Ecclesiastes 8

aymara-1997

1¿Khitis yatiñan jaqimpix kikipasispa? ¿Khitirak kunäkitix ukanak uñt'aspa? Yatiñ kankañax jaqin ajanup qhanartayi, qhuru uñnaqapsa quñaptayarakiwa.

2Reyin arsutanakapar phuqhapxam, ukham Dios nayraqatan juramentompi arstaxa.

3Jupan nayraqatapat jan mäki mistumti. Jan wali lurañanakampix jan chikachasimti, ukampis jupax kunjämtix munki ukham luraspa.

4Reyin arupax jach'a munañan aruwa, janiw khitis siskaspati: ¿Kunarak lurtasti? sasa.

5Arsutarjam phuqhirix janiw kuna jan walirus purkaniti, ukatsti khititix yatiñanïki ukax yatiw kunapacha, kunjäm phuqhañsa.

6Chiqpachansa, taqi kun lurañatakis mä pachampi, amuyumpiw utji, ukampis jaqitakix

7akat qhipar kunatix luraskani uk jan yatitapaw jupan jach'a llakipaxa, janirakiw jupar khiti amuyt'ayiris utjkiti.

8Jaqin jakañap ch'amampi katxäsirix janiw khitis utjkiti, janirakiw jiwar ch'amampi katxäsiris utjkiti. Aka nuwasïwit janiw khitis jaltkaspati. Jan wali lurir jaqirux janiw ñanqha luratapax jiwañat qhispiykaspati.

9Akapachan kunanakatix luraski ukanak yatxatañar uchasitax laykuxa, kunjämatix jaqix masinakapar jan walinak lurañatakix ch'amanïki uk uñjarakta.

10Uka kipkarak ñanqha jaqirux imäwip urun wali jach'achañampi imapxatap uñjta; aski jaqitsti janiw pachpa markapas amtaskiti. Akasti inamayakiwa,

11Juchan jaqirux jan mäki juchap uñt'ayasaxa, juk'amp jucha lurañaruw puriyi.

12Ukhamasti jucharar jaqix walja kuti juchanak lurkasas walja maranakaw jakaski. (Nayax khitinakatix Tatitur jach'añchapki, axsarapki ukanakan sumak jakasipxatap yatiyäta;

13ukampis jucharar jaqinakatakix janiw kunas sumäkiti, jakäwipas Diosar jan axsaratap laykux mä ch'iwjamakiw sarawayxi.)

14Ukhamaw akapachan aski jaqinakax inamay t'aqhisipxi jan wali jaqinakäkaspas ukhama, jucharar jaqinakasti aski jaqinakäkaspas ukhamaw kusisipxi. Nayax sistwa: “Akax inamayakiwa” sasa.

15Ukat nayax kusisiñxat sista: “Kusisiñax utjpan” sasa. Jaqitakix akapachan janiw yaqha suma luräwipax utjkiti, jan ukasti manq'aña, umaña, kusist'aña ukakiw utji, jaqitakix ukakiw irnaqatapat utji, Diosax akapachan jakañ churki uka urunakapana.

16Nayax juk'amp yatiqañaru, yatxatañaru, akapachan kuntix lurapki uk uñakipañaruw uchasta, ukampis jaqix uruy arumaw jan ikthapkiti,

17ukatsti juk'amp amuyta, jaqix kuntix Diosax lurki ukanaka, akapachan kunatix luraski ukanak janiw amuykiti. Qawqsay munasax thaqhaskpan, ukampis janiw jikxatkaniti; yatiñan jaqix “yattwa” saskaspawa, chiqpachansa janiw jikxatkiti.

← Chapter 7 Chapter 9 →