Psalms 146

Amharic Tigrinya 2011

1ሃሌሉያ።

2ብህይወተይ ከሎኹ ንእግዚኣብሄር ከመስግኖ፡ ክሳዕ ዘሎኹ ንኣምላኸይ ክውድሶ እየ።

3ብመሳፍንቲ፡ በቲ ኺረድእ ዘይከኣሎ ወዲ ሰብ ኣይትወከሉ።

4ትንፋሱ ይወጽእ፡ ናብ መሬቱ ይምለስ፡ በታ መዓልቲ እቲኣ ሃቐናኡ ይጠፍእ።

5ኣምላኽ ያእቆብ ዝረዲኤቱ፡ ተስፋኡ ኸኣ ኣብ እግዚኣብሄር ኣምላኽ ዝገበረ ሰብ ብጹእ እዩ።

6ንሰማይን ምድርን፡ ንባሕርን ኣብኡ ዘሎ ዂሉን ዝገበረ፡ ንሓቂ ኽሳዕ ዘለኣለም ዚሕሉ፡

7ንጥቑዓት ፍትሒ ዜውጽኣሎም፡ ንጥሙያት እንጌራ ዚህቦም ንሱ እዩ፡ እግዚኣብሄር ንእሱራት ይፈትሖም።

8እግዚኣብሄር ነዒንቲ ዕዉራት ይኸፍተን፡ እግዚኣብሄር ንዝደነኑ የቕንዖም፡ እግዚኣብሄር ንጻድቃን የፍቅሮም፡

9እግዚኣብሄር ንስደተኛታት የዕቊቦም፡ እግዚኣብሄር ንዘኽታምን መበለትን ይኣልዮም፡ ንመገዲ ረሲኣን ግና ይጠዋውያ።

10እግዚኣብሄር ንዘለኣለም ይነግስ፡ ዎ ጽዮን፡ ኣምላኽኪ ንውሉድ ወለዶ ይነግስ።

← Chapter 145 Chapter 147 →