1 Kings 9

aymara-1997

1Kunapachatix Salomón reyix Diosan utapampi, reyi utampi, ukhamaraki taqi kunanaktix jupax lurañ munkäna ukanak tukuyxäna ukkhaxa,

2Tatituw jupar payïr kutin uñstäna, kunjämatix Gabaón chiqan uñstkatayna ukhama,

3ukat sarakïna: “Nayax mayisitamsa, achikt'asitamsa ist'smawa, ukatsti nayan sutix wiñay ukankañapatak aka uta utacharapkista ukxa qullanañchtwa. Nayasti uñtanïwa, chuymaxas ukankarakiniwa.

4Jichhasti, jumatix nayraqataxan David awkimjam sum sarnaqäta, jan kamskay chiqa chuymamampi, arsutaxarjam taqi kuns lurarakïta, ukatsti kamachinakaxarusa, arsüwinakaxarus ist'arakïta ukaxa,

5nayax wiñayatakiw Israel marka apnaqañamatak reyi qunuñam utt'ayä, David awkimar arsutaxarjama, kunapachatix jupar siskäyäta: ‘Israel markar apnaqañ reyi qunuñamas jumat saraqir wawamatakix utjapuniniwa’ sasa.

6Ukampis jumanakampi, wawanakamampitix nayat saraqapxitäta, churapksma uka kamachinakaxarusa, arsutanakaxarus jan phuqhapkäta, jan ukasti yaqha diosanakaruk luqtapxäta yupaychapxarakïta ukaxa,

7nayax Israel markarux jupanakar churat uraqitxa apanuküwa, qullanañchkta uka qullan utsa nayraqataxat apanuküwa, Israel markasti taqi markanakatakis larusiñatakïniwa.

8Aka utasti laqayanakar tukuyatäniwa, uka chiqanjam sarir jaqitakisti mulljaskayäniwa, jupasti larusisin sarakini: ‘¿Kunatarak Tatitusti Israel markaru, ukhamarak aka utarusa ukham lurpachasti?’ sasa.

9Ukxaruw jupar sapxani: ‘Tatit Diosaparuw jaytanukupxi, khititix nayra awkinakaparu Egiptot apsunkäna ukaru, ukatsti jupanakax yaqha diosanakaru yupaychañataki, ukanakaru luqtañatakiw katuyasipxäna; ukat Diosax aka jach'a jan walt'añanak jupanakxar apayani’ ” sasa.

10Pä tunka maranakaw sarakipxäna Salomonan paypach utanak lurayatapatxa, ukanakasti Tatitun utapampi, reyin jach'a utapampïnwa,

11uka uta lurañatakisti, Tironkiri Hiram reyiw Salomón reyir cedro, pino, lawanak apayanitayna, ukhamaraki qawqhtix quri munkäna uka. Salomón reyisti Hiram reyirux Galilea uraqinkir pä tunka markanak churarakïna.

12Ukampis kunapachatix Hiram reyix Salomón reyin churat markanak uñjir sarkatayna ukkhaxa, uka markanakax janiw chuymapar purkirïkänti,

13ukat säna: “Jilata, ¿kunjäm markanakarak churistasti?” sasa. Ukat kawkha uraqinkkäntix uka chiqarusti Cabul sasaw sutichäna, ukasti “jan kunataki aski” sañ muni, jichhakamaw uka sutinïski.

14Hiram reyix Salomonar quri apayatayna, uka quristi kimsa waranqa llätunka patakan suxta tunka kilonakänwa.

15Salomón reyix markaparuw lurañatak wayt'äna, Tatitun utap lurayasa, jupan reyi utapa, markar makhatañapa, Jerusalenan pirqapa lurayasa, ukhamaraki Hasor, Meguido, Guézer markanak wasitat askichayasa.

16Guézer markxa Egiptonkir reyiw purintasin katuntatayna, uka marksti nakhantayänwa, uka markan jakir cananeo jaqinakarux taqpachaniruw jiwarayäna, qhipa pachanakatsti, phuchhaparuw uka marka churäna, jupasti Salomonan warmipänwa.

17Ukat Salomonax Guézer marka, ukhamaraki aynach tuqinkir Bet-horón marka wasitat lurayäna,

18Balaat, Tamar sat markanakampi Judá wasarana.

19Ukhamarusa, kawkhanakarutix manq'añanak imapxirïki uka markanak wasitat lurayäna, ukxarusti nuwasïwir sarañ carronak imaña, caballería imañ cuartelanak wasitat lurayarakïna. Taqi kuntix Salomonax Jerusalenana, Líbano uraqinsa, jupan apnaqat uraqpachan lurañ amtkatayna ukanakxa lurayänwa.

20Kawkïri jaqinakatix qhiparapkatayna amorreonakata, hititanakata, ferezeonakata, heveonakata, jebuseonakatsa, jani israelitäpkäna,

21uka jaqinakat saraqirinakarux israelitanakax janiw tukjirjamäpkänti, Salomonasti uka jaqinakarux wali ch'ama lurañanakaruw uchäna, jichhürkamas ukhamäsipkiwa.

22Ukampis janiw khiti israelita jaqirusa uka jaqinakarjam irnaqaykänti, jan ukasti, jupanakarux yaqha irnaqäwitakiw uchäna, soldadotaki, yanapiritaki, jilïritaki, nuwasïwir sarañ carronakana, caballerianakan jilïrinakapataki.

23Salomonax irnaqäwinak phuqhayir chachanak uchäna, jupanakasti phisqa patak phisqa tunkanïnwa, jupanakaw jaqinakarux lurañanak sarayapxäna.

24Faraonan phuchhapasti Davidan markapat sarxänwa, Salomonax jupataki jach'a uta lurkatayna ukaru. Ukatsti reyix inti jalsu tuqit markar makhatañatakix laq'ampiw phuqhantäna.

25Salomonasti Tatitutaki luraykatayna uka altar patxanxa, maran kimsa kutiw nakt'at wilañchanaka, sumankäwi waxt'äwinak luqtirïna, Tatitun nayraqatapansti inciensonak nakt'ayirïna. Ukhamaw Tatitun utapa lurañax tukuyasïna.

26Salomón reyix Esión-guéber markan barconak lurarakïna, uka markasti Elat chiqa jak'an jikxatasi, Edom uraqina, Mar Rojo quta iranana.

27Hiram reyisti barconak sum apnaqiri, qutsa sum uñt'iri jilïrinakaparuw barconakat khithäna, Salomonan yanapirinakapamp chika,

28ukat Ofir chiqaru purisinsti, quri apsupxäna niya tunka pusin waranqa kilo, uksti Salomón reyitakiw aparapipxäna.

← Chapter 8 Chapter 10 →