Deuteronomy 17

aymara-1997

1“Janiw Tatit Diosamarux kuna usuchjat vacanaksa, ovejanaksa wilañcha luqta katuyapxätati, ukanakasti Tatitutakix axtaskañawa.

2“Tatit Diosamax churapkätam uka markanakantix khiti jaqisa, warmisa Diosar ñanqhachäwinak lurani, suma arust'äwipsa p'akintarakini,

3yaqha diosanakar yupaychasina, ukanakar killt'asisaraki, phaxsirüpasa, intirüpasa, warawaranakarüpasa, kuna luräwinaktix Diosax jan lurañas munki ukanak lurasa,

4uk yatipxäta ukapachasti, wali amuyumpiw sum yatxatapxäta; ukatix chiqächi Israel markan uka axtaskañ luräwinakax utjapunchi ukaxa,

5uka jan wal lurir jaqirux markan taripirinakap nayräxaruw irpapxäta, ukatsti qalampi k'upjasin jiwayatäñapatakiw juchañchapxarakïta.

6“Jiwayatäñataki juchañchäwisti kunapachatix pani, jan ukax kimsanisa qhanañchapxani ukapachakiw juchañchäwix utjani, ukampis janiw mayni sapan qhanañchatapampikix khitis jiwayatäñatak juchañchatäkaspati.

7Nayraqatax irkatirinakaw uka juchañchat jaqirux jiwayañatak qalanakamp k'upjani, ukxaruw taqpach markachirinakax k'upjarakini. Ukhamat uka jan wali luräwinak jumanak taypit tukjapxäta.

8“Kawkïr ch'axwanakatix jan taripkayänixa, kuna jiwayasiñxatsa, nuwasiñxatsa, janchi usuchjasiñxatsa, jan ukax, kuna jan walinakas markaman utjkani ukkhaxa, Tatit Diosamax ajlliski uka chiqaruw sarapxäta,

9ukatsti levita sacerdotenakampiru, kawkïri taripiritix uñjañapäki jupampiruw uka ch'axwanak yatiyapxarakïta, jupanakaw uka juchañchañ tuqinakat uñjani,

10jumanakasti, jupanakax sapkani ukhamarjamaw phuqhapxäta, kawkïr juchañchäwtix jupanakax arsupkani ukhamarjama, jan kunsa maysar uñtayasa.

12Ukampisa jumanakat kawkïritix, jach'a jach'a tukuñampi Diosan luqtirip sacerdoten arsutaparu, jan ukax taripirin arsutapar jan ist'kanixa, uka jaqisti jiwayatäñatak juchañchatäniwa. Ukhamat jumanakax ñanqha luräwinak Israel markan tukjapxäta,

13markankir jaqinakax ukanak yatisin taqiniw axsarapxani, jach'a jach'a tukuñanak apanukupxarakini.

14“Tatit Diosamax churapkätam uka uraq katuntapkäta, ukatsti markanakaman utjantasxapxäta ukapachax sapxarakisma: ‘Nanakar apnaqañapatak mä reyinïñ munapxta, kamisatix nanak jak'ankir markanakan reyix utjki ukhama’ sasa.

15Ukhamäni ukaxa, kawkïr jilamarutix jumanak taypit Tatit Diosamax ajlliskani ukarukiw reyit utt'ayasipxäta. Janiw mä yaqha markat jutir jaqirux reyit utt'ayasipxätati, jan ukasti marka masimarukiw reyit utt'ayasipxäta.

16Ajllitäkani uka reyisti janiw walja caballonak alañapäkiti, janirakiw jaqinaksa Egipto markar khithañapäkiti caballeriap yapxatañatakixa; Tatitusti jumanakarux sapxtamwa: ‘Jan mayampis uka thakhinjam kuttapxamti’ sasa.

17Janiw uka reyix walja warminïñapäkiti, jupan Tatitut jan maysar saranukuñapataki; janirakiw sinti walja quripasa, qullqipas utajañapäkiti.

18“Kunapachatix reyix qunuñapar qunt'asxani ukkhasti, levita sacerdotenakax katki uka nayrïr qillqatat aka yatichäwinak qillqaqayasini.

19Ukatsti jupampi chikpun uka qillqatanak apnaqasini, jakañapkamasti sapüruw uka kamachi ullarani, Tatit Diosapar yupaychañ yatiqañapataki, taqi uka yatichäwinak axsartañ chuymampi imañapataki, uka kamachi arunakarjam sarnaqañapataki,

20israelita jila masinakap taypin jach'a jach'a jan tukuskañapataki, uka kamachi arunakatsa jan maysar saranukuskañapataki. Reyitix aka yatichäwinakarjam sarnaqanixa, jupasa, wawanakapasa, walja maranakaw Israel marka apnaqapxani.

← Chapter 16 Chapter 18 →