Psalms 80

Amharic Tigrinya 2011

1ዎ ጓሳ እስራኤል፡ ጽን በል። ንዮሴፍ ከም መጓሰ እትመርሖ፡ ኣታ ኣብ ልዕሊ ኪሩቤት እትቕመጥ፡ በሪህካ ተገለጽ።

2ኣብ ቅድሚ ኤፍሬምን ብንያምን ምናሴን ስልጣንካ ኣተንስእ፡ ንምድሓንናውን ንዓ።

3ዎ ኣምላኽ፡ ምለሰና፡ ክንድሕን ድማ ገጽካ ኣብርሃልና።

4ዎ እግዚኣብሄር፡ ኣምላኽ ሰራዊት፡ ክሳኦ መኣዝ ኢኻ ብጸሎት ህዝብኻ እትዂሪ?

5እንጌራ ንብዓት ኣብላዕካዮም፡ ብመስፈር ከኣ ንብዓት ኣስቴኻዮም።

6ንጐረባብትና መካትዒኦም ትገብረና ኣሎኻ፡ ጸላእትናውን የላግጹልና ኣለዉ።

7ዎ ኣምላኽ ሰራዊት፡ ምለሰና፡ ክንድሕን ድማ ገጽካ ኣብርሃልና።

8ጒንዲ ወይኒ ኻብ ግብጺ ኣውጻእካ፡ ኣህዛብ ሰጒጒካውን ተኸልካያ።

9ኣብ ቅድሚኣ ቦታ ኣዳሎኻላ፡ ሱር ሰደደት ምድሪውን መልኤት።

10ኣኽራን ብጽላላ ተኸድኑ፡ ጨናፍራ ድማ ከም ጽሕድታት ኣምላኽ ነበሩ።

11ጨናፍራ ኽሳዕ ባሕሪ፡ ውልዶታት ኸኣ ክሳዕ እቲ ርባ ዘርግሔት።

12ኲሎም ሓለፍቲ መገዲ ኪቕንጥብዋስ፡ ስለምንታይከ ሓጹር ዘፍረስካ?

13ናይ ዱር መፍለስ ይፍልሳ፡ እንስሳ መሮርውን ይጓሰይዋ ኣለዉ።

14ዎ ኣምላኽ ሰራዊት፡ ተመለስ፡ ካብ ሰማይ ኣንቈልቊልካ ርኤ፡ እንሆ ኸኣ ነዛ ወይንን፡ ነዛ የማነይትኻ ዝተኸለታ ኦምን፡ ነቲ ንኣኻ ኢልካ ዘጽናዕካዮ ጨንፈርን ብጽሓዮም።

16ብሓዊ ነዲዳ ተበትከት። ብተግሳጽ ገጽካ ይጠፍኡ ኣለዉ።

17ኢድካ ኣብ ልዕሊ እቲ ናይ የማነይትኻ ሰብኣይ፡ ኣብ ልዕሊ እቲ ንኣኻ ኢልካ ዘጽናዕካዮ ወዲ ሰብ ትኹን።

18ሽዑ ኻባኻ ኣይክንርሕቕን ኢና፡ ህይወት ሀበና፡ ብስምካውን ክንምህለል ኢና።

19ዎ እግዚኣብሄር ኣምላኽ ሰራዊት፡ ምለሰና፡ ክንድሕን ድማ ገጽካ ኣብርሃልና።

← Chapter 79 Chapter 81 →