Deuteronomy 9

aymara-1997

1Moisesasti saskakïnwa: “Israelit jaqinaka, ist'apxam: Jordán jawira khurkatar makhatañampïpxtawa, jumanakat sipan juk'amp jach'a ch'aman markanak katuntapxäta, ukhamarak jach'a pirqanakan uyuchrantat suma markanaksa;

2markachirinakapasti jach'a tansa jaqinakawa, Anac sat jach'a tansa jaqin saraqirinakapjama, jumanakasti aka säwi yatxapxtawa: ‘¿Khitirak Anac jach'a tansa jaqin wawanakapar saykataspasti?’ sasa.

3“Jichhasti jumanakax yatipxañamawa, Tatit Diosamaw jumanak nayram saraski, mä ninar uñtataw jumanak nayräxan uka markanakar t'unjani, jisk'achjarakini. Jumanakax uka markanakarux mä ch'ipxtanak jaqunukupxäta t'unjapxarakïta, kunjämtix Tatit Diosamax arsuwayki uka aruparjama.

4Tatit Diosamax nayraqatanakamat uka markanakar jaqunukkani ukapachaxa, jumanakax chuymanakaman jan sapxamti: ‘Jiwasan aski luräwinakas laykuw Diosax aka markanak churistu’ sasa, Diosax jupanakar juchan sarnaqatanakap laykuw uka uraqinakat jaqunukuni.

5Janiw jumanakan aski luratanakam laykuti uka uraqinak katuntapkäta, Tatitux jan wali luratanakapat uka markanakarux jumanak nayräxat jaqunukuni. Ukhamat Abraham, Isaac, Jacob nayra awkinakamar arsutap phuqhañataki.

6Jichhasti yatipxätawa, janiw Diosax jumanakan aski luratanakam laykuti uka suma uraqinak churapktamxa, chiqpachansa, jumanakax mä jan ist'asir markäpxtawa.

7“Janipun jumanakax armasipxamti wasaran Tatit Diosamar q'apisiyapxatama. Egipto markat mistunipkta uküruta, aka chiqar puriniñkamaw Diosarux saykatapxtaxa.

8Horeb qullun Diosarux q'apisiyapxtaxa, jupasti ukham wali q'apisitax niyapuniw jumanakar t'unjapxtam.

9Nayax Horeb qulluruw makhatäyäta, qalat lurat tablanak aptiri, Diosax jumanakampi suma arust'äwi lurkatayna uka qala tablanaka, nayasti pusi tunka urumpi, pusi tunka arumampiw uka qullunkäyäta jan manq'ata jan umata.

10Tatitusti ukapachaw nayarux qalat lurat pä tablanak amparapamp qillqata churanitu, kuna arunaktix jumanakar qulluna nina taypitpach parlanipkäyätam uka arunakampi qillqata, kunürutix qullun tantachaskäyätan uküru.

11Tatitusti pusi tunka urumpita, pusi tunka arumampit qalat lurat uka pä tablanak churitu, arust'äwi qillqat qala tablanaka,

12ukapachaw situ: ‘Jank'ak aka chiqat saraqawayam, Egipto uraqit irpsunkta uka markax juchan jikxatasi. Mäkiw jupanakax nayan iwxa arunakaxar phuqhañ apanukupxi, ukatsti metal umatatayasin mä dios lurasipxi’ sasa.

13“Ukatsti Diosax sarakituwa: ‘Niy uñjtwa, aka markax jan ist'asir markawa.

14Jumax sartam, nayaw aka marka t'unjä, aka uraqit chhaqtayarakï, jan mayamp amtasiñataki, ukampis jumarux jupanakat sipan ch'amani mä jach'a marka tukuyäma’ sasa.

15“Nayasti nina aqaskir qullut saraqanxta ukapachaxa, suma arust'äwi qillqat pä tablanakxa, amparaxaruw apanïyäta.

16Ukampis jumanakan ukar purisasti, Tatit nayraqatan jucha luratanakam uñjta, metalat mä dios vaca qallu uñtani lursusipxatätaxa. Tatitux uñachayapktam uka thakhit jank'akiw saranukupxatätaxa,

17ukapachaw nayax amparaxar apankta uka qalat lurat pä tablanak uraqir jaqunukta, jumanak nayräxaru jisk'a jisk'a t'unjasa.

18Uka qhipatsti Tatitun nayraqatapan killt'asta, ukatsti, kamisatix nayrïr kutix lurkta ukhamaw pusi tunka urumpi, pusi tunka arumampi jan kuna manq'ata, umas jan umt'ata ukankäyäta, jumanakan jucha luratanakam layku, Diosar ñanqhachapxatamata, q'apisiyapxatamata.

19Nayax Tatitun jumanakatak q'apisitapata, jumanakar t'unjañ munatapat wali mulljataw uñjasïyäta; ukampis Tatitux mä kutimpiw mayitaxar ist'itu.

20Ukhamarakiw Tatitux Aarón chachatak wal q'apisïna, juparusti tukjañ munäna, ukampis nayaw jupatak Tatitur mayïyäta.

21Ukatsti lurasipkatäta, jucha lurañar puriyapktam uka vaca qallu katusinxa, ninaruw jaquntäyäta, ukatsti ñut'u laq'ar tukuyasin qullut saraqanki uka jisk'a jawir umaruw warantäyäta.

22“Ukatsti jumanakax Taberá, Masá, Quibrot-hataavá uka chiqanakan Tatiturux q'apisiyapxaraktaxa.

23Ukatsti kunapachatix Tatitux Cadés-barnea chiqat sartawayapxañamatak arskäna, churapktam uka uraqi katuntasir sarañataki ukapachaxa, ukhamarakiw jumanakax arsutanakapar jan ist'apktati, janiw jupar iyawsañanakamas utjkänti, janirakiw jaysapkäyätasa.

24¡Nayax uñt'apksma ukkhatpach jumanakax Tatitur qallasipxtaxa!

25Tatitux jumanakar t'unjañ amtatayna, ukat nayax Tatit nayraqatan pusi tunka urumpi, pusi tunka arumampi killt'asta,

26achikt'asisaw juparux sarakta: ‘Dios Tatay, janikiy jumax aka markamar t'unjamti, juman markamawa, jach'a kankañampiw qhispiytaxa, jach'a ch'amamampiw Egipto markatsa irpsuntaxa.

27Amtasimay Abraham, Isaac, Jacob wawanakamata. Janiy aka markan jan ist'asirïtapa, ñanqha jaqinakätapsa, juchapsa amtasimti,

28irpsunipkista uka markan jan sasipkañapataki: Diosax janiw kawkïr uraqtix churañ amtkatayna ukar puriykxataynati, jupanakar uñisisaw wasaran jiwarayir akat irpsuwayi, sasa.

29Ukhampachas jupanakax juman markamawa, jumaw Egipto markat jach'a ch'amamampi irpsuntaxa’ ” sasa.

← Chapter 8 Chapter 10 →