Hosea 12

Amharic Tigrinya 2011

1ኤፍሬም ንፋስ ይምገብ፡ ደድሕሪ ንፋስ ምብራቕ ከአ ይስዕብ፡ ኩሉ መዓልቲ ሓሶትን ዓመጽን የብጽሕን፡ ምስ ኣሶር ኪዳን ይአትው፡ ናብ ግብጺውን ዘይቲ ይወስዱ።

2እግዚኣብሄር ምስ ይሁዳውን ነገር ኣለዎ፡ ንያእቆብ ከአ ከም መጠን መገዱ ኪቐጽዖ፡ ከም መጠን ግብሩ ድማ ኪፈድዮ እዩ።

3ኣብ ከርሲ ኣዲኡ ኸሎ ንሓው ብኹርኹሪኡ ሐዞ፡ ብምብርታዑ ኸአ ምስ ኣምላኽ ተቓለሰ።

4ምስ መልኣኽ ተቓለሰ እሞ ኣሰነፈ፡ በኸየ፡ ለመኖ ኸአ ኣብ ቤትኤል ረኸቦ፡ ኣብኡውን ተዛረበና።

5ንሱ እግዚኣብሄር ኣምላኽ ሰራዊት፡ ስም መዘከርታኡ ድማ እግዚኣብሄር እዩ።

6እምበኣርሲ ናብ ኣምላኸካ ተመለስ፡ ምሕረትን ፍርድን ሐሉ፡ ኩሉ ጊዜ ብኣምላኽካ ተስፋ ግበር።

7ከንኣናዊ እዩ፡ ኣብ ኢዱ ሓሳዊ ሚዛን አለዎ፡ ምጥዋይ ይፈቱ።

8ኤፍሬም ከአ፡ ኣነ ሀብተምኩ፡ ገንዘብ ኣጥሬኹ፡ ኣብ ኩሉ ጻዕረይ ሓጢኣት ዚኸውን ኣበሳ ኣይርከበንን በለ።

9ኣነ ኻብ ሃገር ግብጺ ጀሚረ እግዚኣብሄር ኣምላኽካ እየ፡ ከምቲ ብመዓልቲ በዓል ከም ብሓድሽ ኣብ ድንኳናት ክንብረካ እየ።

10ንነብያትካ ከአ ተዛረብኩ፡ ራእይ ድማ ኣብዛሕኩ፡ ብነብያት ገይረ ምስላታት ነገርኩ።

11ጊልዓድ ዓመጻ እንተ ኾነ፡ ከንቱነት ጥራይ እዮም። ኣብ ጊልጋል ዝራብዓት ይስውኡ፡ መሰውኢታቶም ከአ ኣብ ነግሒ ግራት ከም እተኾመረ ኣእማን ኪኸውን እዩ።

12ያእቆብ ናብ ሃገር ኣራም ሀደመ፡ እስራኤል ድማ ምእንቲ ሰበይቲ ተገዝኤ፡ ምእንቲ ሰበይቲ ኸአ ጓሳ ኾነ።

13ግናኸ እግዚኣብሄር ንእስራኤል ብኢድ ነብዩ ኻብ ግብጺ ኣውጽኦ፡ ብኢድ ነብዩ ኸአ ሐለዎ።

14ኤፍሬም ኣምሪሩ ኣቖጥዖ ስለዚ ጎይትኡ ደሙ ኣብ ልዕሊኡ ኼውርደሉ፡ ጸርፉውን ኣብ ልዕሊኡ ኺመልሰሉ እዩ።

← Chapter 11 Chapter 13 →