Ezekiel 20 — aymara-1997

1Paqallqüri marana, phisqïr phaxsina, tunka uru saraqatarusti, Israel markat mä qawqha jilïr jaqinakaw Tatitur jiskt'asir purinipxäna, ukatsti nayan nayraqataxaruw qunt'asipxäna.

2Tatitusti nayaruw akham sarakitu:

3“Ezequiel, Israel markankir jilïr jaqinakampi parlam, jupanakarusti sarakim: ‘Tatitux akham siwa: ¿Jumanakax nayar jiskt'asirit jutapxta? Jichhasti nayaw jumanakar sapxsma, janiw jumanakax kunsa nayarux jiskt'asipkitätati.’

4Ezequiel, jumaki uka jaqinakarux juchañcham; kuna axtaskañ luräwinaktix awkinakapax lurapkän ukanak jupanakar yatiyarakim.

5Jupanakar sarakim: ‘Tatitux akham siwa: Israelar ajlliskäyät ukapachasti, wawanakapatakix mä juramento lurta, Egipto uraqin jupanakar uñstarakta. Ukansti amparaxa aytasaw juramento lurta: Nayätwa Tatitu Diosamaxa, sasa.

6Uka urusti nayax Egipto uraqit jupanakar irpsxañatakiw arsurakta, jupanakatak thaqkäyät uka markar irpsxañataki, leches misk'is umjam jalaski uka markaru. ¡Taqi markanakat sipan juk'ampi suma markäki ukaru!

7Nayasti taqpachaniruw sarakta uka axtaskañ diosanakap apanukxañapataki, Egiptonkir diosanakampis jan q'añuchasipxañapa, naya Tatitun jupanakan Diosapätax layku.

8“ ‘Ukampis jupanakax kutkatasipxituwa, janiw arunakaxsa ist'añ munapkänti; uka axtaskañ diosanakapatsa janiw jithiqtapkänti, janirakiw Egiptonkir k'ari diosanakapsa apanukuñ munapkänti. Nayasti wali phiñasitapunïyätwa, uka phiñasiñax apaqtayasiñatakix pachpa Egipto uraqin mutuyañ amtäyäta.

9Ukampis sutixan jach'ätap laykuw Egiptot irpsunta, ukhamat yaqha markanak nayraqatan sutixan jan jisk'achatäñapataki, kawkïr markanak taypintix israelitanakax jakapkän uka markanak nayraqatana, uka markanak nayräxan jupanakarux uñstäyäta, Egiptot irpsunxañatakis arsurakïyäta.

10Nayaw jupanakarux Egiptot irpsunta, wasar tuqiruw irparakta;

11ukan jupanakarux kamachinakaxampi, arsutanakaxampi yatiyta, uka arunakaxarjam sarnaqirinakasti jakañ katuqapxi.

12Ukhamarakiw jupanakarux sábado urunakaxat yatiyta, uka urusti nayampin jupanakampin mä chimpüñapänwa, ukatsti mä amtawïñapänwa, naya Tatitun sábado uru nayatak yaqhachasitaxata.

13Ukampis jupanakax wasar tuqin nayatakiw sayt'asxapxi, jupanakar churata kamachinakarus janiw jaysapkiti; janirakiw sábado urunsa nayarux yupaychapkituti, jupanakasti uka kamachinakar phuqhasax jakañ katuqapxasapäna. Ukat nayax jupanakxaru q'apisiñaxa samarasiñ amtäyäta, pachpa wasaran tukjañataki,

14ukampis sutixan jach'ätap laykuw uk jan lurkti, jupanak Egiptot irpsunir uñjapkitu uka markanak nayraqatan jan jisk'achat uñjasiskañaxataki.

15“ ‘Wasaran jupanakarux juramentompi arsurakta, jupanakar churata uraqir jan mantayañataki, yaqha uraqinakat sipan wali suma uraqiru, kawkhantix leches, misk'is umjam jalaski uka uraqiru.

16Jupanakasti kamachinakaxar ist'añ lantxa, apanukupxiwa; sábado urun nayar yupaychañ lantsti, yaqha diosanakaruw yupaychapxi.

