Psalms 72

Amharic Tigrinya (መፅሓፍ ቅዱስ) No Year

1ኦ ጐይታ! ፍትሕኻ ንንጉስ፥ ፅድቅኻ ድማ ንወዲ ንጉስ ሃብ።

2ንሱ ንህዝብኻ ብፅድቂ፥ ንነዳያንካውን ብፍትሒ ኽፈርድ እዩ።

3እምባታትን ኰረብታታትን፥ ብፅድቂ ንህዝብኻ ሰላም ይቀበሉ።

4ንዝተሸገሩ ህዝብኻ ብሓቂ ትፈርደሎም፤ ንደቂ ምስኪናትካ ድኻታትውን ተድሕኖም፤ ነቲ ዕቡይ ድማ ኽተዋርዶ ኢኻ።

5ፀሓይ ብዝነብረሉ ዅሉ ዘመን፥ ኣብ ቅድሚ ወርሒውን ንውሉድ ወለዶ ኽነብር እዩ።

6ንሱ ኸም ህቦ ኣብ ልዕሊ ሰውሒ፥ ኣብ ልዕሊ ምድሪ ኸም ዘንጠብጥብ ነጠብጣብውን ይወርድ።

7ብዘመኑ ፅድቂ ይዕምብብ፤ ወርሒ ክሳዕ እትሓልፍውን ብዙሕ ሰላም ክህሉ እዩ።

8ካብ ባሕሪ ኽሳዕ ባሕሪ፥ ካብ ፈለግውን ክሳዕ ወሰን ምድሪ ኽገዝእ እዩ።

9ኣብ ቅድሚኡ ኢትዮጵያ ኽሰግዱ እዮም፤ ፀላእቱ ኸዓ ሓመድ ክቝሕሙ እዮም።

10ነገስታት ተርሴስን ደሴታትን ውህብቶ ኸምፅኡሉ እዮም፤ ነገስታት ሳባን ዓረብን ድማ ገፀ በረኸት ከቕርቡሉ እዮም።

11ኵሎም ነገስታት ምድሪ ኸዓ ኽሰግዱሉ፥ ኵሎም ኣህዛብውን ክግዝኡሉ እዮም።

12ንሱ ረዳኢ ንዘይብሉ ምስኪንን፤ ንድኻን ካብ ኢድ ዝዕምፆ የድሕኖ።

13ንምስኪናትን ንድኻታትን ይርህርሀሎም፤ ንነፍሲ ድኻታትውን የድሕን።

14ንነፍሶምውን ካብ ጥቕዓትን ካብ ግፍዕን የድሕን፤ ስሙውን ኣብ ቅድሚኣቶም ክቡር እዩ።

15ንሱ ብህይወት ይነብር፤ ካብ ዓረብውን ወርቂ ይህብዎ፤ ኵሉ ጊዜውን ናብኡ ይፅልዩ፤ ኵሉ መዓልቲ እውን ክባርኽዎ እዮም።

16ኣብ ውሽጢ ምድሪ ኣብ ልዕሊ እምባታት መፀግዒ ክኸውን እዩ፤ ፍረኡውን ካብ ኦም ሊባኖስ ልዕል ልዕል ክብል እዩ፤ ከም ሳዕሪ ምድሪ ኽበቍል እዩ።

17ስሙ ንዘለኣለም ቡሩኽ ይኸውን፤ ቅድሚ ፀሓይ ስሙ ኣሎ፤ ኵሎም ኣህዛብ ምድሪ ብእኡ ኽባረኹ እዮም፤ ኵሎም ኣህዛብ ድማ ኸመስግንዎ እዮም።

18በይኑ ዘደንቕ ተግባራት ዝገብር፥ ኣምላኽ እስራኤል እግዚኣብሄር ይመስገን።

19ስም ምስጋናኡውን ንዘለኣለመ ኣለም ይባረኽ፤ ኵላ ምድሪ እውን ብኽብሩ ትምላእ። ኣሜን! ኣሜን!

20ፀሎት ዳዊት ወዲ እሴይ ኣብዙይ ተፈፀመ።

← Chapter 71 Chapter 73 →