1 Kings 16

aymara-1997

1Tatitusti Hananí chachan Jehú yuqaparuw parläna, Baasá reyitak aka arunak sañapataki:

2“Nayax laq'at jumar aptsma, ukatsti Israel markaxan jilïripat uchsma. Ukampis jumax, Jeroboam reyjamarakiw Israel markaxarux jucha luraytaxa. Jucha luratanakamampiw nayar q'apisiyista.

3Uka layku, Baasá, jumampiru, utamankirinakampirux tukjäwa; kunjämtix Nabat chachan Jeroboam yuqapan wila masinakapar nayax lurkta ukhama.

4Kawkïr wila masinakamatix markan jiwani ukaruxa, anunakaw manq'antani; pampan jiwani ukarusti jach'a jamach'inakaw manq'antarakini” sasa.

5Baasá reyin ukat ukxar sarnaqäwinakapa, luräwinakapasa, atipjäwinakapasa, Israelankir reyinakan luräwinakapa qillqatankiwa.

6Baasá reyix jiwxäna ukkhasti, Tirsá markan juparux imt'xapxäna, uka qhipatsti Elá sat yuqapaw jupa lantix marka apnaqxäna.

7Tatitux Hananí chachan Jehú yuqapa profeta tuqiw Baasá reyitaki, wila masinakapatakis juchañchäwi arunak arsüna, Tatitun nayraqatapan luräwinakapax jan walïtap layku. Baasá reyix Tatituruw q'apisiyäna, luratanakapan Jeroboam reyimpina, wila masinakapampin kipkakïtap layku, jupanakarusti tukjänwa.

8Asá reyin Judá uraqin pä tunka suxtani mara marka apnaqäwipanwa, Baasá chachan Elá yuqapax Israel marka apnaqañ qalltäna, Tirsá markana, jupasti pä maraw marka apnaqäna;

9ukampis ejercitopan Zimrí sat jilïripaw jupatak sayt'äna, juparuw ejercitopana mä chikat nuwasiñ carronakapa katuyatäna. Mä urusti, Elá reyix Tirsá markana, reyi utapa apnaqir Arsá chachan utapankaskänwa, ukansti machjasiñkamaw umäna.

10Ukatsti akatjamat Zimrí chachax purinisin jupar jiwayäna, jupa lanti marka apnaqañataki. Ukasti Asá reyix pä tunka paqallqun mara Judá uraqi apnaqaskäna ukapachaw lurasïna.

11Zimrí chachax reyi qunuñar makhatxasinsti, Baasá reyin taqpach wila masinakaparuw jiwarayäna, janiw khiti chacharusa, khiti wila masiparus jakaykänti, ukhamat ukham jan phuqsusiskañapataki.

12Ukhamaw Zimrí reyix Baasá reyin taqpach wila masinakapar jiwarayäna, kunjämtix Tatitux Jehú profeta tuqi, Baasá reyitak juchañchäwi arsüwip yatiykatayna ukhamarjama,

13Baasá reyimpina, Elá yuqapampin jucha luratanakap layku, ukanakampi israelitanakar jucha lurayatapata, yaqha diosanakar yupaychatanakapampi Israelan Tatit Diosapar q'apisiyasa.

14Elá reyin sarnaqäwinakapaxa, kuntix lurkäna ukanakasa, Israelankir reyinakan luräwinakapa qillqatankiwa.

15Asá reyix Judá uraqina pä tunka paqallquni mara apnaqaskäna, ukhamarak israelita ejercitox Guibetón sat filistea markar katuntañataki wakichasiskäna ukapachaw, Zimrí chachax Tirsá markan apnaqañ qalltäna. Jupasti paqallq urukiw marka apnaqawayäna,

16kunapachatix ejercitox campamentonkkasin Zimrí chachan reyiru jiwayatap yatïna ukkhaxa, taqiniw campamentonxa uka pachpa urun ejerciton jilïripa Omrí sat chachar Israelan reyipat utt'ayapxäna.

17Omrí jilïrimpi, israelita ejercitompix Guibetón markampi nuwasir saraña apanukusinxa, Tirsá markaruw nuwasiñatak sarapxäna.