17Ukampis jupanakax wasaran llakkañaw sarnaqapxarakïna, ukat jupanakarux jan tukjkaraktti.

18Ukat wawanakaparux mayirakta awkinakapan luräwinakapa jan lurapxañapataki, awkinakapan arsutanakaparusa jan phuqhapxañapataki, janirak diosanakampis q'añuchasipxañapataki.

19Jupanakarusti sarakïyätwa: Nayätwa jumanakan Tatitu Diosamaxa, kamachinakaxsa, arsutanakaxsa sum phuqhapxam,

20nayan samarañ sábado urunakaxsti wali axsart'añampi uñjapxam, ukhamat uka urunakax jumanakampin nayampin mä chimpüñapataki; ukkhaw jumanakax yatipxäta, nayan Tatitu Diosamätaxa, sasa.

21“ ‘Ukampis jupanakan wawanakapax nayatakix sayt'asipxarakikïnwa. Janiw kamachinakaxsa arsutanakaxsa jaysapkänti; jakañ churiri arunakaxarjamas sarnaqapkänti, sábado urunakaxsa takisipxarakïnwa. Nayasti wali phiñasitapunïyätwa, uka phiñasiñax apaqtayasiñatakix pachpa wasaran tukjañ amtäyäta,

22ukampis sutixan jach'ätap laykuw uk jan lurkti, ukhamat yaqha markanak nayraqatan jan jisk'achat uñjasiskañaxataki, uka markanakasti Israel markar Egiptot irpsunir uñjapxarakitänwa.

23Wasaransti jupanakarux juramentompiw arsurakïyäta, taqi markanak taypiru ananukuñataki,

24kamachinakaxar jan ist'añ munapxatap layku, sábado urun nayar jan yupaychapxatap layku, jan ukasti nayra awkinakapan diosanakapar yupaychapxatap layku.

25Ukatsti jupanakarux jan askïki uka kamachinak churarakta, ukhamat jakañ jan jikxatapxañapataki.

26Jupanakarusti, uka diosanakar jilïr yuqall wawanakap wilañcha luqtañampiw q'añuptayta. Taqi ukanaksti jupanakan axsartapxañapatakiw lurta, ukat nayan Tatitütax yatipxañapataki.’

27“Jichhasti jumax israelitanakar sarakim: ‘Tatitux akham siwa: Awkinakamax nayar jan taqi chuymampi arkapxatapampiw ñanqhachapxitu.

28Nayax jupanakar churañataki arsuta uraqiru puriyanxta ukkhasti, jupanakax mä jisk'a qullu patansa, jan ukax walja laphinakani quqanak k'uchunakansa, jank'akiw nayar q'apisiykitu uka wilañchanaka, waxt'anak luqtapxäna, suma q'apkir qullanakampi q'uphichasa, vinompi ch'allt'asa.

29Nayasti jupanakarux jiskt'araktwa: ¿Kuna yaqha diosanakar yupaychañ altarasa, kawkharutix jumanakax yupaychir sarapkta ukaxa? sasa. Ukasti jichhürkama: Yaqha diosanakar yupaychañ altara, satapuniwa.’

30“Israel markarux sarakim: ‘Tatitux akham siwa: ¿Kunatarak jumanakasti nayra awkinakamjam q'añuchasiñ munapxtasti? ¿Kunatarak nayar taqi chuymampi jan arkasa uka axtaskañ diosanakar yupaychapxtasti?

31Jumanakax wawanakamar ninampi nakhantayasin wilañcha luqtasax, uka axtaskañ diosanakamampix q'añuchasisipkaktawa. Jichhasti israelitanaka, ¿ukham lurkasas nayar jiskt'asirix jutañ munasipkaktati? Naya, Tatituw jakañax layku juramentompi arsta, janipuniw jumanakampix jiskt'ayaskäti.

32Jumanakasti, kawkïr yaqha markanakatix lawanakaru, qalanakar yupaychasipki uka kipkaw tukuñ munapxta, ukampis janiw ukax ukhamäkaniti.

