Psalms 60

Amharic Tigrinya (መፅሓፍ ቅዱስ) No Year

1ኦ ጐይታ፥ ደርበኻና፤ ኣፍረስካናውን፤ ተቘጣዕኻና፤ ይቕረውን በልካና።

2ንምድሪ ኣናወፅካያ፤ ሃወኽካያውን፤ ተናዊፃ እያሞ ቝስላ ፈውስ።

3ንህዝብኻ ጭንቀት ኣርአኻዮም፤ ዘደንግፅ ወይኒ እውን ኣስተኻና።

4ካብ ፍላፃ ፀላኢ ምእንቲ ኸምልጡ፥ ነቶም ዝፈርሑኻ ምልክት ሃብካዮም።

5እቶም ፈተውትኻ ምእንቲ ኽድሕኑ፥ ብየማንካ ኣድሕን፤ ስምዐኒውን።

6እግዚኣብሄር ብቕድስናኡ ተናገረ፤ “ደስ እናበለኒ፥ ንሴኬም ክማቐል እየ፤ ንለሰ ሱኮትውን ብመለክዒ ኽልክዖ እየ።

7ገለዓድ ናተይ እዩ፤ ምናሴውን ናተይ እዩ፤ ኤፍሬም መፀግዒ ርእሰይ እዩ፤ ይሁዳውን ንጉሰይ እዩ።

8ሞኣብ መሕፀብየይ እዩ፤ ኣብ ልዕሊ ኤዶምያስ ሳእነይ ክዝርግሕ እየ፤ ፍልስጥኤም ክግዝኡለይ እዮም።”

9ናብታ ፅንዕቲ ኸተማ መን ይወስደኒ? ናብ ኤዶምያስከ መን ይመርሐኒ?

10ኦ ጐይታ፥ ዝደርበካና ንስኻዶ ኣይኮንካን? ኦ ኣምላኽ፥ ምስ ሰራዊትናውን ኣይትወፅእን ኢኻ!

11ብመከራና ረድኤት ሃበና፤ ምድሓን ሰብውን ከንቱ እዩ።

12ብእግዚኣብሄር ሓይሊ ንገብር፤ ንሱውን ንዘጨንቑና ኸዋርዶም እዩሞ።

← Chapter 59 Chapter 61 →