Psalms 68

Amharic Tigrinya (መፅሓፍ ቅዱስ) No Year

1እግዚኣብሄር ይተስእ፤ ፀላእቱውን ይበተኑ፤ እቶም ዝፀልእዎ ኸዓ ኻብ ገፁ ይህደሙ።

2ትኪ ኸም ዝበንን፥ ከምኡ ይብነኑ። ሽምዒ፥ ኣብ ቅድሚ ሓዊ ኸም ዝመክኽ፥ ከምኡውን ሓጥኣን ካብ ቅድሚ እግዚኣብሄር ይጥፍኡ።

3ፃድቃን ግና ይተሓጐሱ፤ ኣብ ቅድሚ እግዚኣብሄርውን ሓሴት ይግበሩ፤ ብደስታውን ደስ ይበሎም።

4ንእግዚኣብሄር ተቐነዩ፤ ንስሙውን ዘምሩ፤ ነቲ ናብ ምድረ በዳ ዝወፀውን መንገዲ ግበሩ፤ ስሙ እግዚኣብሄር እዩ፤ ኣብ ቅድሚኡውን ተሓጐሱ፤ ኣብ ቅድሚ ገፁውን ደስ ይበልኩም።

5እግዚኣብሄር ኣብቲ ቅዱስ ቦታኡ፥ ንደኽታማት ኣቦ፥ ንመበለታት ድማ ዳኛ እዩ።

6እግዚኣብሄር ነቶም በይንቶም ዝኾኑ ኣብ ስድራ የሕድሮም፤ ንእሱራትውን ብሓይሉ የውፅኦም፤ ዓመፀኛታት ግና ኣብ ምድረ በዳ ይነብሩ።

7ኦ ጐይታ፥ ቀቅድሚ ህዝብኻ ምስ ወፃእኻ፥ ብምድረ በዳውን ኽትሓልፍ እንተለኻ፥ ምድሪ ተናወፀት፤

8ኣብ ቅድሚ ኣምላኽ ሲና፥ ኣብ ቅድሚ ኣምላኽ እስራኤል፥ ሰማያትውን ኣንጠብጠቡ።

9ኦ ጐይታ፥ ዝናም ሞገስ ንርስትኻ ኣዝነምካ፤ ምስ ደኸመውን ንስኻ ኣፅናዕኻዮ።

10እንስሳትካውን ኣብኡ ይሓድሩ፤ ኦ ጐይታ፥ ብሕያዋይነትካ ንድኻታት ኣዳሎኻሎም።

11እግዚኣብሄር ቃሉ ሃበ፤ እቶም ዘውርዩ ድማ ብዙሓት ሰራዊት እዮም።

12ናይ ሰራዊት ነገስታት ቀልጢፎም ይሃድሙ፤ እታ ኣብ ገዛ እትነብርውን ምርኮ ተኻፈለት።

13ኣብ ማእኸል ርስትታት እንተ ሓደርኩም፥ ካብ ብሩር ከም ዝተሰርሑ ኣኽናፍ ርግቢ፥ ብቘፅሊ ወርቂ ኸም ዝተለበጡ፥ ክንቲታት ኢኹም።

14ሰማያዊ ንጉስ ኣብ ልዕሊኣ ምስ ኣዘዘ፥ ኣብ ልዕሊ ሰልሞን በረድ ይዘንም።

15እምባ እግዚኣብሄር ዝለምለመ እምባ እዩ፤ ፅኑዕ እምባን ዝለመለመ እምባን እዩ።

16እቶም ፅኑዓት እምባታት ንምንታይ ይለዓሉ? ነዝ እምባ እዙይ እግዚኣብሄር መሕደሪኡ ክኸውን ፈተዎ፤ ብሓቂ እግዚኣብሄር ንዘለኣለም ኣብኡ ኽሓድረሉ እዩ።

