Ecclesiastes 9

aymara-1997

1Taqi chuymaw taqi akanak yatxatañar uchasta, aski jaqinakana, yatiñ kankañan jaqinakan luratanakapan Diosan amparapankatap yatiñataki. Jaqix munasiñxatsa, uñisisiñxatsa, ukanakan uñjkasas janiw kuns yatkiti.

2Ukhamasti taqinirus pachpakiw suyt'aski: aski jaqirusa, jucharar jaqirusa, suma jaqirusa jan wali jaqirusa, q'uma jaqirusa, jan q'uma jaqirusa, wilañchanak luqtir jaqirusa, jan luqtir jaqirusa; uka pachparak suma jaqirusa, jucharar jaqirusa, juramento lurir jaqirusa, jan lurir jaqirusa.

3Akapachan taqi kunatix luraski ukanakat akaw jan walïkiti: taqinirus pachpakiw suyt'aski. Mä tuqitxa, jaqin amuyupax ñanqha lurañampi phuqt'atawa; taqi jakäwipansti luqhi kankañaw amuyuparux apnaqi; ukatsti tukuyarux jiwañarukiw purxi.

4Ukampis khitirutix jakañax churatäki ukatakix juk'amp suyt'äwipaw utji. Jiwat leonat sipansa jakaskir anuw askixa.

5Ukhamarus khitinakatix jakasipki ukanakax jiwañap sum yatisipxi, ukampis jiwatanakax janiw kuns yatipkiti, janirakiw kuns katuqapkiti, jupanakax armatäxapxiwa.

6Munasiñapasa, uñisisiñapasa, munapayasiñapas ukan tukusxi, janipuniw jupanakax akapach luräwinak mayampsa lurkxapxaniti.

7T'ant'amsti kusisiñamp manq'asim, vinomsa kusisiñampirak umt'asim, juman luratanakamax Tatiturux kusisiyiwa.

8Janq'u isimpipun isthapisim; p'iqimarus q'apkir qullanakampipun uchasim.

9Munasit warmimampix kusisit jakasim, Tatitux akapachan juk'a urunak churktam ukana; akapachan jan inakt'as irnaqatamat ukakiw wakt'tam.

10Kuna lurañatix jumatak utjkani ukan kusisiñampi luram, amay imäwir sarkät ukansti janiw kuna lurañas utjkiti, janirakiw lup'iñasa, yatxatañasa, yatiñ kankañas utjkiti.

11Akapachan yaqhanakamp kun uñjta: janiw suma jalirinakax t'ijuñan atipt'apkiti, janirakiw ch'amaninakas nuwasïwin atipjapkiti; janiw yatiñan jaqikis t'ant'anïkiti, janiw ch'ikhinakakis qamirïpkiti, janirakiw suma yatiqatanakakis suma katuqatäpkiti; chiqpachansa, taqi jupanakarux ukhamaw wakt'i.

12Mä tuqitxa, jaqix janiw jan walt'añan uñjasiñap yatiskiti: kunjämatix chawllanakax qänan katuntatäpki, jamach'inakas sipitar jalt'apki, ukhamarakiw jaqix jan amuyaski ukkhax jan walt'añampi katuntat uñjasi.

13Akapachan yaqha uñjarakta, ukasti nayatakix mä suma yatichäwiwa:

14juk'a jaqin mä jisk'a markaw utji, ukatsti mä wali munañan reyin katuntataw uñjasi. Uka reyix markarux nuwasiñ jach'a yänakampi muyuntasaw katuntañatak wakicht'asi.

15Uka markansti yatiñani mä jan kunan jaqiw jaki, yatiñapampix uka markarux qhispiyasapänwa, ¡ukampis janiw khitis jupat amtaskiti!

16Ukat nayax sista, wali ch'amanïñat sipansa yatiñanïñaw askixa, jan kunan jaqin yatiñapax janisay yäqatäkpan, parlatapas janisay ist'atäkpan.

17Pisi amuyt'an jaqinakan reyipan arnaqasitapat sipansa, yatiñan jaqinakan quña arunakapaw juk'amp sum ist'asi.

18Nuwasiñ yänakat sipansa, yatiñ kankañaw askixa. Mä sapa pantjasiñakiw jach'a t'unjasiñarux puriyi.

← Chapter 8 Chapter 10 →