2 Samuel 4

aymara-1997

1Saúl reyin Is-bóset yuqapasti, Abner chachan Hebrón chiqan jiwatap yatisinxa, ch'am thayjtayasïna, taqinirakiw Israel markan axsarayasipxäna.

2Is-bóset jaqix pani yanapirinïnwa, uka jaqinakasti mä tama lunthatanakan jilïripänwa. Maynïrix Baaná sata, maynïristi Recab sataraki. Jupanakasti Beerot chiqankir Rimón sat jaqin yuqanakapänwa, Benjaminat saraqir wawanakänwa, Beerot markax Benjamín ayllunkirïkaspa ukhamänwa,

3Beerot markankirinakax Guitaim chiqaruw jaltxapxatayna, ukat jichhakam ukan jakasipki.

4Saúl reyin Jonatán yuqapax mä wawanikïnwa, Mefi-bóset sata, jupasti paypach kayut suchünwa. Kunapachatix Mefi-bosetax phisqa maranïkän ukkhaxa, Jezreel chiqat mä yatiyäwiw purinïna, Saúl reyimpina, Jonatanampin jiwatapata; uk ist'asaw wawa uywir warmix Mefi-bóset wawar ichxaruwayasin jaltxäna, ukampis ukham jank'ak jaltxasaw wawax tinküna, ukat ukham suchuptäna.

5Beerot chiqankir Rimón chachan Baaná, Recab yuqanakapasti Is-bóset jaqin utaparuw sarapxäna, ukatsti wali lupt'ankän uka chika uruw puripxäna, Is-bosetax manq'añ tukuyasin ikt'askän ukapacha.

6Uta uñjir warmisti trigo khuyskäwiw jupax ikjawayatayna, ukhamat Recab sat chachax Baaná jilapamp utar jan khitinsa uñjkat mantapxäna.

7Uta manqhar mantapkän ukkhasti Is-bóset jaqirux ikiñapan ikiskir jikxatapxäna; ukatsti mä cuchillompi purakapat chhuqhuntasaw jiwayapxäna, p'iqi apaqapxarakïna, uka qhipatsti jan khitin uñjkataw jaltawayxapxäna, p'iqi apasipxarakïna, ukatsti uka arum paqariw Arabá thakhinjam sarapxäna,

8Hebrón markar purisasti, Is-bóset jaqin p'iqip Davidar katuyapxäna, akham sasa: —Munañan rey, akax Saúl uñisiriman Is-bóset yuqapan p'iqipaxa, jupax jumar jiwayañ amtäna. Ukampis jichhürux Dios Tatituw muni juma jach'a reyin Saúl reyimpita, wawanakapampit phuqsusiñama —sasa.

9Davidasti ukxaruw sarakïna: —Taqi llakisiñanakat nayar qhispiyir Tatitun sutipxaruw juramentompi sapxsma,

10kunapachatix maynix Saúl reyin jiwatapat mä suma yatiyäwïkaspa ukham amuyasin nayar yatiyir jutkatayna ukkhax, juparux katuntasaw Siclag chiqan jiwayta.

11¡Jichhax ukat sipan juk'ampi juma ñanqha lurir jaqinakarux mutuyapxäma, mä jan juchan jaqir pachpa ikiñapan ikiskirir jiwayapxatamata! Ukhamasti, ¡jichhax nayaw uka jaqin jiwatapat jumanakarux jucham uñt'asiyapxäma! ¡Aka uraqit jan mayan chhaqtayapxarakïma! —sasa.

12Davidasti ukspachaw jilïrinakapan Baaná jaqimpiru, Recab jaqimpir jiwayapxañapatak arsüna; jilïrinakasti uka jaqinakan amparanakapsa, kayunakapsa khuchhuqapxänwa, janchinakapsti Hebrón marka uma imañäwja jak'aruw warkuranipxäna. Ukampis Is-bóset jaqin p'iqipxa, Hebrón markan Abneran sepulturaparuw imt'xapxäna.

← Chapter 3 Chapter 5 →