17ሰረገላታት እግዚኣብሄር ክልተ እልፊ፥ ኣሽሓት ጊዜ ኣሽሓት እዮም፤ ጐይታ ኣብ መቕደሱ ኣብ ሲና፥ ኣብ ማእኸሎም እዩ።

18ምርኮ ማሪኽካ ናብ ኣርያም ዓረግካ፤ ውህብቶውን ንደቂ ሰብ ሃብካ፤ ኣብኡ ምእንቲ ኽሓድሩስ፥ ንዓመፀኛታትውን ሃብካ።

19እግዚኣብሄር ኣምላኽ ቡሩኽ እዩ፤ እግዚኣብሄር በብመዓልቱ ብሩኽ እዩ፤ ኣምላኽ መድሓኒትና ይረድአና።

20ኣምላኽና ኣምላኽ ምድሓን እዩ፤ ካብ ሞት ምድሓንውን ካብ እግዚኣብሄር እዩ።

21ግና እግዚኣብሄር ኣራእስ ፀላእቱ ይሰብር፤ ነቲ ብበደሉ ዝመላለስ፥ ጐታን መንበስበስታኡ ኽጭፍልቕ እዩ።

22እግዚኣብሄር ከምዙይ በለ፦ ካብ ባሳን ከምፅኦም እየ፤ ካብ መዓሙቝ ባሕሪ እውን ክምልሶም እየ፤

23ኣእጋርካ ኣብ ደም ምእንቲ ኽረግፃ፥ መልሓስ ኣኽላባትካ ኣብ ልዕሊ ፀላእትኻ ምእንቲ ክኸውን እዩ።

24ናይ ኣምላኸይ ናይ ንጉስ መንገዲ ኣብ መቕደሱ እዩ፤ ኦ ጐይታ፥ መንገድኻ ተገለፀ።

25ኣሕሉቕ ቀደሙ፤ መዘምራንውን ሰዓቡ፤ ከበሮ ዝወቕዓ ደናግል ኣብ ማእኸል ነበራ።

26ንእግዚኣብሄር ብማሕበር፥ ንጐይታናውን ካብ ዓይኒ ማይ እስራኤል ኣመስግንዎ።

27መንእሰይ ብንያም ብሓይሉ ኣብኡ ኣሎ፤ ገዛእቶም ኣሕሉቕ ይሁዳን፥ ኣሕሉቕ ዛብሎንን፥ ኣሕሉቕ ንፍታሌምን ኣለዉ።

28ኦ ጐይታ፥ ንሓይልኻ ኣዝዝ፤ ኦ ጐይታ፥ ነቲ ንኣና ዝሰራዕኻዮ ኣፅንዓዮ።

29ስለ እቲ ኣብ ኢየሩሳሌም ዘሎ ቤተ መቕደስካ፥ ነገስታት ንኣኻ ውህብቶ ኸምፅኡ እዮም።

30ነቶም ኣብ ውሽጢ ሻምበቆ ዘለዉ ኣራዊት፥ ነቶም ኣብ ውሽጢ ኣህዛብ ዘለዉ፥ ማሕበር ኣብዑርን ምራኹትን ገስፆም። እቶም ከም ብሩር ዝተፈተኑ ኣህዛብ ከይዕፀዉ፥ ነቶም ውግእ ዝፈትዉ ኣህዛብ በትኖም።

31መኳንንቲ ኻብ ግብፂ ኽመፁ እዮም፤ ኢትዮጵያ ኸዓ ቐልጢፋ ኣእዳዋ ናብ እግዚኣብሄር ክትዝርግሕ እያ።

32ኵልኻትኩም ነገስታት ምድሪ፥ ንእግዚኣብሄር ኣመስግንዎ፤ ንጐይታውን ዘምሩ።

33ብወገን ምብራቕ ብዘሎ ሰማይ ኣቢሉ፥ ናብ ሰማየ ሰማያት ንዝዓረገ እግዚኣብሄር ዘምሩ። እንሆ፥ ቃል ሓይሊ ዝኾነ ቓሉ ይህብ ኣሎ።

34ንእግዚኣብሄር ክብሪ ሃቡ፤ ግርማኡ ኣብ ልዕሊ እስራኤል፥ ሓይሉውን ኣብ ልዕሊ ደበናታት እዩ።

35እግዚኣብሄር ኣብ ልዕሊ ቕዱሳኑ ዘደንቕ እዩ፤ ኣምላኽ እስራኤል፥ ንህዝቡ ሓይልን ፅንዓትን ይህብ። እግዚኣብሄር ይመስገን።

← Chapter 67 Chapter 69 →