Deuteronomy 11

aymara-1997

1Moisesasti saskakïnwa: “Jumanakax Tatit Diosamar munasipxam, ukatsti iwxanakapa, kamachinakapa, arsutanakapsa phuqhapxarakim.

2Tatit Diosaman chiqachäwinakap jichhürun uñt'apxam, wawanakamax uka chiqachäwinak janiw uñt'apkiti uñjapkarakisa. Jach'a kankañapampi, ch'amapamp uñt'apxam,

3ukhamaraki, kunjämtix Egipto markan faraón reyitaki, taqpach markapatak sayt'askäna, jach'a uñacht'äwinaka, muspharkay luräwinak lurkarakïna ukanaksa,

4kunjämtix egipcio ejercitoru, caballonakaparu, nuwasiñ carronakapar lurkarakïna ukanaka, kunjämtix jumanakar arktanipan Mar Rojo umanak manqhar jupanakar chhaqtaykäna ukanaka. Diosaw jupanakarux jan mayampitak t'unjäna.

5Ukatsti taqi kunanaktix jumanakatak wasaran lurki aka chiqar jumanakar puriyaniñkama taqi ukanakat amtasipxarakim;

6ukatsti kunjämtix Datanampiru, Abiramampiru Rubenat saraqir Eliab chachan wawanakaparux lurkäna ukanak amtasipxam; kunjämtix jupanakatak uraqix jist'artkäna, ukatsti Israel jaqinakan uñjkaña uraqix jupanakaru, wila masinakaparu, chhujllanakaparu, yänakapamppachar manq'antkäna ukanaka.

7Jumanak kipkaw Diosan jach'a muspharkañ luräwinakap pachpa nayranakamamp uñjapxtaxa.

8“Jumanakasti jichhürun churapksma uka kamachi arunakarux phuqhapxamaya, ukhamat ch'amañchasisin uka uraqinak katuntasipxañamataki,

9ukatsti walja maranak uka uraqin jakapxañamataki, kawkïr uraqtix Diosax nayra awkinakamar arupamp arskatayna wawanakapar churañataki, kawkhantix lechesa, misk'is umjam jalaski uka uraqina.

10Katuntapkäta uka uraqix janiw Egiptot mistunipkta uka uraqjamäkiti; khä markan jumanakax yapuchapxäyätawa, ukatsti kayumpiw qarpapxäyätaxa, kamisatix huertanakan luraski ukhama,

11ukampis katupkäta uka uraqix wali qullunakani, qhirwanakan uraqiwa, alaxpach jallumpi qarpat uraqirakiwa.

12Tatitu Diosaw uka uraqi uñjaski, marpacharakiw jupax uñch'ukisinki.

13“Jumanakatix jichha uruna churapksma uka kamachi arunakaru phuqhapxäta, ukatsti Tatit Diosamar munasipxäta, ukat taqi chuymampi, taqi jakañamampi yupaychapxarakïta ukkhaxa,

14jupaw wakisitapar nayra jallsa qhipa jallsa apayanipxätam, jumanakan trigo, aceite, vino apthapipxañamataki,

15ukhamat jumanakax suma manq'at sarnaqapxäta, uywanakaman manq'añapatakisti pampanakaman ch'uxñanak jilayarakini.

16Ukampis jumanakax amuyasipxam, jan sallqjayasipxamti, janirak Diosat jayan sarnaqapxamti, yaqha diosanakarus yupaychapxamti, jupanakatakis alt'asipxarakimti,

17ukham lurapxasma ukaxa, Diosax jumanakatakiw q'apisispa, janiw jallux purxatkaspati, uraqisti janiw juk'ampi kuna achunak churkaspati, ukatsti Diosax churapkätam uka suma uraqinxa, jumanakax jank'akiw jiwarapxarakisma.

18“Aka arunaksti chuymanakamaru, p'iqinakamar uchapxam; mä chimpur uñtat amparamarusa, paramarus uchasipxam.

19Wawanakamar uka arunakat yatichapxarakim utamankkasina, thakhi sarkasa, ukhamarak ikintañataki, ikiñat sartañatakisa.

20Ukatsti uta punkunakamaru, markanakaman jach'a punkunakapar qillqantapxarakim;

21ukhamat alaxpachampi, uraqimpi utjañapkamax jumasa, wawanakamas walja maranak jakapxäta, kawkïr uraqtix Diosax awkinakamar churañ arskatayna uka uraqina.

22“Jumanakatix aka kamachi arunak suma amuyumpi phuqhapxäta, jichhürun sapksma ukhamarjam sarnaqapxarakïta, ukatsti suma chuymampirak Tatit Diosamar munapxäta, thakhipansa suma iyawsañamp arkapxäta ukkhaxa,

23Tatitux jumanakan nayräxanakamat taqi uka markanakaruw jaqunukuni, jumanakasti juk'amp ch'amani walja jaqinakani markanak katuntapxäta.

24Kawkharutix jumanakan kayunakamax takt'kani ukawjax jumanakankaniwa. Uraqinakaman qurpanakapax wasarat qalltasin Líbano uraqkamäniwa; ukatsti Éufrates jawirata Mar Mediterráneo jach'a qutakamäniwa.

25Janiw khitis jumanakar atipjir markax utjkaniti. Jumanakan Tatit Diosamaw kawkha chiqanjamtix sarapkäta uka markanakar axsarañat khathatiyani, Diosan arsutaparjam phuqhasa.

26“Jichha urun nayax aski waxt'äwimpita, ñanqhachäwimpita ajllisipxañamatak churapxsma.

27Jumanakatix jichhürun churapksma uka Tatit Diosaman kamachi arunakap phuqhapxätaxa, aski waxt'äwinak katuqapxäta;

28ukampis jumanakatix Tatit Diosaman kamachi arunakapar jan phuqhapkäta, yaqha jan uñt'at diosanakar arkañ laykus thakhipat saraqapxarakïta, jichhürun yatichapksma uka iwxanak apanukupxarakïta ukaxa, ñanqhachäwi katuqapxäta.

29“Tatit Diosamax kawkïr uraqtix katuntapkät uka uraqir puriyapkätam ukkhaxa, Guerizim sat qullur sarasin uka patan aski waxt'äwinak arsupxäta. Ñanqhachäwinaksti, Ebal sat qullu patanarak arsupxäta.

30Uka pä qullux Jordán jawirat inti jalanta tuqinkiwa, Guilgal sat uraqi uñkatasina, Moré sat quqanak thiyana, cananeonakax jakapki uka qhirwana.

31Jumanakax Jordán jawira makhatañampïpxtawa, Tatit Diosamax churapkätam uka uraqi katuntapxäta. Jumanakax uka uraqi katuntasin uka uraqin jakasipxarakïta ukapachaxa,

32jichhürun churapksma uka kamachinakarjama, kamachi arunakarjam taqi chuymampiy sarnaqapxam.

← Chapter 10 Chapter 12 →