1 Kings 17

aymara-1997

1Elías profetax Galaad uraqinkir Tisbé markankirïnwa. Mä urusti jupax Ahab reyiruw säna: “¡Israelan Tatit Diosap laykuw juramentompi arsta, jupan luqtiripätwa, janiw aka maranakan jallusa, sullasa purxatkaniti, kunapachatix nayax siskä ukkhakama!” sasa.

2Ukat Tatitux Eliasar säna:

3“Akat sarxam, inti jalsu tuqiru, ukatsti Querit jawir thiyar imantasinxam, ukasti Jordán jawirat inti jalsu tuqinkiwa.

4Ukan jumax uka umat umasiskäta, nayaw cuervo jamach'inakaru sista, jumataki manq'a apaniñapataki” sasa.

5Eliasasti Tatitun arsutaparjamaw luräna, jupax Querit jawir thiyan jakiriw sarxäna, Jordán jawirat inti jalsu tuqina.

6Cuervo jamach'inakaw qhantatinakasa, jayp'unakasa jupatakix t'ant'ampi aychampi aparapipxirïna. Umsti uka jawirat jupax umäna.

7Ukampis mä qawqha urunakatxa, uka jawirax wañt'xänwa, uka uraqin jallux jan puritap layku.

8Ukat Tatitux Elías profetar säna:

9“Sartasim, Sarepta markar sarxam, Sidón uraqina, ukat ukan jakäta. Nayaw ukan jakir mayni ijma warmir sista, jumar manq'a churañapataki” sasa.

10Eliasasti sartasisin Sarepta markaruw sarxäna. Marka mantañawjar purisinsti, Eliasax mä ijma warmiruw uñjäna, lawanak apthapisiskiri. Ukatsti uka warmir jawsasin säna: —Mama, mä juk'a umay umt'añatak waxt'ita —sasa.

11Uka warmix niyaw uma aptir saraskäna, Eliasasti wasitat jawsasin jupar säna: —Mä jisk'a t'ant'amp kunay apanirapita —sasa.

12Warmisti ukxarux sänwa: —Tatit Diosam laykuw juramentompi arsta, janiw t'ant'a luratax utjkituti. Ukhamarus wakullaxan mä jach'i jak'ukiw utjitu, chatuxansti mä juk'a aceitekiw utjarakitu, jichhax mä juk'a phäña apthapisiskäyäta, wawaxampitaki, nayampitak mä kuna manq'sa phayt'añataki. Uk manq'asipxä, ukatsti inas manq'atjam jiwxapxchï, janiw phayasiñax utjkxapxituti —sasa.

13Eliasasti sänwa: —Jan axsaramti, saram kuntix sisktax uk luraskakim. Ukampis uka jak'umat mä jisk'a torta nayraqat lurt'anirapita, ukat akar apanirapita, ukatxa jumampitaki, wawamampitak lurt'asinirakim.

14Israelan Tatit Diosapax akham siwa: “Janiw jak'ux wakullan tukuskaniti, chatunkki uka aceites janirakiw tukuskaniti, kunürutix Tatitux aka uraqir wasitat jallu puriykani ukürkama” sasa.

15Ijma warmisti sarasin Eliasax siskatayna ukarjamaw luräna. Manq'añasti, jupatakisa, wawapatakisa, Elías profetatakisa walja urunakatakiw utjäna.

16Janiw jak'ux wakullan pist'känti, janirakiw aceites chatun tukuskänti, kunjämtix Tatitux Elías tuqi siskatayna ukhamapunïnwa.

17Mä qawqha urunakatsti, ijma warmin wawapaw usunt'xäna, sinti usutapunïnwa, janiw samskxänsa.

18Ukat ijma warmix Eliasar säna: —Tatitun profetapa, ¿kunatarak nayamp katxatasistasti? ¿Jucha luratanakaxata amtayirit jumax utaxar jutta, wawaxan jiwatapampi mutuyañti munistaxa? —sasa.

19Ukat Eliasax säna: —Wawam akar irpanim —sasa. Ijma warmin jarphipat wawar ichtasinsti, qurpachatäkän uka utaruw ichkatawayäna, ukatsti ikiñaparuw ikintayäna.

20Ukatsti Tatituruw jach'at achikt'asïna: “Nayan Tatit Diosaxay, ¿nayar qurpacht'iri ijma warmirux llakisiyätati, wawapa jiwayasaxa?” sasa.

21Uk sasinsti, Eliasax kimsa kutiw wawxar liwxattäna, ukatsti Tatituruw jach'at achikt'asirakïna: “Nayan Tatit Diosaxay, ¡aka wawarux jakañap kutt'ayxakimaya!” sasa.

22Tatitusti Eliasan achikt'asitaparux ist'änwa, wawarusti jaktayxänwa.

23Eliasax ukspachaw wawar ichxarusin aynach utar irpaqawayäna, ukatsti taykaparuw katuyxäna, akham sasa: —¡Uñjam, wawamax jakaskiwa! —sasa.

24Warmisti ukxaruw säna: —Jichhakuchaw yatta, chiqpachan jumax Diosan profetapätawa, arsutamasti Tatitun chiqa arsutapawa —sasa.

← Chapter 16 Chapter 18 →