Psalms 80

Amharic Tigrinya (መፅሓፍ ቅዱስ) No Year

1ንዮሴፍ ከም መጓሰ ኣባጊዕ እትመርሕ፥ ኦ ጓሳ እስራኤል፥ ፅን በል። ኣታ ኣብ ልዕሊ ኪሩቤል እትቕመጥ፥ ተገለፅ።

2ኣብ ቅድሚ ኤፍሬምን ብንያምን ምናሴን፥ ሓይልኻ ኣልዕል፤ ንምድሓንናውን ነዓ።

3ኦ ኣምላኽ፥ ምለሰና፤ ምእንቲ ኽንድሕን ድማ ገፅካ ኣብርሀልና።

4ኦ ኣምላኽ ሰራዊት እግዚኣብሄር፥ ክሳዕ መኣዝ ኢኻ፥ ኣብ ልዕሊ ፀሎት ባርያኻ እትቝጣዕ?

5እንጀራ ንብዓት ኣብላዕኻና፤ ብመስፈሪ ኸዓ ንብዓት ኣስተኻና።

6ንጐረባብትና መካትዒ ገበርካና፤ ፀላእትናውን ይሳለቑና ኣለዉ።

7ኦ ኣምላኽ ጐይታ ሰራዊት፥ ምለሰና፤ ክንድሕን ድማ ገፅካ ኣብርሀልና።

8ተኽሊ ወይኒ ካብ ግብፂ ኣምፃእኻ፤ ንኣህዛብ ሰጒጕካ ድማ ንኣኣ ተኸልካያ።

9ኣብ ቅድሚኣ መንገዲ ፀረግካ፤ ሰራውራ ተኸልካ፤ ንምድሪ እውን መልአት።

10ፅላላ ንእምባታት ከደነ፤ ጨናፍራ ድማ ኸም ዝግባ እግዚኣብሄር ኮኑ።

11ጨናፍራ ኽሳዕ ባሕሪ፥ ውልዶታታ ኸዓ ኽሳዕ ፈለግ ዘርግሐት።

12ስለ ምንታይ ሓፁራ ኣፍረስካ? እንሆ ሕዚ ዅሎም ሓለፍቲ መንገዲ ይቕንጥብዋ ኣለዉ።

13ናይ ዱር መፍለስ ኣርከሳ፤ መውፈሪ እንስሳ በረኻውን ኮነት።

14ኦ ኣምላኽ ሰራዊት፥ በይዛኻ ተመለስ፤ ካብ ሰማይ ኣንቈልቊልካ ተመልከት፤ ረአውን፤ ነዛ ዓፀደ ወይኒ እዚኣ ብፅሐላ።

15ብወዲ ሰብ ንኣኻ ዘፅናዕኻዮውን፥ የማንካ ንዝተኸለታ ኣልዕላ።

16ብሓዊ ተቓፂላ ኣላ፤ ተነቒላውን ኣላ፤ ካብ ተግሳፅ ገፅካ ዝተልዓለ ይጠፍኡ ኣለዉ።

17ኢድካ ኣብ ልዕሊ እቲ ናይ የማናይካ ሰብ፥ ኣብ ልዕሊ እቲ ንኣኻ ኢልካ ዘፅናዕኻዮ ወዲ ሰብ ትኹን።

18ካባኻ ኣይንርሓቕ፤ ኣሕውየና ስምካውን ክንፅውዕ ኢና።

19ኦ ጐይታ ኣምላኽ ሰራዊት፥ ምለሰና፤ ንኽንድሕን ድማ ገፅካ ኣብርሀልና።

← Chapter 79 Chapter 81 →