Psalms 63

Amharic Tigrinya (መፅሓፍ ቅዱስ) No Year

1ኣምላኸይ፥ ኣምላኸይ፥ ናባኻ እግስግስ ኣለኹ፤ ነፍሰይ ንኣኻ ፀምአት፤ ዕንፀይትን ማይን ኣብ ዘይብሉ ምድረ በዳ፥ ስጋይ ንኣኻ ከመይ ናፈቐት።

2ከምኡውን ሓይልኻን ክብርኻን ምእንቲ ኽርኢ፥ ኣብ ውሽጢ መቕደስካ ተመልከትኩኻ።

3ምሕረትካ ኻብ ህይወት ይበልፅ እዩሞ፥ ከናፍረይ የመስግናኻ።

4ከምኡ ብህይወተይ ክሳዕ ዘለኹ ኸመስግነካ እየ፤ ብስምካውን ኣእዳወይ ከልዕል እየ።

5ነፍሰይ ብጠስምን ብስብሕን ከም ዝፀግቡ ኽትፀግብ እያ፤ ከናፍረይ ብደስታ ንስምካ የመስግና።

6ኣብ ምድቃሰይ እዝክረካ ኣለኹ፤ ኣንጊሀውን እናገረልካ ኣለኹ።

7ረዳእየይ ኴንኻኒ ኢኻሞ፥ ኣብ ትሕቲ ፅላል ኣኽናፍካ እሕጐስ ኣለኹ።

8ነፍሰይ ደድሕሬኻ ተኸተለት፤ ነኣይውን የማነይትኻ ተቐበለትኒ።

9ንሳቶም ግና ንነፍሰይ ንኸንቱ ደለይዋ፤ ናብ መዓሙቕ ምድሪ ኽወርዱ እዮም።

10ኣብ ኢድ ሰይፊ ይወሃቡ፤ ግደ ወኻሩትውን ይኾኑ።

11ንጉስ ግና ብእግዚኣብሄር ይሕጐስ እዩ፤ ኵሉ ብእኡ ዝምሕል ክኸብር እዩ፤ ኵሉ ሓሰት ዝናገር ኣፍ ግና ክዕበስ እዩሞ።

← Chapter 62 Chapter 64 →