2 Samuel 6

aymara-1997

1Davidax wasitat Israel markat ajllit soldadonakar taqpachanir tantachthapïna, jupanakasti kimsa tunka waranqanïnwa,

2ukatsti jupanakampiw Judá uraqinkir Baalá chiqat mistuwayäna, Tatitun arust'äwi arcap Jerusalenar apxañataki, uka arca nayraqatana, querubines sat chhiqhaninak taypin qunt'ata taqi ch'aman Tatitut mayisitarakixa.

3Tatitun arcapasti Abinadab sat jaqin utapankänwa. Uka utasti mä jisk'a qullu patankänwa. Uka utat arca apsusinsti, mä machaq carreta patxaruw uchapxäna, uksti Abinadaban Uzá, Ahió sat yuqanakapaw apapxäna. Ahió chachasti arca nayräx saräna.

5Ukchañkamasti Davidampi taqpach israelitanakampix, wali kusisitaw Diosan nayräxap sarapxarakïna, taqi ch'amapamp q'ucht'asisa, thuqt'asisa, arpanakampi, salterionakampi, panderonakampi, castañuelanakampi, platillonakampi kusist'asisa.

6Nacón chachan uraqipar purisasti, carreta qatatir vacanakax lanktasipxänwa, Tatitun arcapasti niyapuniw jalaqtäna, ukat Uzá jaqix arca katthapiñatak amparap luqtäna.

7Ukampis Diosax ukham amparap luqtatap laykuw Uzá chachatakix q'apisïna, juparusti pachparuw jiwayäna, Uzá jaqix Tatitun arcap jak'arpachaw jiwat uñjasïna.

8Davidasti Tatitun Uzá jaqir ukham jiwayatapat phiñasïnwa, ukat jupax uka chiqar Peres-uzá sasa sutichäna, ukasti jichhürkamaw ukham sutichatäski.

9Ukürusti Davidax Tatit nayraqatan axsaränwa, jach'at sarakïna: “Tatitun arcap apañaxax janiw wakiskpachati” sasa.

10Ukat Davidax Jerusalén markar Tatitun arcap jan apañ munkxänti, ukhamasti Gat chiqan jakir Obed-edom sat jaqin utaparuw jaytayanxäna.

11Kimsa phaxsiw Tatitun arcapax Obed-edom sat jaqin utapankäna. Tatitusti juparusa, taqpach wila masinakaparus aski waxt'äwinakampiw phuqt'äna.

12Kunapachatix Davidar yatiyapxäna, kunjämtix Tatitux Obed-edom jaqimpiru, taqi wila masinakapampir aski waxt'äwinakamp phuqt'katayna arcan utapankatap layku, ukapachasti Davidax jach'a kusisiñampiw Diosan arcap Obed-edom jaqin utapat aptawayxäna Davidan Markaparu.

13Tatitun arcap apirinakasti, suxta chillqiki sartasipktayna ukapachaw, Davidax mä urqu vacampi, mä lik'i urqu ovejamp wilañcha luqtäna.

14Davidax taqi ch'amapampiw Tatit nayraqatan thuqt'asïna, efod sat lino isimpi isthapita.

15Ukhamaw, Davidampi, taqpach israelitanakampix kusisiñat wali arnaqt'asisa, trompetanak phust'asis Tatitun arcap Jerusalenar apapxäna.

16Tatitun arcapax Davidan Markapar purxän ukapachasti, Saúl reyin Mical sat phuchhapax ventanat uñtasinïna; David reyir Tatitun nayraqatapan t'isktiri, thuqt'iri uñjasinsti, chuymapan walpun Davidarux jisk'achäna.

17Tatitun arcapax mä chhujllaru apatäxänwa, Davidaw uka chhujlla wakichatayna. Ukatsti Davidax jank'akiw nakt'at waxt'anaka, sumankthapiñ wilañchanak Tatitun nayraqatapan luqtäna,

18uka wilañchanak luqtañ tukuyxasinsti, taqi ch'aman Tatitun sutipxaruw markpachatak aski arunak arsüna,

19ukatsti ukan tantachat israelit jaqinakarux, sapa mayni chacharu, warmiru, mä t'ant'kam lakiräna, dátiles achunakat lurat tortampi, waña uvanakat lurat tortampi. Uka qhipatsti taqiniw utanakaparkam kuttawayxapxäna.

20Davidasti utaparuw kuttawayxäna, wila masinakapar aski waxt'äwi arunak churañataki; ukampis Saúl reyin Mical phuchhapaw jupar jikxatir mistunïna, ukatsti sarakïnwa: —¡Israel markan reyipax jichhürux ukkha sumsa lurixä, jilïr jaqinakapan uywat warminakap nayraqatan jan p'inqan jaqir uñtatas tukuxä! —sasa.

21Davidasti ukxaruw sarakïna: —Jïsa, thuqt'asiskapuntwa, Tatitun nayraqatapan thuqt'asta, jupaw nayarux awkim lanti, taqi utamankirinakam lanti ajllisitu, Israel markapan nayan jach'a jilïrïñaxataki. Ukat jupa nayraqatan thuqt'asta.

22Ukat juk'ampi nayax, nayramatak jisk'ar tukuskakïwa, ukampisa, khiti uywat warminakattix jumax parlkta, ukanakax jach'aruw aptapxitani —sasa.

23Tatitusti Saúl reyin Mical phuchhaparux mutuyänwa; jupasti jakañapan janiw mä sapa wawanïkänsa.

← Chapter 5 Chapter 7 →