Deuteronomy 18

aymara-1997

1Moisesasti saskakïnwa: “Leví ayllunkir levita sacerdotenakaxa, janiw maynïr israelit jaqinakjam kuna uraqinïpkanisa. Jupanakasti Tatitur luqtatäkis uka waxt'anakat manq'asipxani.

2Janiw levitanakax israelit jilanakap taypin uraqinak katuqapkaniti, pachpa Diosaw jupanakan katuqäwipaxa, kamisatix jupax arsuwayki ukhamarjama.

3“Sacerdotenakarux Tatitur luqtat vaca aychanakampita, oveja aychanakampitxa; jikhanïwja, änkha, purakäwja ukanakaw wakt'ani,

4ukhamarakiw nayrïr achur trigo, vino, aceite, ovejan nayrïr yawiqat t'awrapas wakt'arakini.

5Tatit Diosamaw taqpach ayllunak taypit jupanakar ajllisi, awkinakapat wawanakapkama, Tatitun sutipar wiñay luqtapxañapataki.

6“Khiti levitatix kawkha markanakamat mistunini, Israel uraqinakata, chuymapar jaysasin Tatitun ajllit chiqawjar jutañ munkan ukaxa,

7uka chiqan Tatitun sutipxaruw sacerdote lurañap lurani, kamisatix ukankir levita jilanakapax Diosar luqtasipki ukhama,

8ukatsti qawqtix mayni sacerdotenakax manq'añanak katuqapki ukkharak jupax katuqani, awkipat yaqha katuqäwi katuqkani ukanakampi.

9Moisesasti jupanakarux saskakïnwa: “Kunapachatix jumanakax Tatit Diosaman churat uraqir mantapkäta ukkhaxa, jan jumanakax uka q'añu luräwi sarnaqäwinakapat yatiqasipxamti.

10Jan jumanakat khitis ninar nakhantayas wawanakamar wilañcha luqtpati, janirak layqasiñanakan sarnaqpati, jutir urunakat yatxatañanakarus uchasipxpati, janiraki layqasir jaqïpxpati,

11chinkänanakar jiskt'asiri, ajayunakar jawsiri, jiwatanakar jiskhir jaqïpxpati.

12Tatiturux, ukham lurir jaqinakax axtasiyiwa. Ukham axtaskañ luräwinakanïpxatap laykuw Tatit Diosamax taqi uka markanakar jumanak nayräxat jaqunuku.

13Jumanakasti Diosampix chiqa chuymampipuniw sarnaqapxäta.

14Kawkïr uraqinaktix katuntapkäta ukan jakir jaqinakaxa, jutir urunakxat yatir jaqinakampiru, layqanakampiruw ist'apxi, ukampis jumanakan Tatit Diosamax janiw ukanak lurapxañam munkiti.

15“Tatit Diosamax jumanak taypit nayjam mä profeta sayt'ayarakini, juparuw jumanakax ist'apxäta.

16Chiqpachansa jumanakaw Tatit Diosamarux Horeb qullun uk mayipxtaxa, kunürutix taqpachani uka chiqan tantachasipkta ukapacha, sapxaraktawa: ‘Janiw mayampis Tatit Diosasan arupa ist'añ munapkti, janirakiw uka jach'a nina lawra uñjañ munapkti jan jiwaskañataki’ sasa.

17Ukat Diosax nayar sitäna: ‘Kuntix sapki ukax walikiwa.

18Nayaw jilanakap taypit jumjam profeta sayt'ayä, ukatsti kuntix nayax, parlam siskä uk jupanakar parlañapataki, nayax arskä ukanak sañapataki.

19Khitinakatix nayan sutixar arsuri profetan parlatap jan ist'kani ukarux, nayaw juchañchaskä.

20Ukampis kawkïr profetatix nayan sutixar parlañ munkani, ukatsti kuna arunaktix nayax jupar jan siskta ukanak parlani, jan ukax yaqha diosanakan sutipar parlkarakini ukaxa, uka profetax jiwayatäñatak juchañchataw uñjasini’ sasa.

21Jumanakatix chuymaman jiskt'asipxarakïta: ‘¿Kunjämatarak yatsna kuntix parlaski ukan Diosan arunakapätapsti?’ sasa, jumanakax akanak sum amuyapxäta:

22Kuntix profetax Tatitun sutipxaru parlkani, ukatsti janirak uka parlatapax phuqhaskani ukasti jumanakatakix qhanäniwa, uka parlatapax janiw Diosan arunakapäkiti, jan ukasti uka profetax jach'a jach'a tukusakiw ukanak parli, ukhamasti jumanakax jupar jan axsarapxamti.

← Chapter 17 Chapter 19 →