Deuteronomy 10

aymara-1997

1Moisesasti saskakïnwa: “Ukapachaw Tatitux nayar sarakitu: ‘Qalat lurat pä tablanak wakichasim, nayrïr tablanakjama, ukxarusti lawat mä arca luram, ukatsti nayamp parliri qullur makhatanim.

2Nayaw uka tablanakar wasitat qillqä, p'akjktas uka nayrïr tablanakar qillqatäkän uka pachpa kamachi arunaka, ukatsti uka tablanakxa arcaruw imxarakïta’ sasa.

3“Ukatsti nayax acacia lawat mä arca lurta, uka pä tablanak qalat k'utharakta, ukatsti ukanak apt'ataw qullu patar makhatawayta.

4Tatitusti uka tablanakaruw Tunka Kamachinak qillqantäna, kamisatix nayrïr kutix lurkatayna ukhama, kunürutix taqpachani tantachaskäyätan, qullu patan nina taypitpach jumanakar parlapkäyätam ukapacha. Ukat uka tablanak nayar churitu,

5ukatsti nayax qullut saraqanxasinxa; lawat lurat arcaruw uka tablanak uchta, kunjämtix Tatitux siskitu ukhamarjama, ukan jichhakamas imatäskaraki” sasa.

6Israelitanakasti Beerot-bené-jaacán sat chiqat mistuwayasax Moserá sat chiqaruw puripxi. Uka chiqan Aarón chachax jiwxäna, amayapsti ukan imt'xapxarakïna, ukatsti Eleazar yuqapaw jupa lanti sacerdotexäna.

7Uka chiqat mistuwayasinxa Gudgoda sat chiqaruw puripxäna, Gudgoda chiqatsti Jotbata tuqiruw sarapxarakïna, kawkhantix walja jisk'a jawiranakax utjki ukaru.

8Ukapachaw Tatitux Leví ayllurux ajllïna, suma arust'äwi arca apañapataki, Tatitun nayraqatapankapxañapataki yupaychäwinak luqtañataki, jupan sutipxar aski waxt'äwinak churañataki, kamisatix jichhürkam lurasipki ukhama,

9ukat Leví ayllunkirinakax jilanakap taypin jan uraqinïpkiti, jupanakan katuqäwipax Tatituwa, kamisatix Tatitux arskäna ukhamarjama.

10“Nayasti pusi tunka urumpi pusi tunka arumampiw Horeb qullunkäyäta, kamisatix nayrïr kutin qullu patan jikxataskäyät ukhama, Tatitusti ist'ituwa, ukat jumanakarux jan t'unjapktamti,

11jan ukasti, Tatitux situwa: ‘Sartasim, markan nayräxap sarantañatak wakicht'asim, kawkïr uraqtix awkinakamar churañatak nayax arskta uka uraqi katuntapxañamataki’ sasa.

12“Jichhasti israelit jaqinaka, ¿kunarak Tatitu Diosamasti jumanakan lurapxañam munisti? Jupax jupar jach'añchañanakam muni, jupan thakhipanjam arkañanakama; ukatsti jupar munañanakama, taqi chuymamampi, taqi jakañamamp jupar yupaychañanakama,

13kusisit sarnaqapxañamatakisti, kamachi arunakapa, kamachinakap phuqhañanakam muni.

14Amuyapxarakim, jumanakan Tatit Diosamankiw alaxpachasa, alaxpachan alaxpachapasa, uraqisa, taqi kunatix ukan utjki ukanakasa.

15Ukampis Diosax jumanakan awkinakamaruw ajllïna, jupanakarux munasirakïnwa, ukatsti taqi markanak taypit jupanakan wawanakaparuw ajllirakïna, ukanakasti jumanakäpxtawa, kamisatix jichhürun uñjaski ukhama.

16“Suma arust'äwin chimpup chuymanakamar uchapxam, jan juk'amp chuymanakam qalarayasipxamti.

17Jumanakan Tatit Diosamax diosanakan Diosapawa, tatitunakan Tatitupawa; jach'a ch'amani, axsarkay Diosawa, janiw jaqir yaqha yaqha uñjkiti, janirakiw churäwinakampi alayaskiti.

18Jupasti chiqa kankañampiw wajcharusa, ijmarusa uñji, jumanak taypin jakki uka jan uñt'at jaqirux munasiwa, manq'ayiwa, isi churaraki.

19Jumanakasti munasiñ chuymampiy yaqha markat jutir jaqirux khuyapayapxam, jumanakax Egipto markan yaqha markankir jaqjam sarnaqapxatam layku.

20“Tatit Diosamar jach'añchapxam, jupa saparuk yupaychapxarakim; jupar jaysirïpxam, juramento lurapkäta ukkhasti Diosan sutipxar lurapxam.

21Juparukiw q'uchunak q'uchupxäta, jupakiw jumanakan Diosamaxa, jumanak laykuw jumanakan uñjkañ jach'a muspharkañanak luraraki.

22Nayra awkinakamax paqallq tunkanikiw Egipto markar puripxäna, ukampis jichhax Tatit Diosamax alaxpach warawaranakjam waljaniruw tukuyapxtam.

← Chapter 9 Chapter 11 →