, kawkhatix ukanakatak wakichatäki uka chiqaru.

22Qhipürusti, jucha luratanakat mä k'umar cabrito luqtarakïta, sacerdotenakasti kunjämtix vaca qallu luqtañatakix altar q'umachapkän uka kipkarak q'umachapxani.

23Taqi uka q'umachäwinak tukuyasinsti, mä urqu vacampi, mä urqu ovejampi katurakïta, ukanakasti jan kuna kamacht'atäñapawa,

24ukatsti ukanak nayaruw taqpach luqtitäta. Sacerdotenakaw ukarux jayumpi willikipt'apxani, ukatsti naya, Tatitur luqtasaw nakhantayapxani.

25Paqallqu urunakaw jucha luratanakat mä cabritompi, mä urqu vaca qallumpi, mä urqu ovejampi wilañcha luqtäta, uka uywanakasti jan kuna kamacht'atäñapawa.

26Ukhamarakiw sapüru, paqallqu urunakana, sacerdotenakax uka altar q'umachapxani, ukhamat Tatitur luqtatäñapataki.

27Paqallqu uruw ukham lurapxani, ukat kimsaqallqüri urut nayraqatarusti nakt'at luqtäwinak katuyaña, sumankañ wilañchanak luqtañ qalltapxani. Ukapachaw nayax taqi chuymampi uka wilañcha luqtatanakam katuqapxarakïma. Naya, Tatituw uk arsta” sasa.

← Chapter 42 Chapter 44 →