33Naya, Tatituw jakañax layku juramentompi arsta, jach'a ch'amaxampi, jach'a phiñasiñaxampiw jichhax jumanakar apnaqapxäma.

34Nayaw kawkïr markanak taypintix ananukut jikxatasipkta ukanakatxa, tantachthapinipxäma, jach'a ch'amaxa uñacht'ayasa phiñasiñampi mutuyasa.

35Kunjämatix nayra awkinakamarux Egiptonkir wasaran mutuykäyätxa, ukhamarakiw jumanakarux mutuyapxäma. Wasar tuqiruw irpapxäma, markanakatsa juk'ampi jayaru, naya kipkaw mutuyapxarakïma. Naya, Tatituw uk arsta.

37Nayaw jumanakarux kunjämatix mä awatirix ovejanakapar sum uñakipki ukham uñakipapxarakïma, mayat mayat markaxäpxañamatakix ajllipxäma, mä arust'äwi jumanakampix lurarakï.

38Jumanak taypitsti nayatak sayt'asiri, jan walt'añanaksa utjayirinakarux yaqhachäwa, kawkïri yaqha markantix jichhax jakasipki ukatsti jupanakarux apsunirakïwa; jupanakasti Israel uraqirux janiw mantapkaniti. Ukapachaw jumanakax yatipxäta, nayan Tatitu Diosätaxa.

39“ ‘Israelitanaka, Tatitux akham siwa: Janitix jaysañ munapkchistaxa, ¡ukhamax axtaskañ diosanakamar yupaychasipkakim! Ukampis mä uruw purini, jumanakax nayaruw jaysapxitäta, janirakiw nayan qullan sutixsa uka diosanakamar luqtanak churasa, yupaychasasa takichaskxapxätati.

40Taqpach Israel markaw nayan qullan qulluxan yupaychapxitani, nayan uraqixankir Israelan jach'a qullupana. Naya, Tatituw uk arsta. Ukan nayax jumanakar taqi chuymampi katuqapxäma; ukan nayar luqtanak churapxañamatak wayt'apxarakïma, yapunakamat nayrïri achunak nayar luqtapxañamataki apanipxarakïta.

41Kunapachatix nayax uka yaqha markanakata, kawkhanakantix ananukut uñjasisipkta ukanakat tantachthapipkäma, taqi markanak nayraqatan nayan q'uma kankañaxsa uñacht'ayapkäma, ukapachaw nayax jumanakan suma q'apkir luqtäwinakam katuqapxäma.

42“ ‘Ukatsti kunapachatix nayax Israel uraqir puriyxapxäma, nayra awkinakamar churañatak arsuta uraqiru, ukapachaw jumanakax nayan Tatitütax yatipxäta.

43Ukan jumanakax amtasipxäta kuna jan wali luräwinakamampitix q'añuchjasipkta ukanakata, jumanakpachaw ukham ñanqhanak lurapxatamat axtasipxäta.

44Israelitanaka, jumanakax jan wali qhuru jaqinakäpxtawa, ukampis janiw kuna mutuyäwtix katuqapxañamäki ukhamarjamax mutuyapkämati. Jan ukasti, nayan jach'a sutix laykuw sumak uñjapxäma, ukapachaw jumanakax nayan Tatitütax yatipxäta. Naya, Tatituw uk arsta.’ ”

45Tatitux sarakituwa:

46“Ezequiel, jichhax aynach tuqir uñtam, ukatsti Jerusalén markar nayan arunakax yatiyam, akham sasa:

47‘Tatitux akham siwa: Jerusalén marka, ninampiw phichkatäma. Taqi jaqinakamaw jiwarani, janirakiw maynis jakañan qhiparkaniti. Amstat qalltasin aynachkamaw ninax aqantani, taqi kun nakhantarakini. ¡Janipuniw khitis uka nin jiwaraykaniti!

48Taqi markanakaw uñjapxarakini naya, Tatitun uka nina naktayataxa. Uka ninasti janiw jiwarkaniti’ sasa.

49Nayasti ukxarux saraktwa: “Tatay, jaqinakax sapxiwa nayax jan amuyt'kaña arunakak parlaskataxa” sasa.