Ezekiel 19

aymara-1997

1“Jumasti, jichhax aka amay imañ q'uchunak Israel markankir reyinakatakix q'uchum:

2“ ‘Taykamax mä leonjamänwa, leonanak taypin jakarakïna. Putupsti uka leonanak taypiruw lurasïna, ukan león qallunakaparux uywararakïna.

3Maynïri qalluparusti, jach'akamaw uywsurakïna. Uka qallusti animalanak katuntañ yatiqäna, jaqinak manq'antarakïna.

4Markanakasti jupxat parlir ist'apxäna; juparusti sipitampiw katuntapxäna, chinuntasin qatatipxäna, Egipto markar puriyañkama.

5Uka tayka leonasti ukham suyt'äwipa ina ch'usar tukutap uñjasinxa, león qallunakapat yaqharuw irptasini, ukarusti uywsurakiwa.

6Mä jach'a leonar tukxasinsti, leonanak taypinjam sarnaqäna. Yaqha animalanak katuntañ yatxarakïnwa, jaqinaksa manq'antarakïnwa.

7Reyinakan utanakapsti q'alpun t'unthapïna, markanaksa q'al t'unjarakïna; wararitapampisti taqi akapacharuw khathatiyäna.

8Ukat uka jak'ankir markanakax katjañatak mayacht'asipxäna; sipitanakap wakichapxäna, ukaruw jalt'ayapxäna.

9Ñach'antasinsti mä jaularuw jist'antapxäna; Babiloniankir reyin ukaruw apapxäna, ukan carcelar apantapxäna, Israelan qullunakapan wararitap jan khitisa ist'askañapataki.

10“ ‘Taykamax uma jak'aru ayruntat uva alir uñtatänwa, wali achuri, walja laphinakani, walja uma utjatap layku.

11Layminakapasti wali thurunakaw jilantxäna, reyinakan thujrup lurañatakjama, ukham jilatapampisti qinayanakkamaw purïna. Yaqha alinakat sipan wali jach'aw tuküna, walja layminïtap laykusti taqinin uñjkañänwa.

12Ukampis wali phiñasiñampiw alir jik'inukupxi, uraqiruw liwinukupxi. Inti jalsu thayaw uk wañsuyawayi, uva achunakapas willirtxiwa; uka thuru layminakapas wañsxiwa, ninar phichhantatarakiwa.

13Jichhasti wasaran ayruntatawa, jan umani waña uraqina.

14Layminakapatsti ninaw mistu, uka ninaw küllinakapsa, achunakapsa nakhantxaraki. Janiw jichhax thuru layminakanïkxiti, reyinakan thujrup lurañatakixa.’ ” (Akax amay imäwi q'uchuwa, ukatak q'uchutapunïniwa.)

← Chapter 18 Chapter 20 →