Psalms 84

Amharic Tigrinya 2011

1ዎ ጐይታ ሰራዊት፡ ማሕደራትካ ኽንደይ ባህ ዜብላ እየን።

2ነፍሰይ ንኣጸድ እግዚኣብሄር ትናፍቖን ሃረር ትብሎን ኣላ፡ ነፍሰይን ስጋይን ንህያው ኣምላኽ እልል ይብላሉ።

3ዑፍ እኳ ቤት ረኸበት፡ ለዃዂቶውን ጨጫዊታ እተንብረላ ቤት ረኸበት፡ መሰውኢታትካ፡ ዎ ጐይታ ሰራዊት፡ ንጉሰይን ኣምላኸይን።

4ኣብ ቤትካ ዚነብሩ ብጿን እዮም፡ ኲሉ ጊዜ ይውድሱኻ።ሴላ።

5ሓይሎም ብኣኻ ዝዀነ፡ ብልቦም ንመገድኻ ዚሐስቡ ሰባት ብጹኣን እዮም።

6ብለሰ ብኽያት ኪሐልፉ ኸለዉ፡ ዓይኒ ማያት ይገብርዎ፡ ዝናም ኣዝመራውን ብበረኸት ይኸድኖ።

7ካብ ሓይሊ ናይ ሓይሊ ይኸዱ፡ ኣብ ጽዮን ኣብ ቅድሚ ኣምላኽ ይቘሙ።

8ዎ እግዚኣብሄር ኣምላኽ ሰራዊት፡ ጸሎተይ ስማዕ። ዎ ኣምላኽ ያእቆብ፡ ጽን በል። ሴላ።

9ኣታ ዋልታና ዝዀንካ ኣምላኽ፡ ርኤ፡ ገጽ ቅቡእካውን ጠምት።

10ካብ ሽሕሲ ሓንቲ መዓልቲ ኣብ ኣጸድካ ትሐይሽ እያ እሞ፡ ኣብ ድንኳን ረሲኣን ካብ ምንባርሲ ኣብ ቤት ኣምላኸይ ሓላው ደገ ምዃን ይሔሸኒ።

11እግዚኣብሄር ኣምላኽሲ ጸሓይን ዋልታን እዩ እሞ፡ እግዚኣብሄር ጸጋን ክብርን ይህብ፡ ነቶም ብቕንዕና ዚመላለሱ ሰናይ ዘበለ ኣይኸልኦምን እዩ።

12ዎ ጐይታ ሰራዊት፡ ኣባኻ ዚውከል ሰብ ብጹእ እዩ።

← Chapter 83 Chapter 85 →