1 Kings 10

aymara-1997

1Sabá markankir reinax Salomón reyin aytat kankaña jikxatatapata ist'atayna, Tatitur jach'añchañataki, ukatsti jupax Jerusalenaruw saräna, wali ch'ama jiskt'anakamp Salomonar yant'añataki. Jupasti wali k'achachataw Jerusalenar purïna, amuyt'ayirinakapamp chika, camellonakax suma q'apkir qullanakampi, walja qurimpi, wali k'ajkir qalanakamp khumuntatänwa. Salomonan ukar purisinsti, jiskt'añatak amtkatayna ukanak jiskt'äna.

3Salomonasti taqi uka jiskt'anakaparuw arusxatäna, taqi jiskt'arupuniw arusxatäna.

4Sabá markankir reinasti Salomonan yatiñ kankañap uñjasina, ukhamarak utachaykatayna uka uta uñjasina,

5manq'añapar wali suma manq'añanak uchapxatapa, yanapirinakapan qunuñanakap uñjasinsa, uywatanakapana, coperonakapan isinakap uñjasinsa, Tatitun utapan waxt'äwinak luqtatap uñjasinsa, walpun muspharäna,

6ukat reyirux säna: “Kuntix markaxan ist'kta juman luratanakamata, yatiñ kankañamatsa ukax chiqawa;

7ukampis nayax janiw iyawskäyätti, jichhax pachpa nayraxampiw uñjta, chiqapunïskataynawa. Chiqpachansa, kuntix yatiyapkitu ukax janiw chikataparükisa. ¡Juman yatiñ kankañamaxa, utjir yänakamasa, nayax yatkäyäta ukatsa juk'amp jilawa!

8¡Warminakamax wali kusisitäpxpachawa, aka uywatanakamas juma thiyan yatiñan arunakam isch'ukisax wali kusisitaw jikxatasipxpacha!

9¡Tatit Diosamax jach'añchatäpan, jupasti jumarux askiruw uñjtam, Israel marka apnaqäwipsa katuyaraktam! ¡Tatitux Israel markar wiñay munasitap laykuw reyit uchtam, chiqa aski kankañampi apnaqañamataki!” sasa.

10Ukatsti jupax kimsa waranqa llätunk pataka suxta tunkan kilo quri reyir churäna, walja suma q'apkir qullanakampi, suma munkañ k'ajkir qalanakampi. Janipuniw kunapachas Israelan uka suma q'apkir qullanakax uñjañäkänti, kunjämtix Sabá chiqankir reinax Salomón reyir churkän ukhamxa.

11Ukhamarusa, Hiram reyin barcopax Ofir chiqat quri apankatayna ukasti, uka chiqat sándalo sat walja lawanakampi, suma k'ajkir qalanakamp apanirakïna.

12Reyisti uka sándalo lawanakampix Tatitun utapatakiw makhatañanakan katthapisiñanakap luräna, ukhamaraki reyin jach'a utapatakisa, ukatsti música toct'irinakatakix arpanaka, salterionaka lurarakïna. Janipuniw ukataq sándalo lawax purirïkataynati, janirakiw jichhürkamas ukham uñjañäkänti.

13Salomón reyisti Sabá markankir reinarux kuntix mayiñ munkatayna taqi ukanak churäna, ukhamarus chuymapatjam yaqha churäwinak reinatak wakichkatayna ukanakamp churarakïna. Uka qhipatsti reinax yanapirinakapamp chikt'ataw uraqipar kutt'awayxäna.

14Salomón reyix sapa maraw niya pä tunka payani waranqa kilo quri katuqäna,

15ukarusti janiw jakhutäkänti alakip luririnakampina, Arabiankir reyinakampina, marka apnaqirinakampin qullqi churatapaxa.

16Salomón reyix quritkamak pä patak jach'a jark'aqasiñanak lurayäna, sapa mayarusti suxta kilo quriw mantäna.

17Ukxarusti kimsa patak jisk'a jark'aqasiñanak lurayarakïna, sapa mayarusti mä kilo chikatan jila quriw mantäna, ukanaksti “Bosque del Líbano” sat reyi utaruw uchäna.

18Ukxarusti marfil qalat mä jach'a qunuñ lurayarakïna, ukarusti qurimpiw patxat lip'ikipayäna.

19Uka qunuñasti suxta makhatañanïnwa; qhipäxapasti patäxa tuqirux muruq'ünwa, qunuñan purap thiyanakapansti amparanakap thijmt'asiñatakiw uchatäna, uka jak'ansti pä sayt'at leonanakaw utjäna.

20Ukxarux tunka payan sayt'at leonanakaw utjarakïna, suxta makhatañanak thiyana. ¡Janipuniw kawkha markansa ukham suma qunuñ lurapkataynati!

21Ukhamarusa, reyin taqpach qirunakapax quritkamakïnwa, “Libanonkir Ch'umi” sat jach'a utan utjir chuwanakapasa qurit luratkamakïnwa. Janiw qullqit lurat yänakax utjkänti, Salomonan urunakapanxa qullqit lurat yänakax janiw yäqatäkänti.

22Salomón reyin barconakapax Hiram reyin barconakapamp chikaw sarapxirïna, ukatsti sapa kimsa maraw Tarsis markat quri, qullqi, marfil apanipxirïna, ukhamaraki mononaka, pavo real, ukanaksa.

23Salomón reyix uksa uraqin jakir taqi reyinakat sipan juk'amp yatiñanïnwa, sinti qamirirakïnwa.

24Taqi jaqinakaw jupar uñjañ munapxäna, ukhamaraki kuna yatiñ kankañtix Diosax churkatayna ukanak ist'añsa,

25ukatsti jupatakix taqiniw sapa mara mä churäwi aparapipxäna: qullqi, quri yänaka, isinaka, nuwasiñ yänaka, suma q'apkir qullanaka, caballonaka, mulanaka.

26Salomonax carronakampi, caballonakat sarir jaqinakamp tantachäna. Jupax waranqa pusi patakan carronïnwa, caballot sarir jaqinakapasti tunka payan waranqanïnwa. Yaqhipanakax nuwasïwir sarañ carronaka uchaña cuartelanakankänwa, mayninakasti Jerusalenan reyir uñjiritak uchatänwa.

27Reyix Jerusalenan qalar uñtat walja qullqi utjañap munäna; cedro lawanakasa ch'uminkir higo alinakar uñtat walja utjañapa munarakïna.

28Salomonatakisti caballonakax Egipto, Cilicia uka markanakat apatänwa, reyin alakipir jaqinakapaw uka chiqat alanipxirïna.

29Egipto markat apanit mä carron alapax suxta patak qullqïnwa, mä caballosti patak phisqa tunkan qullqirakïnwa. Hitita reyinakasa, sirio reyinakasa, Salomonan alakip lurir jaqinakapat carronaka caballonaka alasipxirïna.

← Chapter 9 Chapter 11 →