Ezekiel 18

aymara-1997

1Tatitux sarakituwa:

2“Israel markankirinakasti sapa kutipuniw aka säwi parlapxi: ‘Awkinakan luratanakapxa, wawanakapaw phuqhapxi’ sasa. Kunatsa ukham parlapxpacha sasaw jiskt'asta.

3Naya, Tatituw juramentompi arsta, janipuniw jichhax jumanakax mayampsa uka säwi Israel markan parlapkxätati.

4Taqi jaqinakax nayankiwa, awkisa, yuqasa nayankiwa, ukampis jucha luriristi jiwaniwa.

5“Aski jaqisti kunatix chiqapäki, askïki uk luri:

6qullu patanakan diosanakar yupaychasa utjiri manq'äwinakat jithiqtiwa, janirakiw Israelan k'ari diosanakaparus katuyaskiti; jaqi masipatsa janiw warmip irparkiti, janirakiw pachpa warmiparus jak'karakiti kunapachatix uka warmix phaxsi wilapampïki ukapachaxa;

7janiw khitirus t'aqhisiykiti, jan ukasti manuniparux kuntix manu lanti katuqkatayna uksa kutt'ayxarakiwa; janiw khititsa lunthatkiti, manq'añapatsti khititix jan manq'añanïki ukarus churarakiwa, jan isinirusa ist'ayarakiwa;

8qullqipsa janiw walja jalaqta katuqañ layku mayt'kiti; janiw khitirus ñanqhachkiti; kunapachatix pani ch'axwir jaqinakar ch'axwatanakap t'aqki ukapachasti chiqaparupuniw t'aqjaraki;

9kamachinakaxar phuqhasaw kunsa luri. Uka jaqix chiqätapat jakaskapuniniwa. Naya, Tatituw uk arsta.

10“Ukampis uka aski jaqitix jaqi jiwayiri mä qhuru yuqanïni,

11kuntix awkipax jan lurkän ukanaksa lurani, qullu patanakan diosanakar yupaychañataki manq'äwinakarus sarani, ukatsti jaqi masipatsa warmip irparani,

12pist'añan jakir jaqirus t'aqhisiyani, mayninakatsa lunthatani, manuniparus kuntix manu lanti katuqkatayna uksa jan kutt'aykani, uka k'ari diosanakar katuyasini, nayax uñiskta uka luräwinaksa lurarakini,

13qullqipsa juk'ampi walja qullqi jikxatañ layku mayt'ani; uka jaqisti jiwaniwa. Nayataki axtaskiri taqi ukanak luratapatsti jiwaniwa, jupa pachpaw jiwatapat juchanïskani.

14“Uka jaqitix mä yuqanïxaspa, uka yuqapasti awkipan taqi uka juchanak luratap uñjarakispa, ukampis janirak jupax awkipjam uka juchanak lurkani;

15janirak uka qullu patanakan diosanakar yupaychas manq'äwinakarus sarkaniti, Israelan k'ari diosanakaparus katuyaskarakiniti; janirak jaqi masipan warmip irpaqkani,

16janirak khitirus t'aqhisiykani; jupat mä kunsa mayt'asipkani ukkhasti janirak kunsa maykaniti; janirak khititsa lunthatkaniti, jan ukasti manq'at awtjatarus manq'añ churani, jan isinirus isi churarakini;

17janirak khitirus kuna ñanqhsa lurkaniti, qullqipsa juk'ampi walja uñxatañ laykus mayt'kaniti. Ukatsti kamachinakaxarjam phuqhas sarnaqani uka jaqix janiw awkipan juchap laykux jiwkaniti, chiqpachansa jupax jakaskaniwa.

18“Ukampis awkipax, jaqi masipar t'aqhisiyatapata, lunthatasitapata, markap taypinsa jan walinak luratapatxa, pachpa juchanakapat mutuyäwi katuqasaw jiwaskani.

19Jumanakasti jiskt'apxitätawa: ‘¿Kunatarak wawasti awkipan juchanakap layku jan mutuyatäkisti?’ sasa. Nayasti sapxämawa: Wawax kunatix chiqapäki, kunatix askïki uk luri, taqi kamachinakaxsa phuqharakiwa; uka wawan wakisiw jakaskañapa.

20Jucha lurir jaqiw jiwaskani. Wawax janiw awkin juchapat mutuyatäkaniti, awkis janirakiw wawan juchanakapat mutuyatäkaniti. Aski jaqix aski lurataparjamaw suma waxt'asïwi katuqani, ñanqha jaqisti ñanqha lurataparjamaw mutuyäwi katuqarakini.

21“Ñanqha lurir jaqitix taqi ñanqha juchanak lurkän ukanaka apanukxani, ukatsti nayan kamachinakaxarjam sarnaqxani, kunatix askïki, kunatix chiqapäki ukanak lurxarakini ukax jakaskaniwa, janiw jiwkaniti.

22Nayasti janiw mayampsa uka jucha luratanakapat amtaskxäti, jupasti aski luratap laykuw jakxarakini.

23Janiw nayax ñanqha jaqin jiwañap munkti, jan ukasti ñanqha lurañat jithiqtxañap munta, ukhamat jakxañapataki. Naya, Tatituw uk arsta.

24“Ukampis, aski jaqitix aski luräwinakap apanukuni, ukatsti kuntix ñanqha jaqix axtañanak lurki ukanak lurarakini ukasti, ¿uka jaqin jakaskañap jumanakax amuyapxtati? Nayasti janiw amtaskxäti kuna askinaktix jupax lurkän ukanakatxa, taqi chuymampi jan arkatap layku, jucha luratap laykuw jiwani.

25Jumanakax sapxätawa: ‘Tatitux janiw chiqapar uñjkiti’ sasa, ukampis ist'am Israel marka, ¿nayan jan chiqapar uñjaskataxti jumanakax amuyapxta? ¿Janit jumanakaki jan chiqapar kunanaksa lurapkta?

26Aski jaqitix aski luräwinakap apanukusin ñanqha luräwinak lurxchi ukasti, uka jan walinak luratapat jiwaniwa.

27Ukampis mä ñanqha jaqitix ñanqha luräwinakap apanukxchi, ukatsti aski luräwinak lurxarakchi ukasti qhispiyataw uñjasini.

28Jupatix sum amuyt'asini, ukat taqi ñanqha luräwinakap apanukxarakini ukkhasti, jupax jakaskakiniwa, janiw jiwkaniti.

29“Ukampis Israel markax saskakiniwa: ‘Tatitux janiw chiqapar uñjkiti’ sasa. ¿Janit Israel markaki jan walinak lurkpacha?

30Israelita jaqinaka, nayasti luräwinakamarjamaw sapaqat maynir uñjapxsma. Naya, Tatituw uk arsta. Ñanqha lurañanakam jank'ak apanukupxam, jumanak pachpa jan uka ñanqha luräwinakam layku jiwaraskañamataki.

31Naya nayraqatan lurapkta uka ñanqhanaksti mäpit apanukupxam, mä machaq chuymani, mä machaq ajayun tukupxarakim. Israel marka, janiw kunatsa jiwapxañamäkiti,

32Janiw nayax khitin jiwañapsa munkti. Ñanqha luräwinakamat jithiqtxapxam, ukapachakiw jakapxäta. Naya, Tatituw uk arsta.

← Chapter 17 Chapter 19 →