2 Samuel 5

aymara-1997

1Uka qhipatsti, Israelan taqpach ayllunakapax Hebrón markarkamaw sarapxäna, Davidamp parliri, juparusti sapxänwa: “Nanakax wilamat wilanïpxtwa,

2chiqpachansa Saúl reyix nanakan reyixäkchïna ukasa, jumaw Israel markarux nuwasïwinakapan sarayaskäyätaxa. Ukhamarus Tatitux jumaruw arsuwaytam Israel markapar sarayañamataki, apnaqañamatakiraki” sasa.

3Ukhamaw Israelankir taqpach jilïr jaqinakapax Hebrón markar David reyimp parlir sarapxäna, jupasti Tatitun nayraqatapan mä arust'äwi jupanakamp lurarakïna. Ukatsti jupanakax Israelan reyipat Davidar utt'ayapxäna.

4Davidasti marka apnaqañ qalltkän ukapachax, kimsa tunka maranïnwa, jupax pusi tunka maraw markar apnaqawayäna:

5Hebrón markanxa paqallqu chikatan maraw Judá uraqin reyipäna, Jerusalén markansti kimsa tunka kimsan maraw taqpach Israel markampiru, Judá markampir apnaqawayäna.

6Uka qhipatsti, David reyimpi, jaqinakapampix Jerusalenaruw sarantapxäna, uka uraqin jakir jebuseo jaqinakar katuntañataki. Jebuseonakan amuyatapatxa, janis Davidax uka markar mantirjamäkaspa ukhamänwa, ukat jupanakax Davidar sapxäna: “Janiw jumax akar mantankätati, juykhunakampi, kayu wixchunakampikiw jumarux jarkt'apxätamxa” sasa.

7Ukampis, Davidax Sión suma utt'ayat marka katuntäna, jichhasti uka chiqax Davidan Markapat uñt'atawa.

8Uka urusti Davidax akham satayna: “¡Jebuseonakar katuntirinakax uma canalanjam mantapxpan, ukatsti juykhunakampiru, kayu wixchunakampir jiwaraypan, nayax jupanakar walpun uñista!” sasa. Ukat uka säwix utjaraki: “Janiw juykhunakasa, kayu wixchunakasa Tatitun utaparux mantkaniti.”

9Uka qhipatsti Davidax suma utt'ayat markan utjantasïna, ukarusti “Davidan Markapa” sasaw sutichäna, ukatsti uka markarux anqa thakhita, reyin utapkam pirqanakampiw uyuchrantayäna.

10Davidan munañan kankañapax juk'amp jilxatäna, taqi ch'aman Dios Tatitusti jupampïskänwa.

11Ukat Tiro markan Hiram sat reyipax Davidan ukar jaqinak khithäna; ukhamarus lawat yänak luririnaka, qala ch'iyirinak khithäna, jupanakasti cedro lawanak apapxäna, ukatsti David reyin jach'a utap utachapxäna.

12Ukapachaw Davidax Tatitun jupar Israelan reyipat utt'ayatap amuyasïna, ukhamarak marka apnaqäwip Israel markapar munasitap layku jiltayatapa.

13Davidax Hebrón markat Jerusalenar jakiriw sarxäna. Ukansti, Davidax juk'amp warminaka, uñt'atanak katusïna, jupanakasti Davidatakix juk'amp yuqanaka, phuchhanak yurirapipxäna.

14Jerusalenan yurir wawanakapan sutininakapasti akanakawa: Samúa, Sobab, Natán, Salomón,

15Ibhar, Elisúa, Néfeg, Jafía,

16Elisamá, Eliadá, Elifélet ukanaka.

17Filisteonakax Davidan Israel markxar reyit utt'ayatäxatap yatisasti, jupanakax taqiniw Davidar thaqtir sartapxäna; Davidasti uk yatisin imantasiñ chiqaruw sarxäna.

18Filisteonakasti sarantasipkakïnwa, ukatsti Refaim sat qhirwa katuntapxäna.

19Ukat Davidax Tatitur yanap mayisin jiskt'asirakïna: —¿Filisteo jaqinakar katuntiristti? ¿Jupanakar atipjayitätati? —sasa. Tatitusti ukxaruw sarakïna: —Jïsa, katuntaskakim, nayaw jupanakar atipjañamatak yanapäma —sasa.

20Ukat Davidax Baal-perasim chiqar purïna, ukawjan filisteonakarux atipjäna. Ukat sarakïna: “Jalir umar uñtataw Tatitux uñisirinakax taypin thakhi jist'ararapitu” sasa. Uka chiqarusti Baal-perasim sasaw sutichäna.

21Filisteo jaqinakasti jaltxasax idolonakap pachparuw apanukusiwayapxatayna, Davidampi jaqinakapampisti ukanak apthapipxäna.

22Ukampis filisteonakax uka Refaim qhirwa katuntir kuttanipxarakïnwa.

23Davidasti wasitat Tatitur jiskt'asïna, Tatitusti juparux sarakïnwa: —Janis jupanakar nayräxat nuwantkam, jan ukasti, jupanakar muyuntam, bálsamo quqanakäkis uka chiqar purisin qhipäxat jupanakar katuntäta.

24Uka quqanak patan jaqi sarnaqirjam suxuqir ist'käta ukapachasti, jupanakar ch'amampiw katuntäta, nayaw juma nayraqatam sarantaskä, filisteonakar jiwarayañkam katuntañataki —sasa.

25Davidasti Tatitun arsutaparjamaw luräna, ukürusti filisteonakar atipjarakïnwa, Gueba sat chiqata Guézer sat chiqakama.

← Chapter 4 Chapter 6 →