Psalms 147

Amharic Tigrinya 2011

1ሃሌሉያ። ጥዑም እዩ እሞ፡ ምስጋና ይግባእ።

2እግዚኣብሄር ንየሩሳሌም ይሀንጽ፡ ንስዱዳት እስራኤል ይእክብ ኣሎ።

3ንልቦም እተሰብሩ ይፍውስ፡ ነቚሳሎም ይዘንን።

4ቊጽሪ ኸዋኽብቲ ይቘጽር፡ ንዂላቶም በብስሞም ይሰምዮም።

5ጐይታና ዓብዪ እዩ፡ ሓይሉ ብርቱዕ እዩ፡ ምስትውዓሉ ወሰን የብሉን።

6እግዚኣብሄር ንትሑታት ይድግፎም፡ ንረሲኣን ግና ኣብ ምድሪ የውድቖም።

7ንእግዚኣብሄር ብምምሳው ዘምሩሉ፡ ንኣምላኽና ውዳሴ ብመሰንቆ ዘምሩሉ።

8ነቲ ንሰማያት ብደበና ዜጐልብብ፡ ንምድሪ ዝናም ዜዳሉ፡ ናብ ኣኽራን ሳዕሪ ዜብቊል፡

9ነቲ ንእንስሳን ንዚምህለሉ ጨጫዊት ኳዃትን ዚምግብ ዘምሩሉ።

10ንሓይሊ ፈረስ ኣይብሀጎን፡ በእጋር ሰብ ኣይሕጐስን፡

11እግዚኣብሄር በቶም ዚፈርህዎ፡ ንጸጋኡውን ዚጽበዩ ይሕጐስ።

12መሃርሃር መዓጹኺ ኣጽኒዑ፡ ንደቅኺ ኣብ ማእከልኪ ባሪኽዎም እዩ እሞ፡ ዎ የሩሳሌም፡ ንእግዚኣብሄር ኣመስግኒ፡ ዎ ጽዮን፡ ንኣምላኸኪ ወድሲ።

14ኣብ ወሰናትኪ ሰላም ይገብር፡ ብስብሒ ስርናይ የጽግበኪ።

15ትእዛዙ ናብ ምድሪ ይሰድድ፡ ቃሉ ቐልጢፉ ይጐዪ።

16ንበረድ ከም ጸምሪ ይህብ፡ ንኣስሓይታ ኸም ሓመዂስቲ ይብትኖ።

17ንበረዱ ኸም ርፍራፍ ይድርብዮ፡ ኣብ ቅድሚ ቚሩኸ መን ይቐውም?

18ቃሉ ይሰድድ እሞ የምክኾ፡ ንፋሱ የንፍስ እሞ ማያት ይውሕዙ።

19ቃሉ ንያእቆብ፡ ስርዓታቱን ፍርድታቱን ንእስራኤል ነገረ።

20ንኻልኦት ኣህዛብ ከምዚ ከቶ ኣይገበረሎምን፡ ፍርድታቱ ኸኣ ኣይፈለጡን።

← Chapter 146 Chapter 148 →