18Zimrí chachasti markar katuntat uñjasinxa, reyin jach'a utapana imantasiña manqhir mantasin ninamp nakhantayäna, jupasti uka manqhin jiwarakïna.

19Akasti juchanak luratapata, Tatitu nayraqatan jan walinak luratapat ukham lurasïna, jupasti kawkïr juchanaktix Jeroboam reyix lurkatayna uka pachpa juchanak luräna, ukanak lurayasaw israelitanakarux juchar puriyarakïna.

20Zimrí reyin ukat ukxar sarnaqäwipasa, Elá reyitak sayt'asitapasa, Israelankir reyinakan luräwinakapa qillqatankiwa.

21Zimrí reyin jiwatapatsti, Israel markax payaruw jaljtäna. Mä chikatax Guinat chachan Tibní yuqaparuw reyitak munapxäna, mä chikatasti Omrí chacharurakiw reyitak munapxäna.

22Ukampis qhipatxa, Omrí chachar jaqkattir jaqinakaw Tibní chachan jaqinakapar atipjäna. Tibní chachasti ch'axwäwin jiwayat uñjasïna. Ukhamat Omrí chachax reyïxäna.

23Omrí chachasti Israelan marka apnaqañ qalltäna, kunapachatix Asá reyix kimsa tunka mayan mara Judá marka apnaqkäna ukapacha, ukatsti jupax tunka payan maraw marka apnaqäna, suxta marasti Tirsá markan apnaqäna.

24Omrí reyisti Sémer sat chachat Samaria qullu alasïna suxta tunka suxtani kilo qullqimpi, uka qullun mä marka sayt'ayäna, nuwasiñataki suma uyuchrantat lurata, uka markarusti Samaria sutimpiw uchäna, Sémer chachan qullupätap layku.

25Omrí reyin luratanakapax Tatitun nayraqatapan janiw askïkänti, ukhamarus jupat nayra utjir reyinakat sipan juk'amp jan walinakänwa,

26jupasti kunjämtix Nabat chachan Jeroboam yuqapax jucha lurkatayna uka pachparak luräna, israelitanakar ukanakampiw jucha lurayarakïna, yaqha diosanakar yupaychasin Israelan Tatit Diosapar q'apisiyasa.

27Omrí reyin sarnaqäwinakapasa, taqi luratanakapasa, atipjäwinakapasa, Israelankir reyinakan luräwinakapa qillqatankiwa.

28Jiwxipansti, Samaria markaruw jupar imt'xapxäna. Uka qhipatsti Ahab sat yuqapaw jupa lanti reyit utt'asxäna.

29Asá reyix Judá uraqin kimsa tunka kimsaqallqun mara apnaqkän ukapachaw, Omrí chachan Ahab yuqapax Israelan apnaqañ qalltäna. Jupasti Israel markarux pä tunka payan maraw Samaria markan apnaqäna.

30Ukampis sarnaqäwipax Tatitun nayraqatapan sinti jan walïnwa, ukhamarus luräwinakapax jupa nayra utjir reyinakat sipan juk'amp jan walïnwa,

31jupatakix Jeroboam reyin pachpa juchanakap lurañax janis kunäkaspa ukhamänwa. Jupasti Sidón chiqankir Et-baal reyin Jezabel phuchhapampiw jaqichasïna, ukatsti Baal diosatakiw alt'asïna, ukaruw yupaycharakïna,

32ukatsti uka Baal diosatakix Samaria markan mä altarampi, mä templompi lurayarapïna.

33Ukxarusti Astarté diosar uñtasit lurayarakïna, uk lurasaw Israelan Tatit Diosapar q'apisiyäna, jupat nayra utjir reyinakat sipan juk'ampi.

34Ahab reyin urunakapanxa, Betelankir Hiel sat chachaw Jericó marka wasitat sayt'ayäna. Lurañ qalltkäna ukkhasti, Abiram sat jilïr wawapaw jiwxäna, markan punkunakap uchkäna ukkhasti, Segub sat sullkïr wawaparakiw jiwxäna. Ukasti kunjämtix Tatitux Nun chachan Josué yuqap tuqi siskatayna ukhamarjamaw phuqhasiskäna.

← Chapter 15 Chapter 17 →