Song of Solomon 7

Amharic Tigrinya 2011

1ተመለሲ፡ ተመለሲ፡ ኣቲ ሱላሚት፡ ክንርእየኪ ተመለሲ፡ እስኪ ተመለሲ። ኣብታ ሱላሚትከ እንታይ ክትርእዩ ኢኹም፡ ንሳዶ ኸም ናይ መሃናይም ደበላ ትስዕስዕ አላ እያ፡

2ኣቲ ጓል መስፍን፡ ኣእጋርኪ፡ ጫማ ምስ ገበራ፡ ክንደይ ይጽብቓ፡ ቅርጺ ሕቖኺ ኸም ብኢድ ብልሓተኛ እተሰርሔ ስልማት እዩ።

3ሕምብርትኺ እተሖሰ ወይኒ ዘይጎድሎ ኸቢብ ጽዋእ እዩ። ከርስኺ ብዕምበባ እተኸበ ምህርቲ ስርናይ እዩ።

4ክልቲኣን ኣጥባትኪ ኸም ማንቲ መሓስእ ሜዳቑ እየን።

5ክሳድኪ ኸም ግምቢ ስኒ ሓርማዝ እዩ፡ ኣዒንትኺ ኸምቲ ንደማስቆ ገጹ ዚርኢ ግምቢ ሊባኖስ እዩ።

6ርእስኺ ኣብ ልዕሌኺ ኸም ቀርሜሎስ እዩ፡ ጸጉሪ ርእስኺ ኸም ቀይሕ ሃሪ እዩ፡ ንጉስ ብቑኖኺ ተአስረ።

7ኣቲ ፍቕረይ፡ ክንደይ ጽብቕቲ ኢኺ፡ ኣብ ማእከል ደታስ ክንደይ ትፍተዊ።

8እዚ ቑመትኪ ስየ፡ ኣጥባትኪ ድማ ዘለላ ወይኒ ይመስል።

9ኣብ ስየ ኽድይብ፡ ችጨናፍራ ኸአ ክሕዝ እየ፡ በልኩ። ኣጥባትኪ ኸም ዘለላ ወይኒ፡ ጨና እስትንፋስኪ ኸአ ከም ትርንጎ ይኹነለይ፡

10ኣፍኪ ኸም ናብ ፍትወይ ወሪዱስ፡ ናብተን ዚድቅሳ ኸናፍር ዜንሸትት ጥዑም ወይኒ ይኹነለይ።

11ኣነ ናይ ፍትወይ እየ፡ ሃረርታኡ ኸአ ናባይ እዩ።

12ኣታ ፍትወየ፡ ናብ መሮር ንውጻእ፡ ኣብ ዓድታት ንሕደር።

13ተኽሊ ወይኒ እንተ ጠጠዑ፡ ጎጉማ እንተ ነቒዑ፡ ሮማን እንተ ዐምቢቡ ኽንርእስ፡ ናብ ኣታኽልቲ ወይኒ ኣንጊህና ንኺድ፡ ኣብኡ ፍቕረየ ክህበካ እየ።

14ናይ ፍቕሪ ትርንጉ መአዛኡ ይህብ። ኣታ ፍትወይ፡ ንኣኻ ኢለ ዝዐቖርክዎ፡ በብዓነቱ ሓድሽን ብሉይን ክቡር ፍረ ኣብ ደጌታትና አሎ።

← Chapter 6 Chapter 8 →